48 ގަޑިއިރުގެ ތެރޭގައި އެއްބަސްވުމަކަށް އަތު ނުވެއްޖެ ނަމަ، އީރާން ޖެހޭނީ ނަރަކައާ ކުތިމަތިލާން: ޓްރަމްޕް

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގެ ސަބަބުން، އީރާން އިން ހޮރްމޫޒް ކަނޑު އޮޅި ބަންދު ކޮށްފައިވާއިރު ކުރިއަށް އޮތް 48 ގަޑިއިރުގެ ތެރޭގައި އެއްބަސްވުމަަކަށް އަތު ނުވެއްޖެ ނަމަ ވަރުގަދަ ހަމަލާ ތަކެއް ދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ. 

ހޮނިހިރު ދުވަހު ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ހޮރްމޫޒް ކަނޑު އޮޅި ހުޅުވާލުމަށް ނުވަތަ އެއްބަސްވުމަކަށް އައުމަށް މީގެ ކުރިން އީރާން އަށް 10 ދުވަހުގެ މުއްދަތެއް ދިންކަން ހަނދާން ހުރިތޯ އެވެ. މިހާރު ވަގުތު ކުޑަތަން ވަމުން އަންނަ ކަމަށާއި، އީރާން އަށް ދީފައިވާ މުހުލަތު ހަމަވާން ބާކީ އޮތީ 48 ގަޑިއިރު ކަމަށް ވެސް ޓްރަމްޕް ވިދާޅުވި އެވެ. 

މި މުއްދަތު ހަމަވުމާ އެކު، އީރާން އިން "ނަރަކައިގެ" ބިރުވެރިކަމާ ކުރިމަތިލާން ޖެހޭނެ ކަމަށް ޓްރަމްޕް ވިދާޅުވި އެވެ. މިއީ ޓްރަމްޕް އީރާން އަށް ދެއްވި ވަރުގަދަ އިންޒާރެއްގެ ގޮތުގައި ފާހަގަވާއިރު، މީގެ ކުރިން ވެސް ޓްރަމްޕް ވަނީ މިފަދަ އެތައް އިންޒާރު ތަކެއް ދެއްވައިފަ އެވެ.

ނިމުނު މާޗު މަހުގެ 21 ވަނަ ދުވަހު ޓްރަމްޕް ވަނީ، ހޮރްމޫޒް ކަނޑު އޮޅި ހުޅުވުމަށް އީރާން އަށް އޮތީ 48 ގަޑިއިރު ކަމަށް ވިދާޅުވެފަ އެވެ. އެ މުއްދަތުގެ ތެރޭގައި އީރާން އިން އެކަން ނުކޮށްފި ނަމަ، ވަރަށް ވަރުގަދަ ހަމަލާ ތަކެއް ދޭނެ ކަމުގެ އިންޒާރު ޓްރަމްޕް ދެއްވި އެވެ.  ނަމަވެސް އޭގެ ދެ ދުވަސް ފަހުން ޓްރަމްޕް ވަނީ، ހަމަލާ ދިނުމުގެ ވިސްނުން ދޫކޮށްލައްވާފައިވާ ކަމަށާއި، އީރާން އާއެކު ރަނގަޅު މަޝްވަރާ ތަކެއް ކުރެވެމުން އަންނަ ކަމަށް ވިދާޅުވެފަ އެވެ. 

އޭރު ޓްރަމްޕް ވިދާޅުވެފައި ވަނީ އީރާން އާއެކު ކުރަމުން އަންނަ މަޝްވަރާ ތަކުގެ ނަތީޖާ ވެސް ރަނގަޅު ކަމަށެވެ. ނަމަވެސް، އެމެރިކާ އާއެކު ސީދާ މަޝްވަރާ ތަކެއް ނުކުރެވޭ ކަމަށް އީރާން އިން ބުނެފައިވެ އެވެ. އޭގެ ބަދަލުގައި ޕާކިސްތާން މެދުވެރި ވެގެން މެސެޖު ބަދަލު ކުރެވެމުން އަންނަ ކަމަށް ފާހަގަ ކޮށްފައިވެ އެވެ. އޭރު ވެސް އީރާން އަށް ހަމަލާ ދޭނެ ކަމުގެ އިންޒާރު ޓްރަމްޕް ދެއްވި ނަމަވެސް، ފަހުން ވަނީ އެކަން ބަދަލު ކުރައްވައިފަ އެވެ. 

އޭގެ ފަހުން އަނެއްކާ ވެސް ޓްރަމްޕް އީރާން އަށް މުހުލަތެއް ދީފައިވާއިރު، އެ ވަގުތު ހަމަވާނީ ހޯމަ ދުވަހުގެ ރޭ އެވެ.