އީރާނުގެ ހަނގުރާމައާ ގުޅޭ ގޮތުން ޕުޓިން އާއި ވަލީ އަހުދު މުޙައްމަދު މަޝްވަރާ ކުރައްވައިފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައާ ގުޅޭ ގޮތުން، ރަޝިޔާގެ ރައީސް ވްލަޑިމިއަރ ޕުޓިން އާއި ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން މަޝްވަރާ ކުރައްވައިފި އެވެ. 

ޕުޓިން އާއި ވަލީ އަހުދު މުޙައްމަދު މަޝްވަރާ ކުރައްވާފައި ވަނީ ބުރާސްފަތި ދުވަހު އެވެ. އެކަމާ ގުޅޭ ގޮތުން ރަޝިޔާގެ ރިޔާސީ ގަނޑުވަރު ކްރެމްލިން އިން ނެރުނު ބަޔާނެއްގައި ބުނެފައި ވަނީ، ދެ ބޭފުޅުންގެ މަޝްވަރާގައި ސަރަހައްދީ މަސްރަހަށް އަންނަމުންދާ ބަދަލު ތަކަށް ބޮޑު އިސްކަމެއް ދެއްވި ކަމަށެވެ. 

ކްރެމްލިންގެ ބަޔާނުގައި ފާހަގަ ކޮށްފައިވާ ގޮތުގައި، މެދު އިރުމަތީގެ އަސްކަރީ އަދި ސިޔާސީ މަޝްރަހު ގޯސްވަމުންދާތީ އާއި، އާންމުންގެ ފުރާނަ ގެއްލި، އިސްތިރާޖީ ގޮތުން މުހިންމު އުމްރާނީ ވަސީލަތްތައް ހަލާކުވަމުން ދާތީ ދެ ބޭފުޅުން ވަނީ ނުހަނު ބޮޑަށް ކަންބޮޑުވުން ފާޅު ކުރައްވައިފަ އެވެ. މި ހަމަ ނުޖެހުން ތަކުގެ ސަބަބުން ސަރަހައްދީ ހަމަޖެހުމަށް ބޮޑެތި ގޮންޖެހުންތައް ކުރިމަތިވަމުންދާކަން ދެ ޤައުމުގެ ވެރިން ވެސް ފާހަގަ ކުރެއްވި އެވެ. 

މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ދިން ހަމަލާތަކާ ގުޅިގެން ފެށިފައިވާ ހަނގުރާމަ ވަގުތުން ހުއްޓާލުމަށް ވެސް، ޕުޓިން އާއި ވަލީ އަހުދު މުޙައްމަދު ވަނީ ބާރު އަޅުއްވައިފަ އެވެ. އަދި މި މައްސަލަ އަށް ސުލްހަވެރި ހައްލެއް ހޯދުމަށްޓަކައި ޑިޕްލޮމެޓިކް މަސައްކަތްތައް މިހާރަށް ވުރެ ބޮޑަށް ވަރުގަދަ ކުރަން ޖެހޭ ކަމަށް ވެސް، ކްރެމްލިންގެ ބަޔާނުގައި ބުނެފައިވެ އެވެ. 

މީގެ އިތުރުން މި ހަމަނުޖެހުން ތަކުގެ ސަބަބުން ހަކަތަ އުފެއްދުމަށާއި އުފުލުމަށް ކުރިމަތިވަމުންދާ ހުރަސް ތަކަކީ ދުނިޔޭގެ ހަކަތައިގެ ރައްކާތެރި ކަމަށް އޮތް ނުރައްކަލެއް ކަމަށް ޕުޓިން އާއި ވަލީ އަހުދު މުޙައްމަދު ވެސް ވަނީ ފާހަގަ ކުރައްވައިފަ އެވެ. މި މޭރުމުން ވާހަކަ ދައްކަވަމުން، ދުނިޔޭގެ ތެލުގެ ބާޒާރު ހަމައަކަށް އެޅުވުމަށްޓަކައި ރަޝިޔާ އާއި ސައުދީ އަރަބިއްޔާ ގުޅިގެން އޯޕެކް ޕްލަސް އިއްތިހާދުގެ ތެރެއިން ކުރަމުންދާ މަސައްކަތް ތަކުގެ ތެރެއިން ކުރަމުންދާ މަސައްކަތް ތަކުގެ މުހިންމުކަން ދެ ބޭފުޅުން ވެސް ފާހަގަ ކުރެއްވި އެވެ. 

ކްރެމްލިން އިން އިތުރަށް ބުނި ގޮތުގައި، ދުނިޔޭގެ އިޤްތިޞާދީ ހަމަޖެހުމަށްޓަކައި ތެލުގެ ބާޒާރުގައި ދެ ޤައުމުގެ ދެ މެދުގައި އޮތް ގުޅުން ދެމެހެއްޓުމަށް ދެ ބޭފުޅުން ވެސް ވަނީ އެއްބަސްވެ ވަޑައިގެންފަ އެވެ. މި ފޯނު ކޯލަކީ މެދު އިރުމަތީގެ މަސްރަހު ނުތަނަވަސްވެފައިވާ ދަނޑިވަޅެއްގައި، ދުނިޔޭގެ ހަކަތައިގެ ބާޒާރުގައި ނުފޫޒު ގަދަ ދެ ޤައުމެއްގެ ދެ މެދުގައި ކުރެވިފައިވާ މުހިންމު މަޝްވަރާ ތަކެކެވެ.