ސިއްރު ކަޅު ފޮއްޓަކަށް ލާ ތަޅުލާފައިވާ މި ސަރުކާރުގެ މާލީ ހާލަތު

"ފައިސާ ޗާޕު ނުކޮށް އިގްތިސާދު ހަމަ މަގަށް އަޅުވާނަން" މިއީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމުގެ ކުރިންނާއި، ވެރިކަމަށް ވަޑައިގަތުމަށްފަހު ވެސް އަދި މިހާރު ވެސް އެންމެ އަޑުހަރުކޮށް ވިދާޅުވާ އެއް ވާހަކައެވެ. އިގްތިސާދުގެ ވާހަކައެއް ތަނަކު ހަމަ ދައްކާލާ އިރަށް ރައީސް މުއިއްޒުގެ މި ސަރުކާރުގެ "ޑިފެންސް" އަކަށް އެ ޖުމްލަ ވެގެންދެ އެވެ.  ނަމަވެސް ހަގީގަތުގައި މި ރާއްޖެ އިން ފެންނަ މަންޒަރުތަކަށް ބަލާއިރު، މިއީ ހަމައެކަނި ރައްޔިތުންގެ ލޮލުގައި އަނދުން އެޅުވުމަށް ދައްކާ ވާހަކައެއް ކަން ރައްޔިތުން މިއަދު ގަބޫލު ކުރެ އެވެ.

މަރުކަޒީ ބޭންކުގެ މިނިވަންކަން ކަތިލައި، ރައްޔިތުންގެ ޕެންޝަން ފައިސާއަށް އަތްބާނައި، ތަޖުރިބާކާރުން މަގާމުތަކުން ބޭރުކުރަމުންދާއިރު މުއިއްޒުގެ ސަރުކާރުން ހީލަތްތެރި ގޮތަކަށް ފައިސާ ޗާޕުކުރުމުގެ ގޮތުން ކުރިއަށް ގެންދަން އުޅޭ 2.4 ބިލިއަން ރުފިޔާގެ މުއާމަލާތަށް ޕެންޝަން އޮފީހުގެ ބޯޑުން ވަނީ ރުހުން ދީފަ އެވެ. 

ޕެންޝަން ފަންޑަކީ ޚާއްޞަ ބޭނުމަކަށް އުފައްދާފައިވާ ފަންޑެކެވެ.  އޭގެ ބޭނުމަކީ އެ ފައިސާ ރައްކާކޮށް ދޮށީ އުމުރުގައި ޕެންޝަނެއްގެ ގޮތުގައި ދިނުމެވެ. މިއީ އިޖްތިމާއީ ރައްކާތެރިކަމަށް ކޮންމެހެން ބޭނުންތެރި ކަމެކެވެ. ނަމަވެސް މި ސަރުކާރުން މި ވަނީ މިކަމަށް ރައްކާކުރާ ފައިސާއަކީ ސަރުކާރުގެ ޚަރަދުތައް ފޫބައްދާ "ޖީބަކަށް" ހަދާފަ އެވެ. މި ނުރައްކާތެރި މުއާމަލާތާ ދެކޮޅަށް ތެދުވި ޕެންޝަން އޮފީހުގެ މުޅި އިސް ސަފު މިއަދު ވަނީ އިސްތިއުފާ ދެއްވާފައެވެ.

ޕެންޝަން ބޯޑުގެ ޗެއާޕާސަން ޑރ. އަހުމަދު އިނާޒް އިސްތިއުފާ ދެއްވީ ދިވެހި ދައުލަތުގެ މާލީ ހާލަތު ކަންބޮޑުވާ މިންވަރަކަށް ދަށަށް ދާ ދަނޑިވަޅެއްގައި ސަރުކާރުން ހުށަހަޅާފައިވާ 2.4 ބިލިއަން ބޮންޑުގެ މައްސަލައިގައި ގިނަގުނަ މަޝްވަރާތަކުން ވެސް ދެމެހެއްޓެނިވި ހައްލެއް ހޯދުނު ކަމަށް ގަބޫލް ނުކުރެއްވޭ ކަމަށް ވިދާޅުވެ އެވެ. އެ އޮފީހުގެ ސީއީއޯ ސުޖާތާ ހަލީމް އިސްތިއުފާ ދެއްވިއިރު އެ އޮފީހުގެ ސީއެފްއޯ ހައްވާ ފަޖުވާ، ބޯޑު މެންބަރު އަހުމަދު ސަރުވަޝް އަދި ބޯޑު މެންބަރު މާދިން ލަތީފް ވެސް ވަނީ އިސްތިއުފާ ދެއްވާފަ އެވެ. 

މަރުކަޒީ ބޭންކަކީ ސަރުކާރުގެ މާލީ އަޅަކަށް ހެދުމުގެ މަސައްކަތް މިހާރު ވަނީ ނިމިފަ އެވެ. ގަވަރުނަރު އަހުމަދު މުނައްވަރުގެ ދަށުން، ބޭންކުގެ މިނިވަންކަން ދަމަހައްޓަން މަސައްކަތްކުރި ތަޖުރިބާކާރުން ވަނީ ބޭރުކޮށްފަ އެވެ. އެ އޮތޯރިޓީގައި 25 އަހަރަށްވުރެ ގިނަ ދުވަހު ޚިދުމަތްކުރެއްވި މަރިޔަމް ހުސައިން ދީދީ އާއި، އިދުހާމް ހުސައިން އަދި މަރިޔަމް ޝިފާ ވަނީ ކުއްލި ގޮތަކަށް މަގާމުން ވަކިކޮށް، އެ ބޭފުޅުން ތިއްބެވި މަގާމުތައް ވެސް އުވާލާފަ އެވެ.

ސަރުކާރުން ބުނަނީ އެ ބޭފުޅުންގެ ލަފާ ބޭނުންނުވާ ކަމަށެވެ. ނަމަވެސް ހަގީގަތަކީ، ސަރުކާރުގެ ގޯސް ނިންމުންތަކަށް ފަންނީ ގޮތުން "ނޫނެކޭ" ބުނާނެ މީހަކު އެތަނުގައި ބަހައްޓަން ސަރުކާރުން ބޭނުން ނުވުމެވެ. މިއަދު މިކަމާ ވިސްނާލައިފި މީހަކު މިކަން ގަބޫލު ކުރާނެ އެވެ. 

މީގެ އިތުރުން ރައްޔިތުންނަށް އެއްވެސް މައުލޫމާތެެއް ހާމަ ކުރުން މި ސަރުކާރުން މި ވަނީ ހުއްޓާލާފަ އެވެ. ފިނޭންސް މިނިސްޓްރީ އިން ހަފުތާއަކު އެއްފަހަރު ނެރޭ މާލީ ރިޕޯޓުތައް ނެރުން ވަނީ އެތައް ފަހަރަކު މެދުކަނޑާލާފަ އެވެ. މި އަހަރުގެ މިހާތަނަށް ވެސް އެންމެ ރިޕޯޓެއް ހާ ހިސާބުވެސް އާންމު ކޮށްފައެއް ނެތެވެ. ސަރުކާރުގެ އިސްރާފު ބޮޑުވެ، ސިޔާސީ މަގާމުތަކަށް ކުރާ ޚަރަދު އިތުރުވަމުންދާއިރު، އެ މައުލޫމާތުތައް ރައްޔިތުންނަށް ގަސްތުގައި ފޮރުވުމަށް ވެސް ދަނީ ކެނޑިނޭޅި މަސައްކަތް ކުރަމުންނެވެ. ސަރުކާރުގެ މާލީ ހާލަތު އޮތީ ހަމަ ރަނގަަޅަށް ވެސް "ސިއްރު" ކަޅު ފޮއްޓަކަށް ލާ ތަޅުލާފަ އެވެ.

ރައީސް މުއިއްޒުގެ ސަރުކާރުން ދައްކާ "އިގްތިސާދީ އުޖާލާ" މަންޒަރަކީ ހަމައެކަނި ޕްރޮޕެގަންޑާއެކެވެ. ރައްޔިތުންނަށް ކާޑުގެ ބާވަތްތަކުން ދެމުން އައި ސަބްސިޑީ ކަނޑާލައި، ޓެކްސް ބޮޑުކުރަމުންދާއިރު، ސަރުކާރުން ދަނީ ނުސީދާ މަގުން ފައިސާ ޗާޕުކޮށް ޕެންޝަން ފަންޑު ހުސްކުރަމުންނެވެ. މިއަދު މިފެންނަނީ މުއައްސަސާތަކުގައި ބޮޑު ތަޅު އަޅުވަމުންދާ ތަނެވެ. ޕެންޝަން އޮފީހާއި އެމްއެމްއޭ އިން ތަޖުރިބާކާރުން އިސްތިއުފާ ދިނުމަކީ، ގައުމު އިގްތިސާދީ ގޮތުން ފުނޑިގެންދާކަމުގެ އެންމެ ބޮޑު އިންޒާރެވެ.