އީރާންއާ މަޝްވަރާ ކުރުމުގެ ފުރުސަތު އެބަ އޮތް، އެއްބަސްވުމެއް ނެތް ނަމަވެސް ހަނގުރާމަ ހުއްޓިދާނެ: ރޫބިއޯ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ އެންމެ ފަހުގެ މަރުހަލާ އަށް ގޮސްފައިވާ ކަމަށް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ. 

އެގޮތުން އީރާންގެ ވެރިންނާ އެކު ސީދާ ގޮތުން މަޝްވަރާތައް ބޭއްވުމުގެ ފުރުސަތު ވަރަށް ބޮޑު ކަމަށާއި، އެއްބަސްވުމެއް ނެތް ނަމަވެސް ހަނގުރާމަ ހުއްޓިދާނެ ކަމަށް އެމެރިކާ އިން ގެންދަނީ ފާހަގަ ކުރަމުންނެވެ.

އަންގާރަ ދުވަހު އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ، އެމެރިކާ އިން ވަރަށް އަވަހަށް އީރާން އިން ފައިބާނެ ކަމަށެވެ. އެމެރިކާގެ ސިފައިން އީރާން އިން ފޭބުން ދެ ހަފުތާގެ ތެރޭގައި، ނުވަތަ ތިން ހަފުތާ ތެރޭގައި ވެދާނެ ކަމަށް ވެސް ޓްރަމްޕް ވިދާޅުވެފައިވެ އެވެ. 

މީގެ އިތުރުން އެމެރިކާ އިން އީރާންއާ ދެކޮޅަށް ކުރަމުން އަންނަ ހަނގުރާމަ ނިންމުމަށް، ޑިޕްލޮމަސީ ބޭނުންވެދާނެތޯ ނޫސްވެރިން ވަނީ ޓްރަމްޕްއާ ސުވާލު ކޮށްފަ އެވެ. އެ ސުވާލަށް ޖަވާބު ދެއްވަމުން ޓްރަމްޕް ވިދާޅުވެފައި ވަނީ އެކަން ބޭނުން ނުވާ ކަމަށާއި، އެއްބަސްވުމެއް އޮތުން ވެސް ލާޒިމު ނޫން ކަމަށެވެ.

ޓްރަމްޕްގެ އިތުރުން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ފޮކްސް ނިއުސްގެ ޕްރޮގްރާމައެއްގައި ވާހަކަ ދައްކަވަމުން ވިދާޅުވީ، ދެ ޤައުމުގެ ވެރިން ބައްދަލު ކުރައްވައި މަޝްވަރާތައް ބޭއްވުމުގެ ފުރުސަތު އޮތް ކަމަށެވެ. އަދި ރޫބިއޯ ވިދާޅުވީ ހަނގުރާމަ ނިމޭނެ ދުވަހެއްގެ މަލަމަތި ފެންނަން ފަށާފައިވާ ކަމަށެވެ. ނަމަވެސް އެއީ މިއަދު ނުވަތަ މާދަމާ ވެދާނެ ކަމެއް ނޫން ކަމަށާއި، އެކަން ކުރިއަށް އޮތީ ކަމަށް ވެސް ރޫބިއޯ ވަނީ ވިދާޅުވެފަ އެވެ. 

މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އެކުވެގެން އީރާންއާ ދެކޮޅަށް ހަނގުރާމަ ފަށާފައިވާއިރު، އީރާން އިން އަންނަނީ ރައްދުގައި ވަރުގަދަ އަދި ގިނަ ހަމަލާ ތަކެއް ދެމުންނެވެ. އީރާން އިން ދޫ ދިނުމެއް ނެތި ހަމަލާ ދެމުން އަންނައިރު، އެމެރިކާ އިން މިހާރު ބޭނުން ވަނީ ހަނގުރާމަ ނިންމާލުމަށެވެ.