އީރާން އިން އަމިއްލަ ދިފާއުގައި ތެދުވާނެ ކަމަށް ވިދާޅުވެ، އެ ޤައުމުގެ ކުރީގެ ފޮރިން މިނިސްޓަރުގެ ވަރުގަދަ ރައްދެއް ޓްރަމްޕް އަށް

ހޮރްމޫޒް ކަނޑު އޮޅިއާ ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ވާހަކަ ތަކަށް، އީރާންގެ ކުރީގެ ފޮރިން މިނިސްޓަރު މުޙައްމަދު ޖަވާދު ޒަރީފް ފާޑު ވިދާޅުވެއްޖެ އެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ޒަރީފް ވިދާޅުވީ، އީރާން އިން އެ ޤައުމުގެ އަމިއްލަ ނަފްސު ދިފާއު ކުރާނެ ކަމަށެވެ. ނަމަވެސް، އަމިއްލަ ސަލާމަތަަށްޓަކައި ޓްރަމްޕްގެ އިންޒާރު ތަަކަށް ސަމާލުވާން ޖެހޭނެ ކަމަށް ވެސް އޭނާ ވިދާޅުވި އެވެ. އޭނާ ވިދާޅުވި ގޮތުގައި މި އުދުވާނަކީ މީގެ ކުރިން ހިންގާފައިވާ ހަނގުރާމައިގެ ކުށަކުން ފެށިފައިވާ ކަމެކެވެ.

އެގޮތުން މިނާބް ސްކޫލް އަށް ދިން ހަމަލާގައި 170 ކިޔަވާ ދަރިވަރުން ޝަހީދު ކޮށްލުމަކީ ބޮޑުވެގެންވާ ޖަރީމާއެއްގެ ގޮތުގައި ޒަރީފް ވަނީ ސިފަ ކުރައްވައިފަ އެވެ. އެއާ އެކު ޒަރީފް ވިދާޅުވީ، އީރާން އަށް އަމާޒުކޮށް ޓްރަމްޕް ދެއްވަމުން ގެންދަވާ އިންޒާރު ތަކަކީ އެއްވެސް ޙާލަތެއްގައި ބަލައި ގަނެވޭނެ ވާހަކަ ތަކެއް ނޫން ކަަމަށެވެ.

ޓްރަމްޕް ދެއްކެވި ވާހަކަ ތަކަށް އިޝާރާތް ކުރައްވައި ޒަރީފް ވިދާޅުވީ، ޓްރަމްޕް ފާޅު ކުރެއްވި ބޭއަދަބީ އަދި ހަރުކަށި ބަސް މަގަކީ ހަނގުރާމައިގެ އިތުރު ކުށްތަކަސް ހިތްވަރުދޭ އަމަލެއް ކަމަށެވެ. އަދި މިފަދަ އަމަލު ތަކުގައި ބައިވެރިވުމަކީ ބައިނަލްއަޤުވާމީ ޖިނާއީ ޒިންމާ އުފުލަން ޖެހޭނެ ކަމެއް ކަމަށް ވެސް އޭނާ ވިދާޅުވެފައިވެ އެވެ. 

ޒަރީފް އަކީ 2015 ވަނަ އަހަރު އީރާންގެ ނިއުކްލިއާ އެއްބަސްވުން އެކުލަވާލުވުމުގައި އެންމެ އިސް ދައުރެއް އަދާ ކުރެއްވި ބޭފުޅާ އެވެ. ނަމަވެސް، ދާދި ފަހުން ފޮރުން އެފެއާޒް މެގަޒިންގައި ހަނގުރާމަ ހުއްޓާލުމާ ގުޅޭ ގޮތުން އޭނާ ލިޔުއްވި މަގު ޗާޓަކާ ގުޅިގެން އީރާންގެ ސަރުކާރުން ވަނީ އޭނާ އަށް ނަސޭހަތްތެރި ވެފަ އެވެ. 

މި މައްސަލަ ހޫނުވެފައި ވަނީ، ހޮރްމޫޒް ކަނޑު އޮޅިގެ ސަލާމަތާއި ރައްކާތެރިކަމާ ގުޅޭ ގޮތުން އެމެރިކާ އާއި އީރާންއާ ދެމެދު ބަހުގެ ހަމަލާތައް ބަދަލު ކުރަމުން އަންނަ ދަނޑިވަޅެއްގަ އެވެ. ޒަރީފްގެ މި ބަޔާނަކީ ދެ ޤައުމުގެ ދެ މެދުގައި އޮތް ނުތަނަވަސްކަން އިތުރަށް ބޮޑު ވެގެންދާނެ ކަމެއް ކަމަށް، މަސްރަހު ދިރާސާ ކުރާ ފަރާތްތަކުން ދެކެ އެވެ.