ވަލްވާޑޭގެ ހެޓްރިކާ އެކު، ރެއާލް އިން ސިޓީ ބަލިކޮށްފި

ޔުއެފާ ޗެމްޕިއަންސް ލީގުގެ ގަދަ 16 ގެ ބުރުގެ ފުރަތަމަ ލެގުގައި މެންޗެސްޓަރ ސިޓީއާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑް އިން އެ ޓީމުގެ ފެންވަރު ދައްކާލައިފި އެވެ. 

ރެއާލްގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގައި ރެއާލް އިން އެ ޓީމުގެ ތިން ލަނޑު ވެސް ފުރަތަމަ ހާފުގައި ޖެހިއިރު، މެޗުގައި ރެއާލް އިން ވަނީ ރަނގަޅު ކުޅުމެއް ދައްކައިފަ އެވެ.

މެޗު ފަށައިގެން 20 ވަނަ މިނެޓުގައި ރެއާލް އަށް ލީޑު ނަގައިދިނީ ފެޑެރިކޯ ވަލްވާޑޭ އެވެ. އެއީ ރެއާލްގެ ގޯލު ކީޕަރު ތިބައޫ ކޯޓުއާ ދިން ބޯޅައެއްގެ ބޭނުން ހިފައިގެން އޭނާ ޖެހި ލަނޑެކެވެ. އޭގެ ހަތް މިނެޓު ފަހުން ވަލްވާޑޭ ވަނީ ރެއާލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަަސްކޮށްދިނީ ވިނީޝިއުސް ޖޫނިއާ އެވެ. މެޗުގެ ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް، ވަލްވާޑޭ ވަނީ ރެއާލްގެ ތިން ވަނަ ލަނޑު ޖަހައި، މެޗުގައި އޭނާގެ ހެޓްރިކް ހަމަ ކޮށްފަ އެވެ. އެއީ ބްރަހިމް ޑިއާޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގައި ވަލްވާޑޭ މޮޅު ކުޅުމެއް ދެއްކިއިރު، އޭނާ އަށް ވަނީ ޚާއްސަ ޝަރަފެއް ވެސް ލިބިފަ އެވެ. އެގޮތުން އޭނާ އަކީ ޗެމްޕިއަންސް ލީގުގެ ތާރީޚުގައި ވެސް، މެޗެއްގެ ފުރަތަމަ ހާފުގައި އިނގިރޭސި ޓީމެއްގެ ކޮޅަށް ތިން ލަނޑު ޖަހައިގެން ހެޓްރިކް ހަމަ ކުރި ދެ ވަނަ ކުޅުންތެރިޔާ އެވެ. މީގެ ކުރިން ޗެމްޕިއަންސް ލީގުުގެ މެޗެއްގެ ފުރަތަމަ ހާފުގައި އިނގިރޭސި ޓީމެއްގެ ކޮޅަށް ހެޓްރިކް ހެދީ ލިއޮނަލް މެސީ އެވެ.

މޮޅާ އެކު ރެއާލް އިން މުބާރާތުގެ ކުއާޓާ ފައިނަލްގެ ފުރުސަތު ބޮޑު ކޮށްފައިވާއިރު، މި ދެ ޓީމު ބައްދަލު ކުރާ ދެ ވަނަ ލެގު އޮތީ ސިޓީގެ އަމިއްލަ ދަނޑުގަ އެވެ. މުބާރާތުގެ ކުއާޓާ ފައިނަލްގެ ފުރުސަތު ސިޓީ އަށް އޮތީ، އެ މެޗުގައި ތިން ލަނޑަށް ވުރެ ފަރަގު ބޮޑުކޮށް ރެއާލް ބަލި ކޮށްގެންނެވެ.