ކުނި ޕިކަޕް މަރާމާތު ކުރުމަށް ބޭނުންވާ ސާމާނު ގަތުމަށް 68 ހާސް ރުފިޔާ ހަރަދުކޮށްފައި ފ. ނިލަންދޫ ކައުންސިލްގެ ރައީސް ވަޑައިގަތީ ލަންކާ އަށް

ކުނި ޕިކަޕް މަރާމާތު ކުރުމަށް ބޭނުންވާ ސާމާނު ގަތުމަށް 68 ހާސް ރުފިޔާ ހަރަދުކޮށްފައި ފ. ނިލަންދޫ ކައުންސިލްގެ ރައީސް އަލީ އަހުމަދު ލަންކާ އަށް ވަޑައިގެންނެވި ކަމަށް އޮޑިޓް ރިޕޯޓުގައި ބުނެފި އެވެ. 

ފ. ނިލަންދޫ ކައުންސިލްގެ 2023 ވަނަ އަހަރުގެ ކޮމްޕަލަޔަންސް އޮޑިޓް ރިޕޯޓުގައި ބުނެފައިވަނީ ފ. ނިލަންދޫ ކައުންސިލް އިދާރާގެ ކުނީގެ މަސައްކަތަށް ބޭނުންކުރާ ވެހިކަލްތައް މަރާމާތު ކުރުމަށް ބޭނުންވާ ސާމާނު ގަތުމަށް ކައުންސިލްގެ ރައީސް އަލީ އަހުމަދު އަދި މަރާމާތު ކުރުމުގެ މަސައްކަތް ކުރުމަށް ކައުންސިލުން ހޯދި ސްރީ ލަންކާ ރައްޔިތެއް 2023 ވަނަ އަހަރުގައި ލަންކާ އަށް ކޮށްފައިވާ ދަތުރެއް ކަމަށެވެ. 

އޮޑިޓްގައި ބުނެފައިވަނީ ދަތުރަށް ހޭދަވެފައިވަނީ 68،435 ރުފިޔާ ކަމަށް ދަތުރު ރިޕޯޓާއި އެހެނިހެން ލިޔެކިޔުންތަކުން ފާހަގަވާ ކަމަށެވެ. އެގޮތުން ކައުންސިލްގެ ރައީސް 19 ސެޕްޓެމްބަރު 2023 އިން 21 ސެޕްޓެމްބަރު 23 ގެ ނިޔަލަށް 3 ދުވަސް އަދި ސްރީލަންކާ މީހާ 14 ސެޕްޓެމްބަރު 2023 އިން 21 ސެޕްޓެމްބަރު 2023 ގެ ނިޔަލަށް 8 ދުވަސް ލަންކާގައި މަޑުކޮށްފައިވެ އެވެ. 

އޮޑިޓުގައި ބުނީ މި ދަތުރަކީ ފިނޭންސް މިނިސްޓްރީގެ ހުއްދައަކާ ނުލާ ބޭރު ގައުމަކަށް ކޮށްފައިވާ ދަތުރެއް ކަމަށެވެ. އަދި މި ދަތުރު ކޮށްފައިވަނީ ދައުލަތުގެ މާލިއްޔަތު ގަވާއިދުުގެ 6.01 ވަނަ މާއްދާގެ (ނ) ގެ 1 ވަނަ ނަންބަރުގައި ދައުލަތުގެ އެއްވެސް އެކައުންޓަކުން ފައިސާއެއް ދައްކާނަމަ، ދައްކަންވާނީ އެގަވާއިދާއި އެއްގޮތްވާ ގޮތުގެ މަތިން ޕޭމަންޓް ވައުޗަރުު ތައްޔާރުު ކުރުމަށްފަހުގައި ކަމަށް ބަޔާންކޮށްފައިވެ އެވެ. ނަމަވެސް ފ. ނިލަންދޫ ކައުންސިލް އިދާރާއިން ވެހިކަލްތައް މަރާމާތުކުރުމަށް ބޭނުންވާ ސާމާނު ގަތުމަށް ލަންކާއަށް ދިއުމަށް ޚަރަދުު ކޮށްފައިވަނީ ޕޭމަންޓް ވައުޗަރު ތައްޔާރު ނުކޮށް ކަމަށް އޮޑިޓުގައި ބުނެފައިވެ އެވެ.

މި ދަތުރަށް ދެ މީހުންގެ ޓިކެޓުގެ ހަރަދާއި، ކެއުމާއި ހުރުމުގެ ހަރަދުގެ އިތުރުން ސާމާނު ގަތުމުގެ ހަރަދު އަދި މި ނޫންވެސް އެހެނިހެން ހަރަދުތައް ކުރުމަށްފަހު ވެސް ރާއްޖެއިން މި ތަކެތި ހޯދުމަށް ކުރަންޖެހޭ ހަރަދަށް ވުރެ ކުޑަ އަދަދެއް ހޭދަވާނެ ކަމަށް ކައުންސިލްގެ ރައީސް ވިދާޅުވެފައިވެ އެވެ. މި ދަތުރު ކުރި އިރު ލަންކާއިން ގަނެފައިވާ ތަކެއްޗަށް ރާއްޖެއިން ކޯޓޭޝަން ހޯދާފައި ނުވެ އެވެ. 

އޮޑިޓުގައި ބުނެފައިވަނީ ލަންކާ އިން ގަނެފައިވާ ސާމާނުގެ އަގު ރާއްޖެއިން ބަލާފައިވާކަމުގެ އެއްވެސް ލިޔެކިޔުމެއް އޮޑިޓަށް ލިބިފައި ނުވެ އެވެ. އަދި އެއްފަހަރާ ގިނަ ސާމާނު ގަންނަން ބޭރު ގައުމަކަށް ދަތުރުކުރުމުގެ ކުރިން ރާއްޖޭގެ އަގުތައް ބެލުމަށް އިއުލާނުކޮށް އެންމެ ހެޔޮ އަގު ހޯދަން އެންމެ އެކަށީގެންވާ ވަރަށް މަސައްކަތް ކޮށްފައި ނުވާ ކަމަށް ވެސް އޮޑިޓްގައި ބުނެފައިވެ އެވެ. އެހެންކަމުން މި ދަތުރަކީ ކޮންމެހެން ކުރަންޖެހޭ ދަތުރެއް ކަމާއި ލަންކާ އިން ސާމާނު ގަނެފައިވާ އަގަކީ އެންމެ ހެޔޮ އަގުގައި ގަނެފައި ހުރި ސާމާނުކަން ކަށަވަރު ނުކުރެވޭކަން އޮޑިޓުގައި ފާހަގަކޮށްފައިވެ އެވެ.