ކުރިއަށް އޮތް ތަނުގައި އެމެރިކާ އާއި އިޒްރޭލް އަށް ބޮޑު ހައިރާން ކަމެއް ލިބިގެން ދާނެ ކަމަށް އީރާން އިން ބުނެފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި، އީރާން އިން ކުރިއަށް ދަނީ އެ ޤައުމުގެ ރޭވުންތަކާ އެއްގޮތަށް ކަނޑައެޅިފައިވާ ވަކި އަމާޒު ތަކަކަށް ކަމަށާއި، އެމެރިކާ އާއި އިޒްރޭލް އަށް ސިއްސައިގެންދާ ފަދަ ބޮޑު ހައިރާން ކަމެއް ކުރިއަށް އޮތް ތަނުގައި ފެންނާނެ ކަމުގެ އިންޒާރު އީރާންގެ ސަލާމަތީ އޮފިޝަލަކު ދެއްވައިފި އެވެ. 

އީރާންގެ ފާސް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، އެ އޮފިޝަލު  ވިދާޅުވީ އެމެރިކާ އިން ހަމަލާ ދިނުމަށް ކަނޑައަޅާފައިވާ އަމާޒު ތަކަކީ ކުށް ހީތަކެއްގެ މައްވަށް ބިނާވެފައިވާ ނުބައި އަމާޒު ތަކެކެވެ. އަދި އީރާންގެ ފާލަން ތަކަށް ހަމަލާ ދޭނެ ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް ދެއްވާފައިވާ އިންޒާރު ތަކަކީ، ވަރަށް ހެއްވާ އަދި މަޖާ ވާހަކަ ތަކެއްގެ ގޮތުގައި އޭނާ ވަނީ ސިފަ ކުރައްވައިފަ އެވެ.

އެގޮތުން އެ އޮފިޝަލް ވިދާޅުވީ އެމެރިކާގެ ރައީސް ޓްރަމްޕްގެ މި ވާހަކަ ތަކަކީ އެމެރިކާގެ އަސްކަރީ އޮޕަރޭޝަންތައް ނާކާމިޔާބުވުމާއި، އެމެރިކާގެ ހަނގުރާމަ މަތީ ބޯޓުތައް ވައްޓާލުމާ ގުޅިގެން ދައްކާފައިވާ ވާހަކަ ތަކެއް ކަމަށެވެ. 

އެމެރިކާ އާއި އިޒްރޭލް އަށް އަމާޒުކޮށް އޮފިޝަލް ވިދާޅުވީ، އެ ދެ ޤައުމަށް ދޭނެ ވަރަށް ބޮޑު ހައިރާން ކަމެއް އީރާންގެ އަތުގައި އޮތް ކަަމަށާއި، އެކަން ފެނުމަށް ދެން ނަގާނީ ކުޑަ ކުޑަ ވަގުތު ކޮޅެއް ކަމަށެވެ. އަދި އީރާންގެ ދެކުނުގެ ސަރަހައްދު ތަކުގައި އެމެރިކާ އާއި އިޒްރޭލް އިން އަމަލު ކުރަމުންދާ ގޮތުގެ ސަބަބުން، ކަންކަން ހިނަގާނެ ވަގުތު އީރާން އަށް ފައިދާވާ ގޮތަށް ބަދަލުވެގެންދާ ކަމަށް ވެސް އޭނާ ފާހަގަ ކުރެއްވި އެވެ. 

މީގެ އިތުރުން އޭނާ ވިދާޅުވީ ކުރިމަތިލުން ތަކުގައި ދުޝްމަނުން ވަރުބަލި ކޮށްލާނެ ގޮތް އީރާން އަށް ވަރަށް ރަނގަޅަށް ދަސްވެފައިވާ ކަމަށެވެ. އަދި ސާފު، އަވަސް، ފަސޭހަ ހަމަލާ ތަކެއް ދިނުމަށް އެމެރިކާ އިން ގެންގުޅޭ ސިޔާސަތު މިހާރު ނާކާމިޔާބު ވެފައިވާ ކަމަށް ވެސް އެ އޮފިޝަލް ވަނީ ވިދާޅުވެފަ އެވެ. 

މި ބަޔާނަކީ މެދު އިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގައި، އެމެރިކާ އާއި އިޒްރޭލްގެ އަސްކަރީ ހަރަކާތް ތަކަށް ރައްދު ދިނުމުގެ ގޮތުން އީރާން އިން ދީފައިވާ ވަރުގަދަ އިންޒާރެކެވެ. އީރާން އިން ބުނަމުން ދަނީ އެ ޤައުމުގެ ދިފާއީ ބާރުތައް އޮތީ ކޮންމެ ފަދަ ޙާލަތަކަށް ވެސް ތައްޔާރަށް ކަމަށެވެ.