އެފްއޭ ކަޕް: ފަހަތުން އަރައި ނިއުކާސަލް ބަލިކޮށް ސިޓީ ކުއާޓާ ފައިނަލް އަށް
8 މާރިޗު 2026 | އާދީއްތަ 04:40މެޗުގައި ނިއުކާސަލް އިން ލަނޑު ޖަހައި ކުރި ހޯދާފައި ވަނިކޮށް، ސިޓީ އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފައި.
މެޗުގައި ލަނޑު ޖެހުމަށް ފަހު ސިޓީގެ ކުޅުންތެރިން އުފާ ފާޅު ކުރަނީ | ރޮއިޓާސް
އިނގިރޭސި އެފްއޭ ކަޕްގެ ގަަދަ 16 ވަނަ ބުރުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިން މުބާރާތުގެ ކުއާޓާ ފައިނަލްގެ ޖާގަ ހޯދައިފި އެވެ.
ހޮނިހިރު ދުވަހުގެ ރޭ ނިއުކާސަލްއާ ދެކޮޅަށް ކުޅުނު މެޗު ސިޓީ އިން ކާމިޔާބު ކުރީ 3-1 އިންނެވެ. މެޗުގައި ނިއުކާސަލް އިން ލަނޑު ޖަހައި ކުރި ހޯދާފައި ވަނިކޮށް، ސިޓީ އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.
މެޗު ފަށައިގެން 18 ވަނަ މިނެޓުގައި ހާވޭ ބާންސް ވަނީ ލަނޑު ޖަހައި ނިއުކާސަލް އަށް ލީޑު ނަގައިދީފަ އެވެ. ނަމަވެސް ފުރަތަމަ ހާފުގެ 39 ވަނަ މިނެޓުގައި ސަވީނިއޯ ވަނީ ލަނޑު ޖަހައި ސިޓީ އަށް ނަތީޖާ ހަމަހަމަ ކޮށްދީފަ އެވެ. އެ ލަނޑު ޖަހަން ސަވީނިއޯ އަށް ފުރުސަތު ތަނަވަސްކޮށްދިނީ ޖެރެމީ ޑޮކޫ އެވެ.
މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި އޮމަރް މާމޫޝް ވަނީ ލަނޑު ޖަހައި ސިޓީ އަށް ލީޑު ނަގައިދީފަ އެވެ. އޭގެ ފަހުން މެޗުގެ 65 ވަނަ މިނެޓުގައި މާމޫޝް ވަނީ ސިޓީގެ ތިން ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މަތެއުސް ނޫނޭސް އެވެ.
މި މޮޅާ އެކު ސިޓީ އިން އެފްއޭ ކަޕްގެ ކުއާޓާ ފައިނަލްގެ ފުރުސަތު ހޯދާފައިވާއިރު، އެ ޓީމުން ވަނީ މިހާތަނަށް ހަތް ފަހަރެއްގެ މަތިން އެފްއޭ ކަޕް ކާމިޔާބު ކޮށްފަ އެވެ.
