ކޮންމެ ފަދަ ހަމަލާ އަކަށް ވެސް ތައްޔާރުވެ ތިބުމަށް، އީރާންގެ އަސްކަރިއްޔާ އަށް އަންގައިފި

ދުޝްމަނުންގެ ޙަރަކާތްތައް އެންމެ ފުރިހަމަ ގޮތުގައި ބަލަން ޖެހޭ ކަމަށާއި، ކޮންމެ ފަދަ ހަމަލާ އަކަށް ވެސް ރައްދު ދިނުމަށް ފުރިހަމަ އަށް ތައްޔާރުވެ ތިބެން ޖެހޭ ކަމަށް އީރާންގެ ސިފައިންގެ އެންމެ އިސް ކޮމާންޑަރު އަމީރު ޙާތަމީ ވިދާޅުވެއްޖެ އެވެ. 

ޙާތަމީގެ ވާހަކަ ބުރާސްފަތި ދުވަހު ރިޕޯޓު ކޮށްފައި ވަނީ އީރާނުގެ ސަރުކާރުގެ މީޑިއާ ތަކުންނެވެ. 

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ، އީރާންއާ ދެކޮޅަށް ކުރަމުންދާ ހަނގުރާމަ ނިމުމަކަށް ގާތްވަމުން އަންނަ ކަމަަށާއި، އެ މައްސަލަ ކުރިއަށް އޮތް ހަފުތާގެ ތެރޭގައި ނިމިދާނެ ކަމަށެވެ. ނަމަވެސް، ގަލްފު ސަރަހައްދަށް އެމެރިކާ އިތުރު ސިފައިން ފޮނުވަމުން އަންނައިރު، ބިމުގައި އޮޕަރޭޝަން ހިންގުމަށް ތައްޔާރުވަމުންދާ ކަމަށް ބުނެ، ބައެއް ފަރާތްތަކުން ވަނީ ކަންބޮޑުވުން ފާޅު ކޮށްފަ އެވެ. 

ޙާތަމީގެ ވާހަކަ ރިޕޯޓު ކުރަމުން ސަރުކާރުގެ މީޑިއާ އިން ބުނެފައި ވަނީ، ދުޝްމަނުން ބިމުގައި އޮޕަރޭޝަން ހިންގައި މަސައްކަތް ކުރާ ނަމަ، ދުޝްމަނުންގެ އެއްވެސް ސިފައިންގެ މީހަކަށް ދިރިހުރެވޭނެ ގޮތެއް ނުވާނެ ކަމަށެވެ.

ސަރުކާރުގެ މީޑިއާ އިން ޙާތަމީގެ ވީޑިއޯ ފުޓޭޖެއް ވެސް ހިއްސާ ކޮށްފައިވެ އެވެ. އެ ވީޑިއޯގައި ޙާތަމީ، ސިފައިންގެ ކޮމާންޑާރުންގެ ތިން މީހަކާ އެކު، ކޮޓަރިއެއްގައި ތިއްބަވައި ފޯނު ކޯލަކުން ވާހަކަ ދައްކަވާ މަންޒަރު ފެނެ އެވެ. ނަމަވެސް، އެ ވީޑިއޯ ފުޓޭޖުގައި އެއްވެސް އަޑެއް ނީވެ އެވެ. ރޮއިޓާސް އިން ބުނެފައި ވަނީ، އެ ވީޑިއޯ ނަގާފައި ވަނީ ކޮން ދުވަހެއްގައިކަން ކަށަވަރުވެފައި ނުވާ ކަމަށެވެ. 

ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ހަމަލާ ދިނުމަށް ފަހު، މެދު އިރުމަތީގެ ސަރަހައްދުގައި ވަނީ ނުތަނަވަސްކަން ބޮޑުވެފަ އެވެ. އެ ހަމަލާ ތަކުގެ ސަބަބުން އީރާން އިން ގެންދަނީ މެދު އިރުމަތީގައި ހުރި އެމެރިކާގެ އަސްކަރީ ބޭސް ތަކަށް އަމާޒުކޮށް ހަމަލާ ދީފަ އެވެ.