ޓްރަމްޕް އަކީ މޮޔަ މީހެއް ކަމަށާއި، އޭނާގެ އަމަލުތައް ހުއްޓުވުމަށް އދ އާއި މެދު އިރުމަތީގެ ޤައުމު ތަކަށް ގޮވާލައިފި

އެމެރިކާގެ ރައީސް ޑޮނަލްޑް ޓްރަމްޕް އަކީ މޮޔަ މީހެއް ކަމަށާއި، އޭނާގެ އަމަލުތައް ހުއްޓުވުމަށް އެޓޮމިކް ހަކަތައާ ބެހޭ ބައިނަލްއަޤުވާމީ އެޖެންސީ (އައިއޭއީއޭ)ގެ ކުރީގެ ޑިރެކްޓަރ ޖެނަރަލް މުޙަައްމަދު އެލްބަރާޑީ ގޮވާލައްވައިފި އެވެ. 

ސޯޝަލް މީޑިއާގައި ކުރެއްވި ޕޯސްޓެއްގައި އެލްބަރާޑީ މިހެން ގޮވާލައްވާފައި ވަނީ، އދ. އާއި މެދު އިރުމަތީގެ ޤައުމު ތަކަށެވެ. އެ ޕޯސްޓުގައި އެލްބަރާޑީ ވިދާޅުވީ، ޓްރަމްޕް އަކީ މޮޔަ މީހެއް ކަމަށާއި، އޭނާ މުޅި ސަރަހައްދު އަލިފާން ގަނޑަކަށް ބަދަލު ކޮށްލުމުގެ ކުރިން އެކަން ހުއްޓުވުމަށް މެދު އިރުމަތީގެ ޤައުމު ތަކާއި، އެ ޤައުމު ތަކުގެ ބާރުގެ ދަށުގައިވާ ފަރާތް ތަކުން މަސައްކަތް ކުރަން ޖެހޭ ކަމަށެވެ. އޭނާ ފާހަގަ ކުރެއްވި ގޮތުގައި ޓްރަމްޕްގެ ސިޔާސަތު ތަކުގެ ސަބަބުން މުޅި ސަރަހައްދުގެ ހަަމަޖެހުން ގެއްލިދާނެ ކަމުގެ ބިރު އެބަ އޮތެވެ. 

މީގެ އިތުރުން އދ. އަށް ކުރެއްވި އެހެން ޕޯސްޓެއްގައި އެލްބަރާޑީ ވަނީ، "މޮޔަ" ޓްރަމްޕްގެ އަމަލުތައް ހުއްޓުވުމަށް ކުރެވޭނެ އެއްވެސް ކަމެއް ނެއްތޯ އައްސަވައިފަ އެވެ. އެއާ އެކު އޭނާ ވަނީ، މިއީ ނުރައްކާތެރި ދަނޑިވަޅެއް ކަަމަށް ފާހަގަ ކުރައްވައި، މި ދަނޑިވަޅުގައި ބައިނަލްއަޤުވާމީ މުޖުތަމައުން ހިމޭނުން ނުތިބުމަށް ވެސް ގޮވާލައްވައިފަ އެވެ. 

2003 ވަނަ އަހަރު އެމެރިކާ އިން އިރާގަށް އެރި ސަބަބުތަކާ މެދު ސުވާލު އުފައްދަވާފައިވާ އެލްބަރާޑީ ވިދާޅުވީ، ޓްރަމްޕް އީރާންއާ ދެކޮޅަށް ފައްޓަވައިގެން އުޅުއްވާ ހަނގުރާމަ އަކީ އެއްވެސް މަޖުބޫރު ކަމެއް ނެތި އަދި އަމިއްލަ އަށް އިޚުތިޔާރު ކުރި ހަނގުރާމައެއް ކަމަށެވެ. އަދި މިފަދަ ހަނގުރާމައެއްގެ ސަބަބުން ކުރިމަތި ވާނެ ގެއްލުންތައް އިންތިހާ އަށް ބޮޑު ވާނެ ކަމުގެ އިންޒާރު ވެސް އޭނާ ވަނީ ދެއްވައިފަ އެވެ. 

އީރާންގެ ފަރާތުން އެމެރިކާ އަށް ވަގުތުން ކުރިމަތި ވެދާނެ ނުރައްކަލެއް އޮތް ކަމަށް ބުނެ ޓްރަމްޕްގެ ސަރުކާރުން ދައްކާ ވާހަކަ ތަކަށް ރައްދު ދެއްވަމުން އެލްބަރާޑީ ވިދާޅުވީ، އެފަދަ ނުރައްކަލެއް އޮތް ކަމުގެ އެއްވެސް ހެއްކެއް މިހާތަކަށް އެމެރިކާ އަށް ދެއްކިފައި ނުވާ ކަމަށެވެ. އެހެންކަމުން، އެއްވެސް އަސާސެއް ނެތް ކަންކަމުގެ މައްޗަށް ބިނާކޮށް ސަރަހައްދީ ހަނގުރާމަ އަކަށް މަގު ފަހިވާ ފަދަ ފިޔަވަޅުތައް ނޭޅުމަށް ވެސް އޭނާ ވަނީ ގޮވާލައްވައިފަ އެވެ.