އީރާންގެ ފާލަންތަކާއި އިންޖީނުގެ ތަކަށް ހަމަލާ ދޭނެ ކަމުގެ އިންޒާރު ޓްރަމްޕް ދެއްވައިފި

އީރާންގެ އުމްރާނީ ވަސީލަތްތަކަށް އަމާޒުކޮށް އެމެރިކާ އިން ދެމުން އަންނަ ހަމަލާތައް އިތުރަށް ވަރުގަދަކޮށް، އެ ޤައުމުގެ ާލަންތަކާއި އިންޖީނުގެތައް ހަލާކުކޮށްލާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ. 

ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާންގައި ބާކީ ހުރި ތަންތަން ހަލާކު ކޮށްލުމުގެ މަސައްކަތް އެމެރިކާގެ އަސްކަރިއްޔާ އިން އަދި ރަނގަޅަށް ފަށާފައި ވެސް ނުވާ ކަމަށެވެ. 

ޓްރަމްޕް ވިދާޅުވި ގޮތުގައި ދެން އެމެރިކާގެ އަމާޒަކަށް ވާނީ އީރާންގެ ފާލަންތައް ކަމަށެވެ. އަދި އޭގެ ފަހުން އެ ޤައުމުގެ ކަރަންޓު އުފައްދާ މަރުކަޒު ތަކަށް ނުވަތަ، އިންޖީނުގެ ގެތަކަށް ހަމަލާ ދޭނެ ކަމަށް ވެސް އޭނާ ވިދާޅުވި އެވެ. އީރާންގެ ވެރިން ކުރަން ޖެހޭ ކަންކަން އެ ބޭފުޅުންނަށް އެނގިވަޑައި ގަންނަވާ ކަމަށާއި، އެކަންކަން ވަރަށް އަވަހަށް ކުރަން ޖެހޭނެ ކަމަށް ވެސް ޓްރަމްޕް ވަނީ ވިދާޅުވި އެވެ. 

މިދިޔަ ބުދަ ދުވަހު ޤައުމާ މުޚާތަބު ކުރައްވައި ދެއްވި ތަޤުރީރުގައި ޓްރަމްޕް ވިދާޅުވީ، އެމެރިކާ އިން ބޭނުންވާ ޝަރުތު ތަކަށް އީރާން އިން އެއްބަސް ނުވާ ނަމަ، ކުރިއަށް އޮތް ދެ ހަފުތާއެއްހާ ދުވަހުގެ ތެރޭގައި އީރާން އަށް ވަރުގަދަ ހަމަލާ ތަކެއް ދޭނެ ކަމަށެވެ. އަދި އީރާންގެ ހަކަތައާ ބެހޭ ވަސީލަތްތަކާއި، ތެލުގެ އުމްރާނީ ވަސީލަތް ތަކަށް ހަމަލާދީ، އެ ޤައުމު އެންމެ ނުރައްކާތެރި ޒަމާނަކަށް ދުއްވާލާނެ ކަމުގެ އިންޒާރު ޓްރަމްޕް ދެއްވާފައިވެ އެވެ. 

ޓްރަމްޕްގެ މި އިންޒާރުތަކާ ގުޅިގެން ބައިނަލްއަޤުވާމީ މުޖުތަމައުން އަންނަނީ ގިނަ ކަންބޮޑުވުން ތަކެއް ފާޅު ކުރަމުންނެވެ. ޚާއްސަކޮށް އެމެރިކާގެ ޤާނޫނީ މާހިރުން ތަކެއް ސޮއިކޮށް ނެރެފައިވާ ބަޔާނެއްގައި ބުނެފައި ވަނީ، އީރާންގެ އާންމު ޚިދުމަތް ތަކަށް އަމާޒުކޮށް އެމެރިކާ އިން ދޭ ހަމަލާ ތަކަކީ ހަނގުރާމައިގެ ކުށަކަށް ވެދާނެ ކަމަށެވެ. 

އެމެރިކާ އާއި އިޒްރޭލް އެކުވެގެން އީރާންއާ ދެކޮޅަށް ހަމަލާތައް ދޭން ފަށާފައި ވަނީ މިދިޔަ ފެބްރުވަރީ މަހުގެ 28 ވަނަ ދުވަހު އެވެ. މި ހަމަލާ ތަކުގެ ރައްދުގައި އީރާން އިން ވެސް އަންނަނީ އެމެރިކާ އާއި އިޒްރޭލްގެ އަމާޒު ތަކަށް ގިނަ ހަމަލާ ތަކެއް ދެމުންނެވެ.