އީރާންގައި ބިރުވެރިކަން ފަތުރަމުން ގެންދާ ވެރިކަން , ހަލާކު ކުރާނަން: ނަތަންޔާހޫ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމަ ހުއްޓުމެއް ނެތި ކުރިއަށް ގެންދާނެ ކަމަށާއި، އީރާންގައި ބިރުވެރިކަން ފަތުރަމުން އަންނަ ވެރިކަން , ހަލާކު ކުރާނެ ކަމަށް، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ. 

އަންގާރަ ދުވަހު ދެއްވި ބަޔާނެއްގައި ނަތަންޔާހޫ ވިދާޅުވީ، މި ހަނގުރާމަ ނިމިފައި ނުވާ ކަމަށާއި، ބިރުވެރިކަން ފަތުރާ ވެރިކަން, ހަލާކު ކުރުމުގެ މަސައްކަތް ކުރިއަށް ގެންދާނެ ކަމަށެވެ. 

އީރާންގެ ރައީސް މަސްއޫދު ޕެޒެޝްކިއާން ވިދާޅުވެފައި ވަނީ، އެމެރިކާ އާއި އިޒްރޭލްއާ ދެކޮޅަށް ކުރަމުންދާ ހަނގުރާމަ ނިންމުމަށް އީރާން އަށް ބޭނުންވާ ހިތްވަރު ލިބިފައިވާ ކަމަށެވެ. ނަމަވެސް، އަލުން މިފަދަ ހަނގުރާމައެއް ނުހިނގާނެ ކަމުގެ ޔަޤީންކަން ބޭނުންވާ ކަމަށް ވެސް އޭނާ ވަނީ ވިދާޅުވެފަ އެވެ. އީރާންގެ ރައީސްގެ އެ ވާހަކަ ތަކަށް ރައްދު ދެއްވައި، ނަތަންޔާހޫ ވަނީ ބަޔާނެއް ދެއްވައިފަ އެވެ. 

ނަތަންޔާހޫ ވިދާޅުވީ އިޒްރޭލް އިން އެ ޤައުމުގެ މަޤުސަދު ތަކުގައި ދެމި ތިބި ކަމަށާއި، މެދު އިރުމަތީގެ ސަރަހައްދުގެ "ސޫރާ" ބަދަލު ކޮށްލެވުނު ކަމަށެވެ. އަދި މި ހަނގުރާމަ ކުރިއަށްދާއިރު ވެސް، އިޒްރޭލް އަކީ ސަރަހައްދީ ބާރެއްގެ ގޮތުގައި ފެންނަން އޮތް ޤައުމެއް ކަމަށް ވެސް ނަތަންޔާހޫ ވަނީ ވިދާޅުވެފަ އެވެ. 

އެމެރިކާ އާއި އީރާންއާ ދެމެދު އޮތް ނުތަނަވަސްކަން ހައްލު ކުރުމަށް ފަހު، މި ހަނގުރާމަ ނިންމުމަށް ބައިނަލްއަޤުވާމީ މުޖުތަމައުން އަންނަނީ ގިނަ މަސައްކަތް ތަކެއް ކުރަމުންނެވެ. ނަމަވެސް، އިޒްރޭލްގެ ވިސްނުން ހުރީ އަދިވެސް މި ހަނގުރާމަ ކުރިއަށް ގެންދިޔުންކަން ނަތަންޔާހޫގެ ބަޔާނުން ސާފުވެފައިވާ ކަމަށް މަސްރަހު ދިރާސާ ކުރާ ފަރާތްތަކުން ވަނީ ބުނެފަ އެވެ.