މި މުޖުތަމައުގައި މައިންބަފައިން ވެސް ނަމާދަށް ބަންގިގޮވާ އިރު ދަރީންގެ އަތުގައި ހިފައިގެން ގޮސް މިސްކިތާ ކައިރީގައި އޮންނަ ކުޅިވަރު މައިދާންތަކަށް ދޫކޮށްލާ، މިއީ ބިރުވެތިވާން ޖެހޭ ކަމެއް: ޚުތުބާ

މި މުޖުތަމައުގައި މައިންބަފައިން ވެސް ނަމާދަށް ބަންގިގޮވާ އިރު ދަރީންގެ އަތުގައި ހިފައިގެން ގޮސް މިސްކިތާ ކައިރީގައި އޮންނަ ކުޅިވަރު މައިދާންތަކަށް ދޫކޮށްލާ ކަމަށާއި، މިއީ ބިރުވެރިކަމެއް ކަމަށް ހުކުރު ޚުތުބާގައި ބުނެފި އެވެ. 

''ކުޑަކުދީން މިސްކިތަށް އަހުލުވެރިކުރުވުން'' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ،  ނަމާދަކީ ދީނުގެ ތަނބު ކަމަށާއި، މި މަތިވެރި ވާޖިބަށް ތިބާގެ ދަރީން ލޯބި ޖައްސުވައި، ނަމާދަށް ރައްކާތެރިވާ ބަޔެއްގެ ގޮތުގައި ތަރުބިއްޔަތު ކުރަންޖެހޭ ކަމަށެވެ.

ތިބާގެ ފިރިހެން ދަރީން މިސްކިތުގައި ނަމާދު ގާއިމު ކުރުމަށް ލޯބި ޖެއްސުމަށް އެ ކަމުގައި ހުރި ދަރުމަޔާއި ސަވާބުގެ ވާހަކަތައް ކިޔައިދީ މަސައްކަތް ކުރުމަށް ޚުތުބާގައި ގޮވާލާފައިވެ އެވެ.

އަދި ދަރީން ތަރުބިއްޔަތު ކުރުމުގައި އިހުމާލުވެއްޖެ ނަމަ، ތިބާގެ ދިރިއުޅުމުގެ އުފާވެރިކަން ގެއްލި އާޚިރަތުގައި ބޮޑުވެގެންވާ ހިތާމައެއް ނޫނީ ނުލިބޭނެ ކަމަށާއި، ދަރީންނާ މެދު މަސްއޫލުވާން ޖެހޭ ކަމަށް ޚުތުބާގައި ބުނެފައިވެ އެވެ.

ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ ހަދީޘްކުރައްވައިފައިވާ ބަސްފުޅެއްގެ މާނައިގައި ވެ އެވެ. "އަދި ފިރިމީހާއީ އޭނާ ގެ އަނބިދަރީންގެ ބެލެހެއްޓުންތެރިޔާއެވެ. އަދި އެފަރާތްތަކާ މެދު އޭނާއާ ސުވާލުކުރެއްވޭނެއެވެ. އަދި އަނބިމީހާއީ އޭނާ ގެ ފިރިމީހާގެ ގޭގެ ކަންތަކާއި ދަރީންގެ ބެލެހެއްޓުންތެރިޔާއެވެ. އަދި އެ ފަރާތްތަކާ މެދު އޭނާޔާ ސުވާލުކުރެއްވޭނެއެވެ." އެހެންކަމުން ދަރީން ނަމާދަށް އަހުލުވެރިކުރުވަން މަސައްކަތްނުކޮށް، އިހުމާލުވެއްޖެ ނަމަ، ދެމަފިރިން ފާފަވެރިވާނެ އެވެ. 

ހުކުރު ޚުތުބާ 

އަރެމެންގެ ދަރީންނަކީ ނަމާދަށް ލޯބިކުރާ ދަރީންތަކެއް ކަމުގައި ހެދުމަށް އަޅަން ޖެހޭ އެންމެ ފުރަތަމަ ބިންގަލަކީ، އެ ދަރީންގެ މައިންގެ ގޮތުގައި ދީންވެރި ތަގުވާވެރި މައިން އިޚުތިޔާރު ކުރުންްކަން ފާހަގަކޮށް ޚުތުބާގައި ވަނީ ހެޔޮލަފާ ސާލިހު ތަގުވާވެރި ދަރީން ދެއްވުން އެދި މާތް ﷲއަށް ދުއާކުރުން މަތީ ދެމިހުރުމަށް ނަސޭހަތްތެރިވެފަ އެވެ.

މީގެ އިތުރުން މިހާރުގެ މުޖުތަމައު އަށް ނިސްބަތްކޮށް ޚުތުބާގައި ބުނީ، މިއަދު ނަމާދުގެ ވަގުތު ތަކަށް ސަމާލުކަން ދިނުމެއްނެތި ކުޅިވަރު ހަރަކާތްތަކާއި ތަފާތު ޕްރޮގްރާމުތައް އެކިއެކި މުއައްސަސާތަކުން ރާވާ ކަމަށެވެ. ނަމާދު ވަގުތު ފާއިތުވެދާ އިރު ވެސް އަހަރެމެންގެ ދަރީންނާއި ޒުވާނުން އެ ކަމުގެ ތެރޭގައި މަޝްޣޫލު ކުރުވާ ކަމަށާއި، ނަމާދަށް ބަންގިގޮވޭ އިރު މައިންބަފައިން ވެސް، ދަރީންގެ އަތުގައި ހިފައިގެން ގޮސް މިސްކިތާ ކައިރީގައި އޮންނަ ކުޅިވަރު މައިދާންތަކަށް ދޫކޮށްލާ ކަމީ ހިތާމަ ހުރި ކަމެއް ކަމަށެވެ.

ޚުތުބާ ގައި ބުނީ، ތިމާ މީހާ ނަމާދުކޮށްފައި، ނަމާދުތައް ފާއިތުވެދާ އިރު ވެސް ދަރީން ޓީވީ ބެލުމާއި ތަފާތު ގޭމުތައް ކުޅޭން ދޫކޮށްލައިފައި ބައިތިއްބާ ނަމަ ތިބާ މާތް ﷲއަށް ބިރުވެތިވެ ސަމާލުވާން ޖެހޭ ކަަމަށެވެ. އަދި މިފަދަ ކަންކަން ރަނގަޅުކޮށް، ތައުބާވުމަށް ޚުތުބާގައި ވަނީ ގޮވާލާފަ އެވެ.