ލެވަކޫސަން ކައިރިން އާސެނަލް ސަލާމަތްވީ ފަހު ވަގުތު ޖެހި ޕެނަލްޓީ އިން

ޔުއެފާ ޗެމްޕިއަންސް ލީގުގެ ގަދަ 16 އިގެ ބުރުގެ ފުރަތަމަ ލެގުގައި ޖަރުމަނުގެ ބަޔާ ލެވަކޫސަންއާ ދެކޮޅަށް ކުޅުނު މެޗުން ފަހު ވަގުތު އާސެނަލް ބަލި ނުވެ ސަލާމަތް ވެއްޖެ އެވެ. 

ލެވަކޫސަންގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެެވެ. މެޗުގެ ދެ ވަނަހާފުގައި ލެވަކޫސަން އިން ލަނޑު ޖަހައި ކުރި ހޯދާފައި ވަނިކޮށް، އާސެނަލް އިން ނަތީޖާ ހަމަހަމަ ކުރީ މެޗުގެ ފަހު ވަގުތުގެ ތެރޭގަ އެވެ.

މެޗުގެ ދެ ވަނަ ހާފު ފަށައިގެން ފުރަތަމަ މިނެޓުގައި ލެވަކޫސަން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ލެވަކޫސަން އަށް ޖަހައިދިނީ ރޮބާޓް އެންޑްރިޗް އެވެ. އެ ލަނޑު ޖަހަން އެންޑްރިޗް އަށް ފުރުސަތު ތަނަވަސްކޮށްދިނީ އެލެކްސް ގްރިމާލްޑޯ އެވެ.

އޭގެ ފަހުން މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، އާސެނަލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އާސެނަލް އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ނަތީޖާ ހަމަހަމަ ކޮށްދިނީ ކައި ހަވާޓްޒް އެވެ. 

މެޗު އެއްވަރުވެފައިވާއިރު، މިއީ މި ސީޒަންގެ ޗެމްޕިއަންސް ލީގުގައި އާސެނަލް މޮޅު ނުވެ ނިންމާލަން ޖެހުނު ފުރަތަމަ މެޗެވެ. އާސެނަލް އިން މުބާރާތުގެ ގަދަ 16 އިން ޖާގަ ހޯދީ ލީގު ބުރުގައި ކުޅުނު އަށް މެޗުން ވެސް މޮޅުވެގެންނެވެ. ގަދަ 16ގެ ފުރަތަމަ ލެގު އެއްވަރުވީއިރު، ދެ ވަނަ ލެގު ކުޅޭނީ އާސެނަލްގެ އަމިއްލަ ދަނޑުގަ އެވެ.