އާސެނަލް އަށް އެންމެ މުހިންމީ ލީޑު ހިފެހެއްޓުން: އާޓެޓާ

އިނގިރޭސި ޕްރިމިއާ ލީގުގައި އެވަޓަންއާ ދެކޮޅަށް ނިކުންނައިރު، އާސެނަލް އަށް އެންމެ މުހިންމީ އެއް ވަނައިގައި އެ ޓީމުގެ ލީޑު ހިފެހެއްޓުން ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

އާޓެޓާ އެހެން ބުނެފައި ވަނީ، ހޮނިހިރު ދުވަހުގެ ރޭ އާސެނަލްގެ އަމިއްލަ ދަނޑުގައި އެވަޓަންއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެ މެޗަށް ނިކުންނައިރު، އެއް ވަނައިގައި އާސެނަލް ހަތް ޕޮއިންޓުގެ ލީޑަކާ އެކު އޮތީ، ދެ ވަނައިގައި އޮތް މެންޗެސްޓަރ ސިޓީ އަށް ވުރެ އެއް މެޗު އިތުރަށް ކުޅެގެންނެވެ.

އާޓެޓާ ބުނީ، ކޮންމެ މެޗަކުން ވެސް މޮޅުވާން ޖެހޭ ކަމަށާއި، އެއީ އާސެނަލް އިން ހާސިލު ކުރަން ބޭނުންވާ ނަތީޖާ ހާސިލު ކުރުމަށް އެޅޭ ވަރަށް މުހިންމު ފިޔަވަޅެއް ކަމަށެވެ. އަމިއްލަ ދަނޑުގައި ކުޅެން ޖެހުނު ނަމަވެސް، އެވަޓަން މެޗަކީ އުނދަގޫ މެޗަކަށް ވާނެ ކަމަށާއި، އާސެނަލް އިން ގިނަ ކަންތައް ތަަކަކަށް ސަމާލުކަން ދޭން ޖެހޭ ކަމަށް އާޓެޓާ ބުންޏެވެ.

އެއް ވަނައިގައި އާސެނަލްގެ ލީޑު ހިފެހެއްޓުމުގެ މުހިންމުކަމާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، ކުރިމަތީގައި ދެން އޮތް ކޮންމެ މެޗަކީ ވެސް އެހާ މުހިންމު މެޗެއް ކަމަށެވެ. އެހެންކަމުން އެވަޓަންއާ ދެކޮޅަށް ވެސް ނިކުންނަނީ ތިން ޕޮއިންޓު ހޯދުމުގެ އަޒުމުގައި ކަމަށް ފާހަގަކޮށް އާޓެޓާ ބުނީ، ތިން ޕޮއިންޓު ހޯދިއްޖެ ނަމަ އާސެނަލް ބޭނުންވާ ނަތީޖާއާ ކައިރި އަށް ޖެހިލެވޭނެ ކަމަށެވެ. 

އެވަޓަންގެ މެޗުގެ ކުރިން ޔުއެފާ ޗެމްޕިއަންސް ލީގުގައި ބަޔާ ލެވަކޫސަންއާ ދެކޮޅަށް ކުޅެ، އެއްވަރުވި މެޗަށް އިޝާރާތް ކުރަމުން އާޓެޓާ ބުނީ އެ މެޗުގައި އެންމެ އެކަށީގެންވާ ކުޅުމެއް ނުދެއްކުނު ކަމަށެވެ. ނަމަވެސް، އަލުން އަނެއްކާ އެ ވާހަކަ ދައްކާނެ ވަގުތެއް ނެތް ކަމަށާއި، މާޒީ އަށް ބަަލަހައްޓައިގެން ތިބެވެން ނެތް ކަމަށް ވެސް އާޓެޓާ ބުންޏެވެ. 

އެވަޓަންއާ ދެކޮޅަށް އަމިއްލަ ދަނޑުގައި ނިކުންނައިރު، ލީގު ތާވަލްގެ އެއް ވަނައިގައި އާސެނަލް އޮތީ މިހާތަނަށް ކުޅެފައިވާ 30 މެޗުން 67 ޕޮއިންޓާ އެކު އެވެ. އާސެނަލް އަށް ވުރެ އެއް މެޗު މަދުން ކުޅެގެން ދެ ވަނައިގައި މެންޗެސްޓަރ ސިޓީ އަށް ލިބެނީ 60 ޕޮއިންޓެވެ.