ސޫޒަންގެ ކެނޑިޑެންސީ ބަލައިގަންނަން ސުޕްރީމް ކޯޓުން އަމުރުކޮށްފި

ލޯކަލް ކައުންސިލް އިންތިހާބުގައި ކ. ތުލުސްދޫ ކައުންސިލްގެ އަންހެން މެންބަރު ކަމަށް އަމިއްލަ ގޮތުން ކުރިމަތިލާން ހުށަހެޅި ފާތިމަތު ސޫޒަންގެ ކެނޑިޑެންސީ ބަލައިގަންނަން ސުޕްރީމް ކޯޓުން އިލެކްޝަންސް ކޮމިޝަނަށް އަމުރުކޮށްފި އެވެ.

ޝަރުތު ހަމަނުވާ ކަމަށް ބުނެ އިލެކްޝަންސް ކޮމިޝަނުން ސޫޒަންގެ ކެންޑިޑޭސީ ބަލައިނުގަންނަން ނިންމާފައިވާއިރު، އެ ނިންމުން ބާތިލުކޮށް އޭނާގެ ކެނޑިޑެންސީ ބަލައިގަންނަން ސުޕްރީމް ކޯޓުން އަމުރުކޮށްފައިވަނީ 3 ފަނޑިޔާރުންގެ އިއްތިފާގުން ނިންމާފައިވާ ހުކުމެއްގަ އެވެ.

އަންނަ އޭޕްރީލް މަހުގެ ހަތަރުވަނަ ދުވަހު އޮންނަ ލޯކަލް ކައުންސިލްގެ އިންތިހާބާއި ގުޅޭ ގޮތުން، ކ. ތުލުސްދޫ، ލަކުސަވީ، ފާތިމަތު ސޫޒަން ސުޕްރީމް ކޯޓަށް މައްސަލަ ހުށަހެޅީ އިލެކްޝަންސް ކޮމިޝަނުން އޭނާގެ ކެންޑިޑެންސީ ބަލައިނުގަންނަން ނިންމުމާއި ގުޅިގެންނެވެ. 

އިލެކްޝަންސް ކޮމިޝަނުން ސޫޒަންގެ ކެންޑިޑޭސީ ބަލައިނުގަންނަން ނިންމީ ދަރަނީގެ މައްސަލައަކާ ގުޅިގެންނެވެ. އެ މައްސަލައިގައި ފާހަގަކުރެވުނު ގޮތުގައި ތުލުސްދޫ ކޯޓުން ސޫޒަންގެ މައްޗަށް ދަރަންޏެއް ދައްކަން ހުކުމް ކޮށްފައިވާއިރު، އެ ދަރަނީގެ ރެކޯޑް ފިނޭންސް މިނިސްޓްރީއަކު ނެތް ކަމަށް ސުޕްރީމް ކޯޓުން ފާހަގަކުރި އެވެ.

ތިން ފަނޑިޔާރުން އިއްތިފާގުވި ހުކުމުގައި ބުނެފައިވަނީ އެ ދަރަނި ހޯދަން ތަންފީޒީ މައްސަލަ ހުށަހެޅުމާއި ރެކޯޑް ބެލެހެއްޓުމަކީ ފިނޭންސް މިނިސްޓްރީގެ ޒިންމާއަކަށް ވާއިރު، އެކަން ނުކޮށް އޮތުމަކީ ސޫޒަން ދަރަނި ދައްކާ ހަލާސްކޮށްފައި ނުވާ ކަމަށް ބެލޭނެ ހަމައެއް ނޫން ކަމަށެވެ. އެހެންވެ، ސޫޒަން އަކީ އިންތިހާބަށް ކުރިމަތިލާން ޝަރުތު ހަމަވާ މީހެއް ކަމަށް ސުޕްރީމް ކޯޓުން ކަނޑައަޅާ ކަމުގަ އެވެ.

މި މައްސަލަ ބެއްލެވީ ފަނޑިޔާރު އަބްދުﷲ ހަމީދު، ޑރ. މުހައްމަދު އިބްރާހީމް އަދި އަލީ ރަޝީދު ހުސެއިން ހިމެނޭ ތިން ފަނޑިޔާރުންގެ ބެންޗަކުންނެވެ. 

މި ހުކުމާއެކު ސޫޒަން އަށް އަންނަ އޭޕްރީލް މަހުގެ ހަތަރުވަނަ ދުވަހު އޮންނަ ލޯކަލް ކައުންސިލް އިންތިހާބުގައި ކ. ތުލުސްދޫ ކައުންސިލްގެ އަންހެން މެންބަރު ކަމަށް އަމިއްލަ ގޮތުން ވާދަކުރުމުގެ ފުރުސަތު ލިބިގެންދާނެ އެވެ.