2018 ވަނަ އަހަރު ދޫނިދޫގައި ޕްރީ ފެބްރިކޭޓެޑް ސްޓީލް އެވިޑެންސް ބިލްޑިންގ އިމާރާތް ކުރުމުގެ މަސައްކަތް ކުރިއަށް ގެންދިޔައީ މާލިއްޔަތު ގަވާއިދާ ހިލާފަށް: އޮޑިޓް
ކ. ދޫނިދޫގައި އިމާރާތްކުރި އެވިޑެންސް ބިލްޑިންގުގެ މަސައްކަތް ފުލުހުން ކުރިއަށް ގެންގޮސްފައިވަނީ މާލިއްޔަތު ގަވާއިދާ ހިލާފަށް ކަމަށް އޮޑިޓް ރިޕޯޓުން ހާމަވެއްޖެ. ނޭޝަނަލް ޓެންޑަރ ބޯޑަށް ހުށަނާޅައި 9.1 މިލިއަން ރުފިޔާގެ މި މަޝްރޫއު ޕޮލްވެކާ ހަވާލުކޮށްފައިވާތީ، ކުރިއަށް އޮތް ތަނުގައި ކަނޑައެޅިފައިވާ އަގަށްވުރެ ބޮޑު މަސައްކަތްތައް ޓެންޑަރ ބޯޑު މެދުވެރިކޮށް ކުރުމަށް އޮޑިޓަރ ޖެނެރަލް ވަނީ ލަފާދެއްވާފަ.
ފުލުހުންގެ މައި އިދާރާ، ޝަހީދު ހުސައިން އާދަމް ބިލްޑިން. | ރާއްޖެއެމްވީ
ޕޮލިސް ވެލްފެއަރ ކޯޕރޭޝަން (ޕޮލްވެކް) މެދުވެރިކޮށް 2018 ވަނަ އަހަރު ދޫނިދޫގައި ޕްރީ ފެބްރިކޭޓެޑް ސްޓީލް އެވިޑެންސް ބިލްޑިންގ އިމާރާތް ކުރުމުގެ މަސައްކަތް ކުރިއަށް ގެންދިޔައީ މާލިއްޔަތު ގަވާއިދާ ހިލާފަށް ކަމަށް އޮޑިޓް ރިޕޯޓުގައި ބުނެފި އެވެ.
ދިވެހި ފުލުހުންގެ ހިދުމަތުގެ 2021 ވަނަ އަހަރުގެ މާލީ ބަޔާންތަކުގެ އޮޑިޓް އަދި 2018 އިން 2020 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނެފައިވަނީ ކ. ދޫނިދޫގައި ޕްރީ-ފެބްރިކޭޓަޑް ސްޓީލް އެވިޑެންސް ބިލްޑިންގް އެއް އިމާރާތް ކުރުމަށް ދިވެހި ފުލުހުންގެ ޚިދުމަތުން ކުރިއަށް ގެންދިޔަ މަޝްރޫއަކީ ދައުލަތުގެ މާލިއްޔަތު ގަވާއިދާ ހިލާފަށް ހިންގާފައިވާ މަސައްކަތެއްކަމަށެވެ. މި މަސައްކަތް ފުލުހުން ކުރިއަށް ގެންގޮސްފައިވަނީ ނޭޝަނަލް ޓެންޑަރ ބޯޑަށް ހުށަހަޅައިގެން ނިންމަންޖެހޭ ކަންކަން އެ ނޫން މަގަކުން ކުރުމަށް ފަހުގައެވެ.
މި މައްސަލައިގެ ތަފްސީލަށް ބަލާއިރު، 2018 ވަނަ އަހަރު ދޫނިދޫގައި މި އިމާރާތް އެޅުމަށްޓަކައި ފިނޭންސް މިނިސްޓްރީގެ ހުއްދައަށް ފުލުހުން އެދިފައިވެ އެވެ. އެގޮތުން ފުލުހުން ފޮނުވި ސިޓީގައި ބުނެފައިވަނީ، މި މަސައްކަތަށް އިއުލާން ކޮށްގެން ކުރިއަށް ގެންދާނަމަ ގިނަ ދުވަސްތަކެއް ހޭދަވެދާނެ ކަމަށެވެ. އަދި ބޭރުގެ އެކި ފަރާތްތަކުން އަގު ބެލުމަށްފަހު، އެންމެ ރަނގަޅު ހުށަހެޅުމެއްގެ ގޮތުގައި 522,292 އެމެރިކާ ޑޮލަރަށް މި މަސައްކަތް ކޮށްދޭނެ ފަރާތެއް ލިބިފައިވާ ކަމަށާއި، އެ ފަރާތުން 100 އިންސައްތަ އެޑްވާންސް ފައިސާ ދެއްކުމަށް އެދިފައިވާ ކަމަށްވެސް ފުލުހުން ފާހަގަކޮށްފައިވެ އެވެ.
މިކަމާ ގުޅިގެން ފިނޭންސް މިނިސްޓްރީން ދިން ޖަވާބުގައި، މި މަސައްކަތަށް ދިވެހި ފައިސާއިން ޚަރަދުކުރާ ގޮތަށް ހަމަޖައްސައި، އަގު ހޯދުމަށްފަހު އަލުން ހުށަހެޅުމަށް އަންގާފައިވެ އެވެ. އަދި ފައިސާ ދެއްކުމުގައި ދައުލަތުގެ މާލިއްޔަތު ގަވާއިދާ އެއްގޮތަށް އަމަލުކުރުމަށްވެސް މިނިސްޓްރީން އިރުޝާދު ދީފައިވެ އެވެ. އޭގެ ފަހުން ފުލުހުން ވަނީ ޕޮލިސް ވެލްފެއަރ ކޯޕަރޭޝަން (ޕޮލްވެކް) މެދުވެރިކޮށް މި މަސައްކަތް ކުރުމަށް އަގު ހޯދައި، އެ އަގުގައި މަސައްކަތް ކުރިއަށް ގެންދިއުމުގެ ހުއްދައަށް އެދިފަ އެވެ.
ފިނޭންސް މިނިސްޓްރީން ވަނީ ޕޮލްވެކުން ހުށަހެޅި އަގުގައި މަސައްކަތް ކުރިއަށް ގެންދިއުމުގެ ހުއްދަ ދީފަ އެވެ. މި މަޝްރޫއަށް ޖުމްލަ 9,117,099 (ނުވަ މިލިއަން އެއްލައްކަ ސަތާރަ ހާސް ނުވަދިހަ ނުވަ) ރުފިޔާ ޚަރަދުކޮށްފައިވެއެވެ. ނަމަވެސް، ދައުލަތުގެ މާލިއްޔަތު ގަވާއިދުގެ 10.10 ވަނަ މާއްދާގެ (ހ) ގައި ބަޔާންކޮށްފައިވާ ގޮތުން، 1.5 މިލިއަން ރުފިޔާއަށް ވުރެ ބޮޑު މަސައްކަތްތައް ހަވާލުކުރާނެ ފަރާތެއް ހޯދަންވާނީ ނޭޝަނަލް ޓެންޑަރ ބޯޑަށް ހުށަހަޅައިގެން އެ ބޯޑުން ނިންމާ ގޮތެއްގެ މަތިންނެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، މި މަސައްކަތް ކުރިއަށް ގެންގޮސްފައިވަނީ މާލިއްޔަތު ގަވާއިދާ އެއްގޮތަކަށް ނޫނެވެ. އެގޮތުން 1.5 މިލިއަން ރުފިޔާއަށް ވުރެ އަގުބޮޑު މިފަދަ މަޝްރޫއެއް ޓެންޑަރ ބޯޑަށް ހުށަނާޅައި ކުރިއަށް ގެންދިއުމަކީ ގަވާއިދާ ހިލާފު ކަމެކެވެ.
މިކަން އިސްލާހު ކުރުމަށް ދީފައިވާ ލަފާގައި ބުނެފައިވަނީ، ދައުލަތުގެ މާލިއްޔަތު ގަވާއިދުގެ 10.33 ވަނަ މާއްދާގެ (ބ) ގެ 1 ވަނަ ނަންބަރުގައިވާ ގޮތުގެ މަތިން، މަޝްރޫއެއްގެ އަންދާޒާ އަގު 5,000,000 (ފަސް މިލިއަން) ރުފިޔާއަށް ވުރެ މަތިވާނަމަ، އެ މަސައްކަތެއް ނޭޝަނަލް ޓެންޑަރ ބޯޑަށް ހުށަހަޅައިގެން ކުރިއަށް ގެންދިއުމަށް ދަންނަވާ ކަމަށެވެ. މިއީ ކުރިއަށް އޮތް ތަނުގައި މިފަދަ މައްސަލަތައް ތަކުރާރުވިޔަ ނުދިނުމަށްޓަކައި އެޅޭނެ މުހިންމު ފިޔަވަޅެއް ކަމަށްވެސް ފާހަގަކޮށްފައިވެ އެވެ.
