އީރާން ހަނގުރާމަ ނިމުމުން، ނޭޓޯ އާއެކު އޮތް ގުޅުން މުރާޖާ ކުރާނަން: ރޫބިއޯ

އެމެެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ ނިމުމާ އެކު، ނޭޓޯގެ ބައިވެރިންނާ އެކު އޮތް ގުޅުން އަލުން މުރާޖާ ކުރަން ޖެހޭނެ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ. 

ފޮކްސް ނިއުސްގެ ހޯސްޓް ޝޯން ހެނިޓީ އަށް ދެއްވި އިންޓަވިޔުއެއްގައި ރޫބިއޯ ވިދާޅުވީ، މިހާރު ހިނގަމުން އަންނަ ހަމަނުޖެހުންތައް ނިމުމުން، އެމެރިކާގެ އިއްތިހާދެއްގެ ގޮތުގައި ނޭޓޯ އޮތް ގޮތާއި، އެ ޖަމިއްޔާ އާއެކު އޮތް ގުޅުން އަލުން ބަލަން ޖެހޭނެ ކަމާމެދު އެއްވެސް ޝައްކެއް ނެތް ކަމަށެވެ. އަދި އެކަމާ ގުޅިގެން އެންމެ ފަހުގެ ނިންމުން ނިންމަވާނީ އެމެރިކާގެ ރައީސް ޑޮނަލްޑް ޓްރަމްޕް ކަމަށް ވެސް ރޫބިއޯ ވިދާޅުވި އެވެ. 

މީގެ އިތުރުން ރޫބިިއޯ ވިދާޅުވީ، ސެނެޓުގައި މަސައްކަތް ކުރެއްވި ދުވަސްވަރު އޭނާ އަކީ ނޭޓޯގެ ދިފާއުގައި ވަރަށް ގިނަ ކަންކަން ކުރައްވައި، ވަރަށް ގިނަ ވާހަކަ ތަކެއް ދެއްކެވި ބޭފުޅެއް ކަމަށެވެ. އެއީ ޔޫރަޕުގައި ހުރި އަސްކަރީ މަރުކަޒު ތަކުގެ ސަބަބުން، ދުނިޔޭގެ އެކި ކަންކޮޅު ތަކުގައި އެމެރިކާގެ ބާރު ފޯރުވުމަށް މަގުފަހި ވެގެންދާތީ ކަމަށް ވެސް ރޫބިއޯ ވިދާޅުވި އެވެ. 

ނަމަވެސް، ނޭޓޯގެ މެމްބަރު ޤައުމު ތަކުގައި ހުރި އަސްކަރީ މަރުކަޒުތައް އެމެރިކާގެ މަސްލަހަތު ހިމާޔަތް ކުރުމަށް ބޭނުން ނުކުރެވޭ ޙާލަތަކަށް ކަންކަން ގޮސްފި ނަމަ، އެއީ ހަމައެކަނި އެއްކޮޅަށް ފައިދާވާ ގުޅުމެއްގެ ގޮތުގައި ރޫބިއޯ ސިފަ ކުރެއްވި އެވެ. އޭނާ ވިދާޅުވީ އީރާންއާ ދެކޮޅަށް ކުރާ ހަނގުރާމައިގައި ވައިގެ ހަމަލާތައް ދިނުމަށް ނޭޓޯގެ ޤައުމު ތަކުގެ ކިބައިން އެމެރިކާ އިން ނޭދޭ ކަމަށެވެ. އެހެން ނަމަވެސް، އެ ޤައުމު ތަކުގައި ހުރި އަސްކަރީ މަރުކަޒުތައް ބޭނުން ކުރުމުގެ ހުއްދަ އަށް އެދުމުން، އެކަމަށް ނޫނެކޭ ބުނާ ނަމަ ނޭޓޯގައި އެމެރިކާ އޮތުމުގެ ބޭނުމާ މެދު ސުވާލު އުފެދޭ ކަމަށް ވެސް ރޫބިއޯ ވިދާޅުވި އެވެ. 

ރޫބިއޯ މި މޭރުމުން ވާހަކަ ދައްކަވާފައި މި ވަނީ، ޔޫރަޕުގެ ބައެއް ޤައުމު ތަކުން އެމެރިކާގެ އަސްކަރިއްޔާ އަށް އެ ޤައުމު ތަކުގެ ބިން ބޭނުން ކުރުން ހަނި ކޮށްފައިވާ ދަނޑިވަޅެއްގަ އެވެ. އެގޮތުން މެދު އިރުމަތީގައި ކުރިއަށްދާ ހަނގުރާމައިގެ މިޝަނަކަށް ދަތުރު ކުރި އެމެރިކާގެ އަސްކަރީ ބޯޓެއް އިޓަލީގައި ޖެއްސުމުގެ ހުއްދަ އަށް އެދުމުން، އެ ޤައުމުން އެ ހުއްދަ ދީފައި ނުވާ ކަމަށް ވަނީ ހާމަވެފަ އެވެ.

މީގެ އިތުރުން އީރާންއާ ދެކޮޅަށް ކުރިއަށް ގެންދާ މިޝަންތަކުގައި ބޭނުން ކުރާ އެމެރިކާގެ މަތިންދާ ބޯޓު ތަކަށް ސްޕެއިންގެ ވައިގެ ސަރަހައްދު ބޭނުން ކުރުން އެ ޤައުމުން ވެސް ވަނީ މަނާ ކޮށްފަ އެވެ.