ދެ ވަނަ ލެގު ކާމިޔާބުކޮށް ލިވަޕޫލް ކުއާޓާ ފައިނަލް އަށް، ވާދަ ކުރަން ޖެހެނީ ޕީއެސްޖީއާ

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ގަލަތަސަރާއި ބަލިކޮށް، ލިވަޕޫލް އިން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ. 

ގަލަތަސަރާއިގެ ދަނޑުގައި ކުޅުނު ފުރަތަމަ ލެގުގައި އެ ޓީމުން ވަނީ 1-0 އިން ލިވަޕޫލް ބަލިކޮށްފަ އެވެ. އެހެންވެ، ލިވަޕޫލް އަށް ކުއާޓާ ފައިނަލްގެ ފުރުސަތު އޮތީ އަމިއްލަ ދަނޑުގައި ކުޅޭ ދެ ވަނަ ލެގުން މޮޅުވެގެންނެވެ. ބުދަ ދުވަހުގެ ރޭ ދަންވަރު ކުޅުނު ދެ ވަނަ ލެގުގައި ލިވަޕޫލް އިން ވަނީ 4-0 އިން ގަލަތަސަރާއި ބަލިކޮށްފަ އެވެ.

މެޗު ފަށައިގެން 25 ވަނަ މިނެޓުގައި ލިވަޕޫލް އަށް ލީޑު ނަގައިދިނީ ޑޮމިނިކް ސޮބޮސްލާއީ އެވެ. އޭގެ ފަހުން ފުރަތަމަ ހާފުގެ އިތުރު ވަގުތުގައި ލިވަޕޫލް އަށް ލީޑު ފުޅާ ކޮށްދޭން ލިބުނު ފުރުސަތުގައި، މިޞްރުގެ މުޙައްމަދު ޞަލާޙު ފޮނުވާލި ޕެނަލްޓީ ކާމިޔާބެއް ނުވި އެވެ.

ދެ ވަނަ ހާފު ފަށައިގެން ހަ ވަނަ މިނެޓުގައި ހޫގޯ އެކިޓީކޭ ވަނީ ލިވަޕޫލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އޭގެ ތިން މިނެޓު ފަހުން ރަޔާން ގްރަވެންބާކް ވަނީ ލިވަޕޫލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. އަދި މެޗުގައި ލިވަޕޫލްގެ ފަހު ލަނޑު 62 ވަނަ މިނެޓުގައި ޖެހީ ޞަލާޙު އެވެ.

މޮޅާ އެކު ލިވަޕޫލް އިން މުބާރާތުގެ ކުއާޓާ ފައިނަލްގެ ފުރުސަތު ހޯދީ، އެގްރިގޭޓް ނަތީޖާ 4-1 އިންނެވެ. މުބާރާތުގެ ކުއާޓާ ފައިނަލްގައި ލިވަޕޫލް ނިކުންނަން ޖެހެނީ އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށެވެ.