ކަރަބޯ ކަޕް ކާމިޔާބު ކުރިޔަސް، ލީގު ލިބޭކަން ޔަޤީނެއް ނުވާނެ": ގާޑިއޯލާ

ކަރަބޯ ކަޕްގެ ފައިނަލްގައި އާސެނަލް ބަލިކޮށް، މެންޗެސްޓަރ ސިޓީ އިން ތަށި ކާމިޔާބު ކުރި ނަމަވެސް، އިނގިރޭސި ޕްރިމިއާ ލީގު އެ ޓީމަށް ލިބޭނެކަން ޔަޤީން ނުވާނެ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ. 

އާދިއްތަ ދުވަހުގެ ރޭ އާސެނަލްއާ ދެކޮޅަށް ކަރަބޯ ކަޕްގެ ފައިނަލްގައި ސިޓީ ނިކުންނައިރު، ޕްރިމިއާ ލީގުގެ އެއް ވަނައިގައި އާސެނަލް އޮތީ ނުވަ ޕޮއިންޓުގެ ލީޑަކުންނެވެ. ނަމަވެސް އެއީ ސިޓީ އަށް ވުރެ އެއް މެޗު އިތުރަށް ކުޅެގެންނެވެ. 

ގާޑިއޯލާ ބުނީ ސިޓީ އަށް ކަރަބޯ ކަޕް ކާމިޔާބު ކުރެވިއްޖެ ނަމަ، އެ ޓީމުގެ ރޫހަށް ބަދަލެއް އަންނާނެ ކަމަށާއި، ޓީމަށް އެކަމުގެ ފައިދާ ތަކެއް ވެސް ކުރާނެ ކަމަށެވެ. ނަމަވެސް، އެއީ ޕްރިމިއާ ލީގުގައި އޮތް ވާދަވެރި ޙާލަތު ބަދަލު ވާނެ ސަބަބެއް ނޫން ކަމަށް ގާޑިއޯލާ ބުންޏެވެ. ސިޓީ އިން ކަރަބޯ ކަޕް ކާމިޔާބު ކުރިޔަސް، ނުވަތަ ނުކުރިޔަސް، ގާޑިއޯލާގެ އެންމެ ބޮޑު ކަންބޮޑުވުމަކީ އެ މެޗުގެ ފަހުން ދެން ވެދާނެ ގޮތެކެވެ. 

އެގޮތުން ގާޑިއޯލާ ބުނީ ކަރަބޯ ކަޕް ކާމިޔާބު ކުރުމަށް ފަހު، އޭގެ ފަހުން ދެން އަނެއްކާ ލީގުގައި ސިޓީ އިން ކުޅޭ ކުޅުން ގޯސްވެދާނެ ކަމަށާއި، އެކަމުގެ ސަބަބުން އަނެއްކާ ދަތި ތަކެއް ކުރިމަތި ވާނެ ކަމަށެވެ. ގާޑިއޯލާ ބުނީ ވަރަށް ގާތް ގާތުގައި ލީގުގެ އިތުރުން، ކަރަބޯ ކަޕް އަދި ޔުއެފާ ޗެމްޕިއަންްސް ލީގުގައި ކުޅެން ޖެހުމަކީ ވެސް އުނދަގޫ ތަކެއް ކަމަށެވެ. 

ގާޑިއޯލާ ބުނީ ކޮންމެ ޙާލަތެއްގައި ވެސް ހޯދަން ޖެހޭނީ ކުރިއަށް ދެވޭނެ ގޮތެއް ކަމަށާއި، ބޭނުން ވަނީ ކުރިއަށް ދާނެ މަގެއް ކަމަށެވެ. އޭނާ ބުނީ ފަައިނަލް މެޗަށް ނިކުންނާނީ ވަރަށް ރަނގަޅަށް ތައްޔާރު ވެގެން ކަމަށާއި، ސިޓީ އިން އެންމެ ފަހު ވަގުތާ ޖެހެންދެން މަސައްކަތް ކުރާނެ ކަމަށެވެ. މެޗުގެ ނަތީޖާ ބިނާވެގެން ދާނީ ސިޓީ އިން ކުރާ މަސައްކަތެއްގެ މައްޗަށް ކަަމަށް ގާޑިއޯލާ ބުންޏެވެ.

ޕްރިމިއާ ލީގުގެ ދެ ވަނައިގައި ސިޓީ އޮތްއިރު، ޗެމްޕިއަންސް ލީގުން އެ ޓީމު ވަނީ ކަޓައިފަ އެވެ. ކަރަބޯ ކަޕްގެ ފައިނަލް ކާމިޔާބުކޮށް، ސީޒަންގެ ފުރަތަމަ ތަށި ކާމިޔާބު ކުރުމުގެ ފުރުސަތު ސިޓީ އަށް އެބަ އޮތެވެ.