ނިއުކާސަލް ކޮޅަށް ހަތް ލަނޑު ޖަހައި، ބާސެލޯނާ ކުއާޓާ ފައިނަލް އަށް

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ނިއުކާސަލް ޔުނައިޓެޑު ކޮޅަށް ހަތް ލަނޑު ޖަހައިގެން، ބާސެލޯނާ އިން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ.

މިދިޔަ ހަފުތާގެ ތެރޭގައި ނިއުކާސަލްގެ އަމިއްލަ ދަނޑުގައި މި ދެ ޓީމު ބައްދަލު ކުރި މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. އެހެންވެ، ކުއާޓާ ފައިނަލްގެ ފުރުސަތު އޮތީ ބާސެލޯނާގެ އަމިއްލަ ދަނޑުގައި ކުޅޭ ދެ ވަނަ ލެގުން މޮޅުވާ ޓީމަކަށެވެ. ބުދަ ދުވަހުގެ ރޭ ކުޅުނު ދެ ވަނަ ލެގުގައި ބާސެލޯނާ އިން ވަނީ 7-2 އިން ނިއުކާސަލް ބަލިކޮށްފަ އެވެ.

މެޗުގައި ބާސެލޯނާ އިން ދެ ފަހަރެއްގެ މަތިން ލީޑު ނެގިއިރު ވެސް، ނިއުކާސަލް އިން ނަތީޖާ ހަމަހަމަ ކުރި އެވެ. ނަމަވެސް، އިތުރު ފަސް ލަނޑު ޖަހައިގެން ބާސެލޯނާ ވަނީ މެޗުން މޮޅުވެފަ އެވެ. 

މެޗު ފަށައިގެން ހަ ވަނަ މިނެޓުގައި ބާސެލޯނާ އަށް ލީޑު ނަގައިދިނީ ރަފީނިއާ އެވެ. ނަމަވެސް، މެޗުގެ 15 ވަނަ މިނެޓުގައި އެންތަނީ އެލަންގާ ވަނީ ނިއުކާސަލް އަށް ނަތީޖާ ހަމަހަމަ ކޮށްދީފަ އެވެ. އޭގެ ތިން މިނެޓު ފަހުން ދެ ވަނަ ފަހަރަށް ބާސެލޯނާ އަށް ލީޑު ނަގައިދިނީ މާކް ބާނެލް އެވެ. ނަމަވެސް، 28 ވަނަ މިނެޓުގައި އެލަންގާ ވަނީ ދެ ވަނަ ލަނޑެއް ވެސް ޖަހައި ނިއުކާސަލް އަށް ނަތީޖާ ހަމަހަމަ ކޮށްފަ އެވެ.

ފުރަތަމަ ހާފުގެ އިތުރު ވަގުތުގައި ބާސެލޯނާ އަށް ލިބުނު ޕެނަލްޓީ ކާމިޔާބުކޮށް، ތިން ވަނަ ފަހަރަށް ލީޑު ނަގައިދިނީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް އެވެ. އޭގެ ފަހުން ދެ ވަނަ ހާފު ފަށައިގެން ހަ ވަނަ މިނެޓުގައި ފާމިން ލޮޕޭޒް ވަނީ ބާސެލޯނާގެ ހަތަރު ވަނަ ލަނޑު ޖަހައިފަ އެވެ. އޭގެ ފަސް މިނެޓު ފަހުން ބާސެލޯނާގެ ފަސް ވަނަ ލަނޑު ޖެހީ ރޮބާޓް ލެވަންޑޯސްކީ އެވެ.

އޭގެ ފަހުން މެޗުގެ 61 ވަނަ މިނެޓުގައި ލެވަންޑޯސްކީ ވަނީ ބާސެލޯނާގެ ހަ ވަނަ ލަނޑު ވެސް ޖަހައިފަ އެވެ. އަދި މެޗުގައި ބާސެލޯނާގެ ފަހު ލަނޑު 72 ވަނަ މިނެޓުގައި ޖެހީ ރަފީނިއާ އެވެ.

މޮޅާ އެކު ބާސެލޯނާ އިން ވަނީ 8-3 ގެ އެގްރިގޭޓް ނަތީޖާ އަކުން މުބާރާތުގެ ކުއާޓާ ފައިނަލްގެ ފުރުސަތު ހޯދައިފަ އެވެ. ކުއާޓާ ފައިނަލްގައި ބާސެލޯނާ ނިކުންނަން ޖެހެނީ އެތުލެޓިކޯ މެޑްރިޑާ ދެކޮޅަށެވެ.