އީރާންގެ އިންޓެލިޖެންސްގެ އިސްވެރިޔާ އަވަހާރަ ކޮށްލައިފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި، އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ އިންޓެލިޖެންސް އިދާރާގެ އިސްވެރިޔާ މޭޖާ ޖެނަރަލް މަޖީދު ޚާދިމީ އަވަހާރަ ކޮށްލާފައިވާކަން އެ ޤައުމުން ކަށަވަރު ކޮށްދީފި އެވެ. 

އީރާންގެ އިސްލާމިކް ރިވޮލިއުޝަނަރީ ގާޑްސް އިން މިކަން ހާމަ ކޮށްފައި ވަނީ، އެ އިދާރާގެ ރަސްމީ ޓެލެގްރާމް ޗެނަލް މެދުވެރިކޮށް ހޯމަ ދުވަހު ނެރުނު ބަޔާނެއްގަ އެވެ. 

އައިއާރުޖީސީގެ ބަޔާނުގައި ބުނެފައި ވަނީ، އެ އިދާރާގެ އިންޓެލިޖެންސް އޯގަނައިޒޭޝަންގެ އެންމެ އިސްވެރިޔާގެ މަގާމުގައި ހުންނެވި، ތައުލީމީ އަދި ނުފޫޒު ގަދަ ލީޑަރު މޭޖާ ޖެނަރަލް މަޖީދު ޚާދިމީ އަވަހާރަ ކޮށްލާފައި ވަނީ، ހޯމަ ދުވަހުގެ ހެނދުނުގެ ވަގުތެއްގައި ކަމަށެވެ. އެގޮތުން ދުޝްމަނުން ދިން ނުރައްކާތެރި ޓެރަރިސްޓު ހަމަލާއެއްގައި ޚާދިމީ އަވަހާރަވެފައިވާ ކަމަށް ވަނީ ފާހަގަ ކޮށްފަ އެވެ. 

އެ ހާދިސާއާ ގުޅިގެން އިޒްރޭލްގެ ޑިފެންސް މިނިސްޓަރު އިޒްރާއީލް ކާޓްޒް ވަނީ، ޚާދިމީ އަވަހާރަ ކޮށްލާފައިވާ ކަމަށް ވިދާޅުވެފަ އެވެ. އަދި އީރާންގެ ލީޑަރުން، އެކަކު ފަހަތުން އަނެކަކު ހޯދައި، އެ މީހުން ނައްތާލާނެ ކަމުގެ އިންޒާރު ވެސް ކާޓްޒް ވަނީ ދެއްވައިފަ އެެވެ. މިއީ އީރާންގެ އަސްކަރީ އަދި ސިޔާސީ އިސް ސަފަށް އަމާޒުކޮށް އިޒްރޭލް އިން ދެމުންދާ ހަމަލާ ތަކުގެ ތެރެއިން ދީފައިވާ ވަރުގަދަ ހަމަލާ އެކެވެ. 

އެމެރިކާ އާއި އިޒްރޭލް އެކުވެގެން އީރާންއާ ދެކޮޅަށް ފުޅާ ދާއިރާއެއްގައި އަސްކަރީ އޮޕަރޭޝަނެއް ފަށާފައި ވަނީ މިދިޔަ ފެބްރުވަރީ މަހުގެ 28 ވަނަ ދުވަހު އެވެ. މި އޮޕަރޭޝަންގެ ދަށުން ދެމުންދާ ހަމަލާ ތަކުގައި އީރާންގެ އިސް ސަފުގެ ގިނަ އަދަދެއްގެ ލީޑަރުން ވަނީ އަވަހާރަ ކޮށްލައިފަ އެވެ. އޭގެ ތެރޭގައި އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ ހިމެނެ އެވެ. 

ހޯމަ ދުވަހު އިޒްރޭލް އިން އަވަހަރާ ކޮށްލި އީރާންގެ އިންޓެލިޖެންސްގެ އިސްވެރިޔާ، މޭޖާ ޖެނަރަލް މަޖީދު ޚާދިމީ އަކީ އީރާންގެ ޖާސޫސީ އިދާރާގެ އެންމެ މުހިންމު އެއް ތަނބު ކަމަށްވާއިރު، އޭނާ އަވަހާރަ ކޮށްލުމަކީ އީރާންގެ ދިފާއީ އަދި ޖާސޫސީ ނިޒާމަށް ލިބުނު ބޮޑު ލޮޅުމެއް ކަމަށް މަސްރަހު ދިރާސާ ކުރާ ފަރާތްތަކުން ފާހަގަ ކޮށްފައިވެ އެވެ. މި ހަމަލާއާ އެކު މެދު އިރުމަތީގެ މަސްރަހު އިތުރަށް ނުތަނަވަސްވެ، ހަނގުރާމަ ފުޅާވެގެން ދާނެ ކަމުގެ ބިރު ވަނީ ބޮޑުވެފަ އެވެ.