ދެ ދުވަސް ވަންދެން އީރާންގެ ސިފައިންނަށް ފިލައިގެން އުޅުނު އެމެރިކާގެ އަސްކަރީ ބޯޓުގެ ފަޅުވެރިޔާ ސަލާމަތް ކޮށްފި

މިދިޔަ ހުކުރު ދުވަހު އީރާންގެ ސަރަހައްދަކަށް އެމެރިކާގެ އަސްކަރީ ބޯޓެއް ވައްޓާލުމާ ގުޅިގެން ގެއްލުނު ފަޅުވެރިޔާ ދެ ދުވަސް ވަންދެން އީރާންގެ ސިފައިންނަށް ފިލައިގެން އުޅެފައިވާ ކަމަށާއި، އެމެރިކާގެ އަސްކަރިއްޔާ އިން ހިންގި އޮޕަރޭޝަނެއްގައި އެ މީހާ ސަލާމަތް ކޮށްފައިވާ ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

އެގޮތުން ޓްރަމްޕް ވިދާޅުވީ ސަލާމަތް ކުރި ފަޅުވެރިޔާ އަށް ބައެއް ކަހަލަ އަނިޔާ ތަކެއް ލިބިފައި ވީ ނަމަވެސް، އޭނާގެ ޙާލު މިހާރު ރަނގަޅު ކަމަށެވެ. މި ހާދިސާ ހިނގާފައި ވަނީ މިދިޔަ ހުކުރު ދުވަހު އެމެރިކާގެ އެފް-15 އީ މަރުކާގެ ބޯޓު އީރާންގެ ސަރަހައްދަށް ވެއްޓުމާ ގުޅިގެންނެވެ. ބޯޓު ވެއްޓުނު ވަގުތުން ފެށިގެން އެ ފަޅުވެރިޔާ ވަނީ އީރާންގެ ސިފައިންގެ އަތް ދަށަށް ނުގޮސް ސަލާމަތްވުމަށްޓަކައި އެ ސަރަަހައްދުގެ ފަރުބަދަ ތަކުގެ މަތީގައި ދެ ދުވަސް ހޭދަ ކޮށްފައި ކަމަށް ބުނެފައިވެ އެވެ.

އެ އޮޕަރޭޝަންއާ ގުޅޭ އިތުރު ތަފްސީލު ދެއްވަމުން ޓްރަމްޕް ވިދާޅުވީ، އެމެރިކާގެ ސިފައިން ދެއްކި ހިތްވަރާއި ހުށަޔާރު ކަމަށްޓަކައި ފަޚުރުވެރިވާ ކަމަށެވެ. އަދި ގެއްލުނު ފަޅުވެރިޔާ ސަލާމަތުން އެނބުރި އައުމަކީ ލިބުނު ވަރަށް ބޮޑު ކާމިޔާބީއެއްގެ ގޮތުގައި ޓްރަމްޕް ވަނީ ސިފަ ކުރައްވައިފަ އެވެ. މި ހާދިސާއާ ގުޅިގެން އީރާން އާއި އެމެރިކާގެ މަސްރަހު އިތުރަށް ގޯސްވެފައިވާއިރު، މި އޮޕަރޭޝަން ކުރިއަށް ގެންގޮސްފައި ވަނީ ވަރަށް ނުރައްކާތެރި ޙާލަތެއްގެ ތެރޭގަ އެވެ. 

އެމެރިކާގެ އަސްކަރިއްޔާ އިން ބުނެފައި ވަނީ، ބޯޓު ވެއްޓެން މެދުވެރިވި ސަބަބު މިހާރު ތަހުގީގު ކުރަމުންދާ ކަމަށެވެ. ނަމަވެސް، މި ހާދިސާއާ ގުޅޭ އިތުރު ތަފްސީލީ މައުލޫމާތެއް މިހާތަނަށް ރަސްމީ އިދާރާ ތަކުން ހާމަ ކޮށްފައި ނުވެ އެވެ. ސަލާމަތް ކުރި ފަޅުވެރިޔާ އަށް މިހާރު ގެންދަނީ އަސްކަރިއްޔާގެ ބެލުމުގެ ދަށުން ފަރުވާ ދެމުންނެވެ.