ޓްރަމްޕުގެ ވަރުގަދަ އިންޒާރަށް ފަހު ވެސް، އީރާން އިން އިޒްރޭލް އަށް މިސައިލް ހަމަލާ ތަކެއް ދީފި

އީރާން އަށް ވަރުގަދަ ހަމަލާ ތަކެއްދީ، އެ ޤައުމުގެ "ހިލަ ޒަމާނަކަށް" ފޮނުވާލާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވިތާ ކުޑަ އިރުކޮޅެއްގެ ތެރޭގައި، އީރާން އިން އިޒްރޭލް އަށް މިސައިލް ހަމަލާ ތަކެއް ދީފި އެވެ. 

އިޒްރޭލްގެ އަސްކަރިއްޔާ އިން ބުނި ގޮތުގައި، ބުރާސްފަތި ދުވަހުގެ ހަ ގަޑިއިރުގެ ތެރޭގައި ހަތަރު ފަހަރެއްގެ މަތިން މިސައިލް ހަމަލާ ތަކެއް ފޮނުވާލާފައިވާއިރު، އޭގެ ތެރެއިން ދެ ހަމަލާ އަކީ ޓްރަމްޕްގެ ތަޤުރީރަށް ފަހު ދީފައިވާ ހަމަލާ ތަކެއް ކަމަށެވެ.

ވައިޓް ހައުސްގައި ހުންނަވައި ޤައުމާ މުޚާތަބު ކުރައްވަމުން ޓްރަމްޕް ވިދާޅުވީ، ފެބްރުވަރީ މަހުގެ 28 ވަނަ ދުވަހު ފެށި އަސްކަރީ އޮޕަރޭޝަން މިހާރު ނިމުމަކާ ގާތްވެފައވާ ކަމަށެވެ. އަދި ކުރިއަށް އޮތް ތަނުގައި އީރާން އަށް އިންތިހާ އަށް ވަރުގަދަ ހަމަލާ ތަކެއް ދޭނެ ކަމަށާއި، އީރާން އަށް ހައްގުވާ "ހިލަ ޒަމާނަށް" އެ ޤައުމު ފޮނުވާލާނެ ކަމަށް ވެސް ޓްރަމްޕް ވިދާޅުވި އެވެ. 

މީގެ އިތުރުން އީރާނާ އެކު އެއްބަސްވުމަކަށް ނާދެވިއްޖެ ނަމަ، އެ ޤައުމުގެ ކަރަންޓު އުފައްދާ މަރުކަޒުތައް ފަދަ މުހިންމު ތަންތަނަށް ހަމަލާދޭން ތައްޔާރު ވަމުންދާ ކަަމަަށް ވެސް ޓްރަމްޕް ވިދާޅުވި އެވެ. 

އީރާންއާ ދެކޮޅަށް ކުރަމުން އަންނަ ހަނގުރާމައިގެ ސަަބަބުން ޓްރަމްޕްގެ ތާއީދާއި މަޤުބޫލުކަން ދަށަށް ގޮސްފައިވާއިރު، އީރާންގެ މިހާރުގެ އިސްވެރިންނަކީ ހަރުކަށިކަން ކުޑަ އަދި ބުއްދިވެރި ބައެއްގެ ގޮތުގައި ޓްރަމްޕް ވަނީ ސިފަ ކުރައްވައިފަ އެވެ. އަދި އީރާންގެ އައު ލީޑާޝިޕާ އެކު މަޝްވަރާ ކުރުމުގެ ފުރުސަތު އޮތް ކަމަށް ވެސް ޓްރަމްޕް ވިދާޅުވި އެވެ. ޓްރަމްޕް މިހެން ވިދާޅުވެފައިވާއިރު، އެމެރިކާ އިން ވަނީ އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލައިފަ އެވެ. 

ޓްރަމްޕްގެ އިންޒާރުތަކާ އެކު ވެސް، އީރާން އިން ވަނީ އެމެރިކާގެ ހުށަހެޅުން ތަކަށް ފުރަގަސްދީފަ އެވެ. އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، ހަނގުރާމަ ހުއްޓާލުމަށް އެމެރިކާ އިން ކުރާ ޝަރުޠު ތަކަކީ ބުއްދި އަށް ޤަބޫލު ނުކުރެވޭ ފަދަ ހަރުކަށި ޝަރުޠު ތަކެއް ކަމަށެވެ. ޕާކިސްތާން މެދުވެރިކޮށް މެސެޖުތައް ލިބެމުން ދިޔަ ނަމަވެސް، އެމެރިކާ އާއެކު ސީދާ އެއްވެސް މަޝްވަރާއެއް ކުރިއަށް ނުދާ ކަމަށް އޭނާ ވިދާޅުވި އެވެ. 

އީރާންގެ ވެރި ރަށް ތެހެރާންގައި ބުރާސްފަތި ދުވަހު ބޭއްވި ރިވޮލިއުޝަނަރީ ގާޑްސްގެ ކޮމާންޑަރެއްގެ ޖަނާޒާގައި ބައިވެރިވި އާންމުން ވެސް ތިބީ، ހަނގުރާމައިގައި ދޫ ނުދޭނެ ކަމުގެ އަޒުމުގަ އެވެ. އެގޮތުން 57 އަހަރުގެ މޫސާ ނައުރޫޒީ ވިދާޅުވީ، ހަނގުރާމަ އަށް މަސް ދުވަސް ވީ ނަމަވެސް، އަދި ކިތަންމެ ދުވަހެއް ހޭދަވި ނަމަވެސް އީރާން އިން ތިބީ ދިފާއީ މަސައްކަތުގަ އެވެ. 

މި ހަމަލާތައް ބަދަލު ކުރަމުން އަންނަ ދަނޑިވަޅެއްގައި، އީރާން އިން ބަންދު ކޮށްފައިވާ ހޮރްމޫޒް ކަނޑު އޮޅި އަލުން ހުޅުވުމާ ގުޅޭ ގޮތުން މަޝްވަރާ ކުރުމަށް އިނގިރޭސިވިލާތުން އިސްނަގައިގެން 35 ޤައުމެއްގެ ބައްދަލުވުމެއް ބުރަސްފަތި ދުވަހު ބޭއްވުމަށް ވަނީ ހަމަޖެހިފަ އެވެ.