އެފްބީއައިގެ ޑިރެކްޓަރު ޕަޓޭލް ވަކި ކުރުމަށް ޓްރަމްޕް ވިސްނަވަނީ

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ އިސް މަގާމު ތަކުގައި ތިއްބެވި ބައެއް ބޭފުޅުން މަގާމުން ވަކި ކުރުމާ ގުޅޭ ގޮތުން މަޝްވަރާ ކުރަމުން އަންނަ ކަމަށް ރިޕޯޓު ކޮށްފި އެވެ. 

ދި އެޓްލާންޓިން އިން ރިޕޯޓު ކޮށްފައިވާ ގޮތުގައި، މަގާމުން ވަކި ކުރުމަށް މަޝްވަރާ ކުރަމުން އަންނަ ފަރާތް ތަކުގެ ތެރޭގައި އެފްބީއައިގެ ޑިރެކްޓަރު ކޭޝް ޕަޓޭލް ވެސް ހިމެނިވަޑައިގަންނަވަ އެވެ. 

ޕަޓޭލްގެ އިތުރުން، އާމީ ސެކްރެޓަރީ ޑެނިއަލް ޑްރިސްކޯލް އަދި ލޭބާ ސެކްރެޓަރީ ލޯރީ ޗަވޭޒް ޑިރެމާ ވެސް މަގާމުން ވަކި ކުރުމަށް ޓްރަމްޕް ގެންދަވަނީ މަޝްވަރާ ކުރައްވަމުންނެވެ. 

މި ބޭފުޅުން މަގާމުން ވަކި ކުރާނެ ވަކި ތާރީޚެއް މިހާތަނަށް ސާފުވެފައި ނުވާއިރު، މިކަމާ މެދު ރައީސް ޓްރަމްޕް އަދި ވަކި ގޮތެއް ނިންމަވާފައި ނެތް ކަމަށް ވެސް ވަނީ ބުނެފަ އެވެ. މިހާރު ގެންނަން މި އުޅޭ ބަދަލަކީ ސަރުކާރުގެ ހިންގުން ހަރުދަނާ ކުރުމުގެ ގޮތުން ގެންނަ ބަދަލެއް ކަމަށް ބެލެވެ އެވެ. ނަމަވެސް، މިކަމާ މެދު ވައިޓް ހައުސް އިން ރަސްމީކޮށް އެއްޗެއް ބުނެފައި ނުވެ އެވެ. 

މި ޚަބަރާ ގުޅޭ ގޮތުން ރޮއިޓާސް ނިއުސް އެޖެންސީ އިން ބުނެފައި ވަނީ، އެޓްލާންޓިކްގެ މި ރިޕޯޓުގެ ޞައްޙަކަން މިހާތަނަށް ކަށަވަރު ކުރެވިފައި ނުވާ ކަމަށެވެ. މަގާމުން ވަކި ކުރަން އުޅޭ ފަރާތް ތަކުގެ ތެރޭގައި ހިމެނޭ ޕަޓޭލް އަކީ ޓްރަމްޕްގެ ސަރުކާރުގައި ހިމެނޭ ވަރަށް ނުފޫޒު ގަދަ ބޭފުޅެކެވެ.