ފުލުހުން ގެ ބެލުމުގެ ދަށުގައި ހުރި ހުއިފިލަނޑާ ގެ ބާވަތް ތަކެއްކަމަށްވާ ހުދު ކިރު، އެލިފަންޓް އަދި ބުއްފުޅި ނީލަން ކިޔަނީ
ނީލަމުގައި ރަޖިސްޓްރީ ވުމުގެ އެންމެ ފަހު ވަގުތަކީ 2026 ފެބުރުވަރީ 15 ވާ އާދިއްތަ ދުވަހުގެ ހެނދުނު 11:00. މި ނީލަން ކުރިއަށް ގެންދިއުމަށް ހަމަޖެހިފައިވަނީ 2026 ފެބުރުވަރީ 16 ވާ ހޯމަ ދުވަހުގެ ހެނދުނު 10:00 ގައި ދޫނިދޫގަ.
އެކި ބާވަތްތަކުގެ ހުއިފިލަނޑާ: ފުލުހުން ކުރިޔަށް ގެންދާ ނީލަމުގައި 8 ބާވަތެއްގެ ހުއިފިލަނޑާ ވިއްކުމަށް ވަނީ ހަމަޖެހިފަ | ގެޓީ އިމޭޖަސް
ދިވެހި ފުލުހުންގެ ޚިދުމަތުގެ ބެލުމުގެ ދަށަށް ގެނެވިފައިވާ ގިނަ އަދަދެއްގެ ހުއިފިލަނޑާތަކެއް ދުވަހު ނީލަމުގައި ވިއްކާލުމަށް ނިންމައިފި އެވެ.
ފުލުހުންގެ އިދާރާއިން ހާމަކޮށްފައިވާ ގޮތުގައި މި ނީލަމުގައި 8 ބާވަތެއްގެ ހުއިފިލަނޑާ ވިއްކުމަށް ވަނީ ހަމަޖެހިފަ އެވެ.
ހޯމަ ދުވަހު ފުލުހުން ކުރި އިއުލާނެއްގައި ބުނެފައިވަނީ، ނީލަމުގައި ވިއްކާލުމަށް ހަމަޖެހިފައިވާ ކޮންމެ ބާވަތެއްގެ ހުއިފިލަނޑާ އެއް ވެސް ވިއްކަން ފަށާނެ އެންމެ ކުޑަ އަގަކީ ކިލޯއަކަށް 300 ރުފިޔާ ކަމަށެވެ. މި ނީލަމުގައި ހިމެނޭ ހުއިފިލަނޑާގެ ބާވަތްތަކުގެ ތެރޭގައި މުށި، ހޮޅި، ކަރީ ފިޝް، ހުދު ކިރު، ކަޅު ކިރު، އިލަފަންޓް، ކަށި އަދި ބުއްފުޅި ހިމެނެ އެވެ.
މި ނީލަމުގައި ބައިވެރިވުމަށް ޝައުގުވެރިވާ ފަރާތްތަކުން އެންމެ ފުރަތަމަ ޖެހެނީ ނީލަމުގައި ރަޖިސްޓްރީވާށެވެ. އެގޮތުން، އިޢުލާނާއެކު އާންމުކޮށްފައިވާ "ނީލަމުގައި ރަޖިސްޓަރީވާ ފޯމް" ފުރިހަމަ ކުރެއްވުމަށްފަހު، ދިވެހި ރައްޔިތެއްކަން އަންގައިދޭ ކާޑުގެ ކޮޕީއަކާއެކު finance.asset@police.gov.mv ނުވަތަ am_c2096@police.gov.mv އަށް މެއިލް ކުރަންޖެހެއެވެ. މެއިލް ލިބުމުން، ރަޖިސްޓްރީވިކަމުގެ ކަށަވަރު މެއިލެއް ފުލުހުންގެ އިދާރާ އިން ފޮނުވާނެ އެވެ.
ނީލަމުގައި ރަޖިސްޓްރީ ވުމުގެ އެންމެ ފަހު ވަގުތަކީ 2026 ފެބުރުވަރީ 15 ވާ އާދިއްތަ ދުވަހުގެ ހެނދުނު 11:00 އެވެ. ފުލުހުން ބުނީ ކަނޑައެޅިފައިވާ ވަގުތުގެ ފަހުން ހުށަހަޅާ އެއްވެސް ފޯމެއް ބަލައިނުގަނެވޭނެ ކަމަށާއި، ނީލަމުގައި ބައިވެރިވެވޭނީ ހަމައެކަނި ރަޖިސްޓްރީވުމަށް އެދި ފޯމް ހުށަހަޅާފައިވާ ފަރާތްތަކަށް އެކަނި ކަމަށެވެ.
މި ނީލަން ކުރިއަށް ގެންދިއުމަށް ހަމަޖެހިފައިވަނީ 2026 ފެބުރުވަރީ 16 ވާ ހޯމަ ދުވަހުގެ ހެނދުނު 10:00 ގައި ދޫނިދޫގަ އެވެ. ނީލަމުގައި ބައިވެރިވާ ފަރާތްތަކުން އެ ދުވަހުގެ ހެނދުނު 10:00 އަށް މާލޭގެ 3 ނަންބަރު ޖެޓީ (ޝަހީދު ޙުސެއިން އާދަމް ބިލްޑިންގ ކުރިމަތި) އަށް ހާޒިރުވާން ޖެހެ އެވެ. ނީލަން ކިޔުމަށް ހަމަޖެހިފައިވަނީ ހާޒިރުވާ ފަރާތްތަކުގެ ކުރިމަތީގައި އަނގަބަހުން އަގު ހުށަހަޅާ އުސޫލުންނެވެ.
ނީލަމަށް ހާޒިރުވާއިރު ދިވެހި ރައްޔިތެއްކަން އަންގައިދޭ ކާޑުގެ ކޮޕީއެއް ގެންނަން ޖެހޭނެ ކަމަށް ފުލުހުން ބުނެ އެވެ. އަދި ގަޑި ޖެހުމަށްފަހު ހާޒިރުވާ ފަރާތްތަކަށް ނީލަމުގައި ބައިވެރިވުމުގެ ފުރުސަތު ނުލިބޭނެ ކަމަށް ވެސް އެ އިދާރާއިން ހާމަކުރެ އެވެ. މި ނީލަމާ ގުޅޭ އިތުރު މަޢުލޫމާތު ހޯދުމަށް ބޭނުންވާ ފަރާތްތަކުން ސާޖަންޓް މުޙައްމަދު ފަހުމީގެ ނަންބަރު 9735160 އަށް ގުޅުއްވުމަށް ފުލުހުން ވަނީ އެދިފަ އެވެ.
