ތައުލީމީ ސިޔާސަތުތައް ޒަމާނާ ގުޅޭ ގޮތަށް މުރާޖައާކޮށް ހަރުދަނާ ކުރަން ޖެހޭ: ޚުތުބާ

އިސްލާމީ ތާރީޚުގެ ރަންޒަމާނުގައި ދުނިޔެ ދުށް ފަދަ އިލްމީ މާހިރުންނަށް މިއަދު މި އުންމަތް ބޭނުންވާ ކަމަށާއި، ތައުލީމީ ސިޔާސަތުތައް ޒަމާނާ ގުޅޭ ގޮތަށް މުރާޖައާކޮށް ހަރުދަނާކުރަން ޖެހޭ ކަމަށް ހުކުރު ޚުތުބާގައި ބުނެފި އެވެ.

''ވަށައިޖެހޭ ތައުލީމުގެމަތީގައި އުންމަތް ބިނާކުރާށެވެ'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ވަނީ އައު އަޒުމަކާ އެކު ދިރާސީ އައު އަހަރު ފެށުނުކަން ފާހަގަކޮށްފަ އެވެ. 

މިއީ އައު ބާބެއްކަން ފާހަގަކޮށް ޚުތުބާގައި ބުނީ، އިސްލާމްދީނުގައި ތައުލީމަކީ ހަމައެކަނި ދުންޔަވީ ވަޒީފާއަކަށް ތައްޔާރުވުން ނޫން ކަމަށާއި، އެ ކުދީންގެ ބުއްދިއާއި އަހުލާގަށް ފުރިހަމަކަން ގެނެސްދޭ، ސާލިހު އިންސާނަކު ބިނާކުރުމަށް ފޯރުކޮށްދެވޭ ވަށައިޖެހޭ ތައުލީމަކަށް އެ ތައުލީމާއި ތަރުބިއްޔަތު ވާންޖެހޭ ކަަމަށެވެ. 

މުދައްރިސުން، ދަރިވަރުންގެ ބުއްދި ތަރައްގީ ކޮށްދޭ ފަދައިން، އެ ކުދީންގެ ހިތްތަކުގައި އީމާންކަމާއި މަތިވެރި އަހުލާގެ ބިންގާ އަޅައިދިނުމަށް ޚުތުބާގައި ގޮވާލާފައިވެ އެވެ. އަދި ކޮންމެ މާއްދާއެއް ކިޔަވައިދިން ކަމުގައި ވިޔަސް އިސްލާމްދީނުގެ އަސްލުތަކާއި ތަރަހައިގެ ތެރެއަށް ފެއްތުމަކީ މުދައްރިސުންގެ މަސްއޫލިއްޔަތެއްކަން ހަދާން ކޮށްދީފައިވެ އެވެ.

ދަރިވަރުންނަށް އިޝާރާތްކޮށް ޚުތުބާގައި ވަނީ މުދައްރިސުންނަށް އިހުތިރާމްކޮށް، ވަގުތާއި މަސައްކަތްތައް ރާވައިލައި، ބޭނުމެއް ނެތް ކަންކަމުގައި ވަގުތު ހޭދަނުކުރުމަށް ނަސޭހަތްތެރިވެފަ އެވެ. އުނގެނުމުގެ މަގަކީ، ދިގު އެހާމެ  ބުރަ މަސައްކަތެއް ކަމަށާއި، ނަމަވެސް ސުވަރުގެއަށް މަގު ފަހިކޮށްދޭ، އަޖުރު މަތިވެރި ޖިހާދެއް ކަމަށް ޚުތުބާގައި ބުނެފައިވެ އެވެ. 

މީގެ އިތުރުން ޚުތުބާގައި ބުނީ، ދަރީން މަދަރުސާއަށް ފޮނުވުމުން ބެލެނިވެރީންގެ ޒިންމާ ނުނިމޭ ކަމަށާއި، ހުރިހާ ކަމެއްގައި އެ ކުދީން ރައްކާތެރިކޮށްދޭ އައްޑަނައަކަށް ވާން ޖެހޭ ކަމަށެވެ. އަދި ކަމާބެހޭ އިދާރާތަކުގެ ވެރީން ވެސް ތައުލީމުގެ އަސާސީ ބިންގާތަކަށް ލޮޅުން ނާރާނޭހެން ކަންކަން ތަރުތީބު ކުރުމުގެ މަސައްކަތް ކުރުމަށް ޚުތުބާގައި ގޮވާލާފައިވެ އެވެ. އަދި ތައުލީމީ ސިޔާސަތުތައް ޒަމާނާ ގުޅޭ ގޮތަށް މުރާޖައާކޮށް ހަރުދަނާކުރަން ޖެހޭ ކަމަށް ޚުތުބާގައި ބުނެފައިވެ އެވެ.  

އިސްލާމީ ތާރީޚުގެ ރަންޒަމާނުގައި ދުނިޔެ ދުށް ފަދަ، ދީނީ އިލްމާއި ދުންޔަވީ އިލްމުގެ މާހިރުންނަށް މިއަދު މި އުންމަތް ބޭނުންވާ ކަމަށާއި، އިހުލާސްތެރި، އަމާނާތްތެރި، އަދުލުވެރި، އިލްމުވެރި، ޚުލްގު ހެޔޮ، ގައުމީ މަސްލަހަތު އިސްކުރާ، ހައްގަށް ތަބާވާނޭ އަދުލުވެރި ޖީލެއް ބިނާ ކުރުމަށް އެންމެން އެކުގައި މަސައްކަތް ކުރުމަށް ޚުތުބާގައި ގޮވާލާފައިވެ އެވެ.