ހަނގުރާމަ ހުއްޓާލުމާ މެދު ނިންމާ ކޮންމެ ނިންމުމެއް ނިންމާނީ، ހަމައެކަނި އިރާނުން ކަނޑައަޅާ ޝަރުތުތަކުގެ މަތިން ކަމަށް ރައީސް ޕެޒެޝްކިއަން ވިދާޅުވެއްޖެ

އެމެރިކާ އާއި ޒަޔަނިސްޓް އިޒްރޭލުން އެ ގައުމާ ދެކޮޅަށް ފަށާފައިވާ އުދުވާނީ ހަނގުރާމަ ހުއްޓާލުމާ މެދު ނިންމާ ކޮންމެ ނިންމުމެއް ނިންމާނީ، ހަމައެކަނި އިރާނުން ކަނޑައަޅާ ޝަރުތުތަކާއި އެ ގައުމުގެ ގައުމީ މަސްލަހަތަށް އިސްކަންދީގެން ކަމަށް އިރާނުގެ ރައީސް މަސްއޫދު ޕެޒެޝްކިއަން ވިދާޅުވެއްޖެ އެވެ.

ހަނގުރާމައިގެ ހާލަތުގައި އިރާނުގެ މަސްރަހު އޮތްގޮތާއި، ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމުގައި ސަރުކާރުގެ އިދާރާތަކުން ކުރަމުންދާ މަސައްކަތްތައް މުރާޖައާކުރުމަށްޓަކައި، ރައީސް ޕެޒެޝްކިއަންގެ ރިޔާސަތުގައި އިރާނުގެ ކެބިނެޓް ބައްދަލުވުމެއް ހޯމަ ދުވަހު ވަނީ ބާއްވާފައެވެ.

މި ބައްދަލުވުމުގައި، ހަނގުރާމައިގެ ޚާއްސަ ހާލަތުގައި ގައުމުގެ މަސްރަހު އޮތްގޮތާއި، ރައްޔިތުންނަށް ބޭނުންވާ އަސާސީ ތަކެތި ފޯރުކޮށްދިނުމުގައި ހުރި ގޮންޖެހުންތަކުގެ އިތުރުން، ސަރުކާރުގެ ވުޒާރާތަކާއި، ޚިދުމަތްދޭ އިދާރާތަކާއި، އެހީތެރިކަން ފޯރުކޮށްދޭ ޖަމިއްޔާތަކުން އަޅަމުންދާ ފިޔަވަޅުތަކާ ގުޅޭގޮތުން ތަފްސީލީ ގޮތެއްގައި މަޝްވަރާކޮށްފައިވެއެވެ.

މީގެއިތުރުން، މެދުކެނޑުމެއް ނެތި ޚިދުމަތްތައް ފޯރުކޮށްދިނުމަށް ކުރެވިފައިވާ އިންތިޒާމުތަކާއި، އަސާސީ މުދާ ލިބުމުގައި ހުރަހެއް ނެތްކަން ކަށަވަރުކުރުމާއި، އާންމު ރައްޔިތުންގެ މެދުގައި ހަމަޖެހުން ގާއިމުކުރުމުގެ އިތުރުން، ގައުމުގެ އެކި ދާއިރާތަކުން ތައްޔާރީ ހާލަތު ވަރުގަދަކުރުމާ ގުޅޭ ރިޕޯޓުތައް ކެބިނެޓްގެ ވަޒީރުން ވަނީ ހުށަހަޅުއްވާފައެވެ.

މި ބައްދަލުވުމުގައި، ދާދިފަހުން އުފެއްދި ފަސް ވޯކިންގ ގްރޫޕެއް ކަމަށްވާ ސަގާފަތާއި މީޑިއާ، އިންފްރާސްޓްރަކްޗަރާއި އުފެއްދުންތެރިކަން، އިގްތިސާދީ، ދިރިއުޅުމުގެ ހާލަތު، އަދި ސިޔާސީ-އިޖުތިމާއީ ކަންކަމާ ބެހޭ ގްރޫޕްތަކުން ދުވަހުން ދުވަހަށް ކުރަމުންދާ މަސައްކަތްތަކުގެ ފުރިހަމަ ރިޕޯޓެއް ވެސް ވަނީ ހުށަހަޅާފައެވެ.

މިހާރު ކުރިމަތިވެފައިވާ ނާޒުކު ހާލަތުގައި ވެސް ރައްޔިތުންނަށް މެދުކެނޑުމެއް ނެތި ޚިދުމަތް ފޯރުކޮށްދިނުމުގައި ހުރިހާ ދާއިރާތަކަކުން ކުރަމުންދާ މަސައްކަތްތަކަށް ރައީސް ޕެޒެޝްކިއަން ވަނީ ޝުކުރު އަދާކުރައްވާފައެވެ. އަދި މި މަސައްކަތްތައް މިގޮތުގައި ކުރިއަށް ގެންދިއުމަށާއި، މުއައްސަސާތަކުގެ މެދުގައި އޮންނަ ގުޅުން ބަދަހިކުރުމުގެ އިތުރުން، އިސްވެރިންނާއި މުވައްޒަފުންގެ މެދުގައި އޮތް ޒިންމާދާރުކަމާއި ގައުމީ ރޫހު ދެމެހެއްޓުމަށް އެމަނިކުފާނު ބާރުއެޅުއްވިއެވެ.

އެމެރިކާއާއި ޒަޔަނިސްޓް އިޒްރޭލުގެ އުދުވާނީ ހަމަލާތަކާ ގުޅިގެން އިރާނަށް ކުރިމަތިވެފައިވާ ނާޒުކު ހާލަތަށް އިޝާރާތްކުރައްވައި ޕެޒެޝްކިއަން ވިދާޅުވީ، ހަރުދަނާ އަދި ގުޅިފައިވާ ނިޒާމެއްގެ ތެރެއިން ޚިދުމަތްތައް ފޯރުކޮށްދިނުމަކީ މި ދަނޑިވަޅުގައި ގައުމީ ސާބިތުކަން ދެމެހެއްޓުމުގެ މައިގަނޑު އެއް ތަނބު ކަމަށެވެ. އަދި ދުޝްމަނުންގެ މައްޗަށް ފަހުގެ ކާމިޔާބީ ލިބެންދެން މި މަސައްކަތްތައް ވަރުގަދަކަމާއެކު ކުރިއަށް ގެންދަންޖެހޭނެ ކަމަށް އެމަނިކުފާނު ވިދާޅުވިއެވެ.

އިރާނުގެ އިސްލާމީ ޖުމްހޫރިއްޔާގެ ހަތިޔާރު އެޅި ފައުޖުތަކުން ގައުމު ދިފާއުކުރުމުގައި ދައްކަމުންދާ ހިތްވަރާއި، އުދުވާނުތަކާ ދެކޮޅަށް ކުރަމުންދާ ވަރުގަދަ މަސައްކަތްތަކަށް ރައީސް ވަނީ ތައުރީފު ކުރައްވާފައެވެ. އެމަނިކުފާނު ސިފަކުރެއްވި ގޮތުގައި އެ ފައުޖުތަކުން ދައްކަމުންދާ ސާބިތުކަމަކީ ގައުމުގެ ފަޚުރުވެރި ތާރީޚުގައި ލިޔެވިގެންދާނެ ރަން އަކުރުތަކެކެވެ. އަދި ގައުމުގެ ސަރަހައްދީ ނިންމުމާއި، ގައުމީ ސަލާމަތާއި، އިސްލާމީ ޖުމްހޫރިއްޔާގެ ބާރުވެރިކަން ދެމެހެއްޓުމުގައި ސިފައިންގެ ދައުރަކީ ނުހަނު މުހިންމު ދައުރެއް ކަމަށް ވެސް ވިދާޅުވިއެވެ.

މީގެއިތުރުން، ވޭތުވެދިޔަ މަހެއްހާ ދުވަހު އިރާނުގެ އިސްލާމީ ނިޒާމާއި، ސިފައިންނާއި، ގައުމުގެ ދިފާއުގައި އާންމު ރައްޔިތުން  ބާއްވަމުންދާ ބޮޑެތި އެއްވުންތަކާއި، އެމީހުން ދައްކަމުންދާ ނަމޫނާ އެއްބައިވަންތަކަމަށް ވެސް ރައީސް ޕެޒެޝްކިއަން ތައުރީފު ކުރެއްވިއެވެ. އެމަނިކުފާނު ވިދާޅުވީ ރައްޔިތުންގެ މި ހޭލުންތެރިކަމާއި ސާބިތުކަމަކީ ގައުމީ އެއްބައިވަންތަކަމުގެ ރަމްޒެއް ކަމަށާއި، މިއީ މިހާރު ކުރިމަތިވެފައިވާ ނާޒުކު ހާލަތުން އަރައިގަތުމަށް ލިބޭ ވަރަށް ބޮޑު ބާރެއް ކަމަށެވެ.

އިރާންގެ ރައީސް ވިދާޅުވީ، ހަނގުރާމަ ހުއްޓާލުމާ ގުޅޭގޮތުން ނިންމާ ކޮންމެ ނިންމުމެއް ނިންމާނީ، ކުރިން ބަޔާންކުރި ހުރިހާ ޝަރުތުތަކަކަށް ރިއާޔަތްކުރުމަށްފަހު، އިރާނުގެ މަތިވެރި ރައްޔިތުންގެ ކަރާމާތާއި، ސަލާމަތާއި، މަސްލަހަތު ކަށަވަރުކުރެވޭނެ އޮނިގަނޑެއްގެ ތެރެއިން އެކަނި ކަމަށެވެ.