ހަނގުރާމައިގެ ލަނޑުދަނޑިތައް ދަނީ ހާސިލުވަމުން: ޓްރަމްޕް

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި، އެމެރިކާ އިން ކަނޑައަޅާފައިވާ މައިގަނޑު ލަނޑުދަނޑިތައް ހާސިލުވަމުން އަންނަ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެެވެ. 

ބުދަ ދުވަހުގެ ރޭ ޤައުމާ މުޚާތަބު ކުރައްވައި ދެއްވި ބަޔާނުގައި ޓްރަމްޕް ވިދާޅުވީ، އީރާންއާ ދެކޮޅަށް ކުރަމުން އަންނަ ހަނގުރާމައިގައި އެމެރިކާ އިން ކަނޑައަޅާފައިވާ ލަނޑުދަނޑިތައް ހާސިލުވަމުން އަންނައިރު، އެކަމާ އޭނާ ހިތްހަމަ ޖެހިވަޑައިގަންނަވާ ކަމަށެވެ. 

މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ހަމަލާ ދިނުމާ ގުޅިގެން، މެދު އިރުމަތީގެ ސަރަހައްދުގައި ހަނގުރާމައިގެ ޙާލަތު ވަނީ ވަރަށް ބޮޑަށް ގޯސްވެފަ އެވެ. އެ ހަމަލާ ތަކުގެ ސަބަބުން، އީރާން އިން އަންނަނީ އެމެރިކާ އާއި އިޒްރޭލްގެ އަމާޒު ތަކަށް ގިނަ ހަމަލާ ތަކެއް ދެމުންނެވެ. 

މި ހަނގުރާމައިގެ ސަބަބުން އީރާން އިން ހޮރްމޫޒް ކަނޑު އޮޅި ބަންދު ކޮށްފައިވާއިރު، މި ކަނޑު އޮޅި ބަންދުވުމުން ދުނިޔޭގެ ތެލުގެ ވިޔަފާރީގެ ފަސްބައި ކުޅަ އެއްބައި ވަނީ ހުއްޓިފަ އެވެ. ހޮރްމޫޒް ކަނޑު އޮޅި އަކީ ދުނިޔޭގެ ތެލިގެ ވިޔަފާރީގައި ވަރަށް މުހިންމު މަގަކަށް ވާއިރު، އެ މަގު ބަންދުވުމުގެ ސަބަބުން ދުނިޔޭގެ އިޤްތިޞާދަށް އެކަމުގެ އަސަރު އަންނަނީ ވަރަށް ބޮޑަށް ކުރަމުންނެވެ. 

މި ހަނގުރާމައިގެ ސަބަބުން ދުނިޔޭގެ މާލީ ބާޒާރު ތަކަށް ވެސް ބޮޑެތި ނޭދެވޭ އަސަރު ތަކެއް ކޮށްފައިވާ ކަމަށް މާހިރުން ވަނީ ފާހަގަ ކޮށްފަ އެވެ. މީގެ އިތުރުން މި ހަނގުރާމައިގެ ސަބަބުން، އެެމެރިކާގެ ރައްޔިތުންގެ މެދުގައި ޓްރަމްޕް އާއި އޭނާގެ ސަރުކާރުގެ މަޤުބޫލުކަން ދަށްވަމުން އަންނަ ކަމަށް ވެސް ފާހަގަ ކޮށްފައިވެ އެވެ. 

ޓްރަމްޕް ވިދާޅުވީ އީރާންއާ ދެކޮޅަށް އެމެރިކާ އިން ކުރިއަށް ގެންދާ ހަނގުރާމައިގައި ގިނަ ލަނޑުދަނޑި ތަކެއް ކަނޑައަޅާފައިވާ ކަމަށެވެ. އަދި އެ ލަނޑުދަނޑިތައް ހާސިލުވަމުން އަންނަ ކަމަށް ވެސް ޓްރަމްޕް ވިދާޅުވެފައިވާއިރު، އޭނާ ބޭނުން ވަނީ އީރާންގެ ބާރުވެރިކަން އެއްކޮށް ނައްތާލުމަށެވެ. ޓްރަމްޕް މިހެން ވިދާޅުވި ނަމަވެސް، އެމެރިކާ އިން ވަންނަން ނުޖެހޭ ހަނގުރާމައެއްގެ ތެރެއަށް އެ ޤައުމު ވަދެފައިވާ ކަމަށް ބުނެ، ގިނަ ރައްޔިތުން އަންނަނީ ޓްރަމްޕް އަށް ނުރުހުން އަމާޒު ކުރަމުންނެވެ. 

މިއަހަރުގެ ފަހު ކޮޅު އެމެރިކާގެ މިޑް ޓާމް އިންތިޚާބު އޮންނައިރު، މި ހަނގުރާމައިގެ ސަބަބުން ވެރިކަން ކުރާ ރިޕަބްލިކަން ޕާޓީ އަށް އެތައް ގޮންޖެހުން ތަކެއް ކުރިމަތި ވާނެ ކަމަށް މާހިރުން ލަފާ ކޮށްފައިވެ އެވެ. އެކަމުގެ ސަބަބުން ޓްރަމްޕް އާއި ރިޕަބްލިކަން ޕާޓީ އަށް އިންތިޚާބު ގެއްލި، ވެރިކަމުގައި އިތުރު ގޮންޖެހުން ތަކެއް ކުރިމަތި ވުމަކީ އެކަށީގެންވާ ކަމެއް ކަމަށް ވެސް މާހިރުން ބުނެފައިވެ އެވެ. 

މި ދަނޑިވަޅުގައި ޓްރަމްޕް ގެންދަވަނީ ގިނަ ވާހަކަ ތަކެއް ދައްކަވައިގެން، އެމެރިކާގެ ރައްޔިތުންގެ މެދުގައި އޮތް ނުތަނަވަސްކަން ކުޑަ ކުރެވޭތޯ މަސައްކަތް ކުރަމުންނެވެ.