އެމެރިކާ އާއި އީރާންއާ ދެމެދު 45 ދުވަހުގެ ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރަން ބާރު އަޅަނީ

އެމެރިކާ އާއި އީރާންއާ ދެމެދު 45 ދުވަހުގެ މުއްދަތަކަށް ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރުމަށް، މެދުވެރިން މަޝްވަރާ ކުރަމުން އަންނަ ކަމަށް މީޑިއާ ތަކުގައި ބުނެފި އެވެ. 

އެކްސިއޯސް އިން އާދީއްތަ ދުވަހު ކޮށްފައިވާ ރިޕޯޓެއްގައި ބުނެފައި ވަނީ، 45 ދުވަހުގެ އެ ހުއްޓުމުގެ މަޤުސަދަކީ ދާއިމީ ގޮތެއްގައި ހަނގުރާމަ ހުއްޓާލުމަށް މަގު ފަހި ކުރުމެވެ. 

މި ރިޕޯޓުގައި ބުނެފައި ވަނީ އެމެރިކާ އާއި އިޒްރޭލް އަދި ސަރަހައްދީ ހަތަރު މަސްދަރުން މައުލޫމާތު ހިއްސާ ކޮށްފައިވާ ކަމަށެވެ. ނަމަވެސް، ރޮއިޓާސް އިން މި މައުލޫމާތު ވަގުތުން ކަށަވަރު ކުރެވިފައި ނުވާ ކަމަށް ބުނެފައިވެ އެވެ. އެމެރިކާގެ ރިޔާސީ ގަނޑުވަރު ވައިޓް ހައުސް އާއި، އެމެރިކާގެ ސްޓޭޓް ޑިޕާޓްމަންޓް އިން ރޮއިޓާސްގެ ސުވާލު ތަކަށް ވަގުތުން ޖަވާބެއް ދީފައި ނުވެ އެވެ. 

މެދުވެރިން މަޝްވަރާ ކުރަމުން ދަނީ ދެ ބަޔަކަށް ބެހިފައިވާ އެއްބަސްވުމެއްގެ ތަފްސީލުތަކާ ގުޅޭ ގޮތުން ކަމަށް ވެސް ރިޕޯޓުގައި ބުނެފައިވެ އެވެ. ފުރަތަމަ ބުރުގައި 45 ދުވަހުގެ މުއްދަތަކަށް ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރުމަށް މަސައްކަތް ކުރަމުން އަންނަ ކަމަށާއި، އެ މުއްދަތުގެ ތެރޭގައި ދާއިމީ ގޮތެއްގައި ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރުމަށް މަޝްވަރާ ކުރުމަށް ހިމަނާފައިވާ ކަމަށް ބުނެފައިވެ އެވެ. 

ދެ ވަނަ ބުރުގައި ހަނގުރާމަ ނިންމުމާާ ގުޅޭ އެއްބަސްވުމަކަށް އައުމަށް މަސައްކަތް ކުރާނެ ކަމަށް ވެސް ރިޕޯޓުގައި ބުނެފައިވެ އެވެ. މަޝްވަރާ ތަކަށް އިތުރު ވަގުތު ބޭނުންވެއްޖެ ނަމަ، ހުއްޓުވުމުގެ މުއްދަތު އިތުރު ކުރެވިދާނެ ކަމަށް ވެސް ރިޕޯޓު ކޮށްފައިވެ އެވެ. މިފަދަ ރިޕޯޓެއް އައިސްފައިވާއިރު، ޕާކިސްތާން އިން އިސްވެ އޮވެ އަންނަނީ އެމެރިކާ އާއި އީރާންއާ ދެމެދު މެސެޖު ބަދަލު ކުރަމުންނެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފަށާފައި ވަނީ މިދިޔަ ފެބްރުވަރީ މަހުގެ 28 ވަނަ ދުވަހު އެވެ. މި ހަނގުރާމައިގެ ސަބަބުން ސަރަހައްދުގެ މަސްރަހު ވަރަށް ބޮޑަށް ގޯސްވެފައިވާއިރު، މި ހަނގުރާމަ ހުއްޓާލުމަށް ބައިނަލްއަޤުވާމީ މުޖުތަމައުން އަންނަނީ ބާރު އަޅަމުންނެވެ.