ފޮރެސްޓާ އެއްވަރުވެ، ސިޓީ އަށް ފައިދާ ނުނެގުނު.
މެޗު އެއްވަރުވެ ލިބުނު ޕޮއިންޓާ އެކު ސިޓީ ދެ ވަނައިގައި އޮތީ މިހާތަނަށް ކުޅެފައިވާ 29 މެޗުން 60 ޕޮއިންޓާ އެކު. ސިޓީ އަށް ވުރެ އެއް މެޗު އިތުރަށް އާސެނަލް ކުޅެފައިވާއިރު، މެޗުގެ އަދަދު ހަމަކޮށް ހަތަރު ޕޮއިންޓަށް ފަރަގު ކުޑަ ކުރުމުގެ ފުރުސަތު ސިޓީ އަށް އެބަ އޮތް.
އިނގިރޭސި ޕްރިމިއާ ލީގުގަައި މެންޗެސްޓަރ ސިޓީ އާއި، ނޮޓިންހަމް ފޮރެސްޓް ކުޅުނު މެޗުގެ ތެރެއިން | ރޮއިޓާސް
އިނގިރޭސި ޕްރިމިއާ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުން އެއްވަރުވެ، އެއް ވަނައިގައި އޮތް އާސެނަލްއާ ދެެމެދު ފަރަގު ކުޑަ ކުރަން ލިބުނު ފުރުސަތު މެންޗެސްޓަރ ސިޓީ އިން ނަގާލައިފި އެވެ.
ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ބުދަ ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ސިޓީ އިން ދެ ފަހަރެއްގެ މަތިން ލީޑު ނެގިއިރު ވެސް، ދެ ފަހަރު ވެސް ފޮރެސްޓް އިން ވަނީ ނަތީޖާ ހަމަހަމަ ކޮށްފަ އެވެ.
މެޗުގެ ފުރަތަމަ ހާފުގެ 31 ވަނަ މިނެޓުގައި ސިޓީ އަށް ލީޑު ނަގައިދިނީ އެންޓޮއިން ސެމެންޔޯ އެވެ. އެ ލަނޑު ޖަހަން ސެމެންޔޯ އަށް ފުރުސަތު ތަނަވަސްކޮށްދިނީ ރަޔަން ޗާކީ އެވެ. ދެ ވަނަ ހާފު ފަށައިގެން 11 ވަނަ މިނެޓުގައި ފޮރެސްޓަށް ނަތީޖާ ހަމަހަމަ ކޮށްދިނީ މޯގަން ގިބްސް ވައިޓް އެވެ.
އޭގެ ހަ މިނެޓު ފަހުން ދެ ވަނަ ފަހަރަށް ސިޓީ އަށް ލީޑު ނަގައިދިނީ ރޮޑްރީ އެވެ. އިތުރު ލަނޑު ޖަހަން ސިޓީ އިން މަސައްކަތް ކުރަމުން ދަނިކޮށް، ފޮރެސްޓް އިން ވަނީ ދެ ވަނަ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. މެޗުގެ 76 ވަނަ މިނެޓުގައި ފޮރެސްޓަށް އެ ލަނޑު ޖަހައިދިނީ އެލިއޮޓް އެންޑާސަން އެވެ.
މެޗު އެއްވަރުވެ ލިބުނު ޕޮއިންޓާ އެކު ސިޓީ ދެ ވަނައިގައި އޮތީ މިހާތަނަށް ކުޅެފައިވާ 29 މެޗުން 60 ޕޮއިންޓާ އެކު އެވެ. ސިޓީ އަށް ވުރެ އެއް މެޗު އިތުރަށް އާސެނަލް ކުޅެފައިވާއިރު، މެޗުގެ އަދަދު ހަމަކޮށް ހަތަރު ޕޮއިންޓަށް ފަރަގު ކުޑަ ކުރުމުގެ ފުރުސަތު ސިޓީ އަށް އެބަ އޮތެވެ.
