ދަރިފުޅާ ދެކޮޅަށް ހުރި ހެކި ނައްތާލިކަން ފަރުހާދުގެ މައްޗަށް ސާބިތު ނުވޭ: އިހުސާން

ދަރިފުޅު ދިފާއުކުރަން ހެކި ނައްތާލިކަމުގެ ތުހުމަތު ކުރެވުނު ފަރުހާދު ފިކުރީގެ މައްޗަށް އޮތް ތުހުމަތު ސާބިތު ނުވާ ކަމަށް  ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.

ފަރުހާދުގެ މައްޗަށް މަގާމުގެ ނުފޫޒު ބޭނުންކުރި ކަމުގެ ތުހުމަތު ކޮށްފައިވާއިރު، އޭނާގެ ދަރިފުޅުގެ މައްޗަށް ކުރެވުނު ތުހުމަތަކާ ގުޅޭ ހެކިތައް ނައްތާލި ކަމަށް ބުނާ މައްސަލަ އެއްވެސް ހިމެނެ އެވެ. މި މައްސަލަތައް މަޖިލީހުގެ 241 ކޮމިޓީއަށް ވެސް ހުށަހެޅިފައިވެ އެވެ. ނަމަވެސް އެ ކޮމިޓީ އިން އަދި މި މައްސަލައިގެ ގޮތެއް ނިންމާފައި ނުވެ އެވެ. 

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ބޮޑެތި ތުހުމަތުތަކެއް އޮތް ފަރާތަކަށް ފުލުހުންގެ މުއައްސަސާގެ ހިންގުން ހޯމްލޭންޑް މިނިސްޓަރު އަލީ އިހުސާން ހަވާލު ކުރެއްވީ ކީއްވެގެންތޯ ރާއްޖެޓީވީ އިން ސުވާލު ކުރުމުން މިނިސްޓަރު އިހުސާން ވިދާޅުވީ ކޮމިޝަނަރެއް ނެތިއްޖެ ޙާލަތުގައި އެ ވަގުތު ހުންނެވި އެންމެ ޑެޕިއުޓީ ކޮމިޝަނަރެއް ކަމަށް ވެއްޖެއްޔާ ގާނޫނުގައި، ފުލުހުންގެ މުއައްސަސާ ހިންގަން ހަވާލުވެވަޑައިގަންނަވާނީ ޑެޕިއުޓީ ކޮމިޝަނަރުކަން ދިވެހި ފުލުހުންގެ ޚިދުމަތުގެ ގާނޫނުގައި ވަރަށް ސާފުކޮށް ބަޔާންކުރާނެ ކަމަށެވެ. އެހެންކަމުން އެއީކީ އޭނާ ހަވާލުކުރަންޖެހޭ ޙާލަތެއް ނޫން ކަމަށެވެ. 

އެހެންވީމާ، މި ފަހުން ކޮމިޝަނަރ ނަވީން އިސްތިޢުފާދެއްވި ފަހުން އަޅުގަނޑުމެން ވަކިން ހަވާލުނުކުރަން އެއްވެސް ބޭފުޅަކަށް. އަދި އެ ވާހަކައެއް ދައްކާފައި ވެސް ނޯންނާނެ. އެއީ،  ގާނޫނުގައި އޮޓަމެޓިކުން އިންނަ އިޖުރާއަތެއް އެކްޓިވޭޓްވެގެން، ފުލުހުންގެ މުއައްސަސާގެ ވަގުތު އިންނަވައި، ޑެޕިއުޓީ ކޮމިޝަނަރެއް އެ މަޤާމަށް ހަވާލުވެވަޑައިގަންނަވާނެ. ދެން އޮތީ، ޑެޕިއުޓީ ކޮމިޝަނަރުކަމަށް ޢައްޔަންކުރެވުނު އިރުގައި، ކީއްވެގެންތޯ އަޅުގަނޑުމެން މި ފަށައިފި ކުރީ، ޑެޕިއުޓީ ކޮމިޝަނަރަކަށް ޢައްޔަންކުރިއިރުގައި ތުހުމަތުތަކެއް އޮއްވާ ކުރީ. ދިވެހިރާއްޖޭގެ ގާނޫނުތަކުގައި މީހެއްގެ މައްޗަށް ކަމެއް ތުހުމަތުކުރެވުނީމަ ޢަމަލުކުރަންޖެހޭ ރާއްޖޭގެ ތިން މުއައްސަސާތައް ތުރޫކޮށްވެސް ބެލެވިފައި، އެއިން އެއްވެސް ކަމެއްގައި ފަރުޚަތުކުރާ ދޭތެރޭގައި އަޅަންޖެހޭ ފިޔަވަޅެއް ކަމަށް ތަނުން ވަކިކުރުމަށް ނުވަތަ ޕްރޮމޯޝަން ހިފެހެއްޓުމަށް ކަނޑައަޅާފައެއް ނެތް. އޭތި ދެންނެވި ބާވަތުގެ މައްސަލަތައް ތަޙުޤީޤުކޮށް ބެލި، އެ މައްސަލަތަކުން ވަނީ އެގްޒަނަރޭޓްކޮށްފައި. މާނައަކީ އެ މައްސަލަތަކަކީ އެ ފަރާތުގެ މައްޗަށް ސާބިތުވާ މައްސަލައެއް ނޫން ކަމަށް ކަނޑައަޅުއްވާފައި ހުރީ. މި މައްސަލަތައް ބަލާ އިންސްޓިޓިއުޝަންސްތަކުން. 

ހޯމްލޭންޑް މިނިސްޓަރު އަލީ އިހުސާން 

މިނިސްޓަރު އިހުސާން ވިދާޅުވީ ކުރާ ތުހުމަތުތައް ރަނގަޅަށް ބަލައި، އޭގެތެރެއިން ފިޔަވަޅެއް އަޅަންޖެހެންޏާ ފިޔަވަޅެއް އަޅާނެ ކަމަށެވެ. އަދި މައްސަލަތައް ބަލައި ފިޔަވަޅަށް ނުޖެހޭ ފަރާތަކާ ދޭތެރޭގައި ބޭއިންސާފުންނާއި އިންސާފުން ފިޔަވަޅެއް ނޭނޅޭނެ ކަމަށެވެ. އެހެންކަމުން މިއީ ކުރިއަށް އޮތް ތާނގައި ވެސް މިކަމުގައި ޢަމަލުކުރާނެ ގޮތް ކަމަށާއި، އެއްވެސް ފުލުހަކާ ދޭތެރޭގައި އެފަދަ ބާވަތުގެ، އަދި އެހެން ޔުނިފޯމް މުއައްސަސާތަކެއްގައި ހުންނަވާ ބޭފުޅަކާ ދޭތެރޭގައި ވެސް އެފަދަ ބާވަތެއްގެ ތުހުމަތެއް ކުރެވިއްޖެ ކަމަށް ވެއްޖެއްޔާ އެގޮތަށް އަމަލުކުރާނެ ކަމަށެވެ. 

ފަރުހާދުގެ މައްޗަށް ކުރެވުނު ތުހުމަތުތަކުގެ ތެރޭގައި އޭނާގެ ފިރިހެން ދަރިފުޅު، 18 އަހަރުން ދަށުގެ ކުއްޖަކު ރޭޕް ކުރި މައްސަލައިގައި ތަހުގީގަށް ހޯދާފައި ހުރި ހެކިތަކެއް މަގާމުގެ ނޫފޫޒު ބޭނުންކޮށްގެން ނައްތާލި ކަމުގެ ތުހުމަތެވެ. މަޖިލީހުގެ 241 ކޮމިޓީއަށް ހުށަހެޅި މައްސަލައިގައި ބުނެފައިވަނީ އެހެން ބަޔަކާ ބައިވެރިވެގެން ފަރުހާދުގެ ދަރިފުޅު ކުއްޖަކު ރޭޕް ކުރި މައްސަލައެއް 2018ގައި ތަހުގީގަށް ފޯނެއް ހިފެހެއްޓި އެވެ. ނަމަވެސް އެ ފޯނުގައި ހުރި ވީޑިއޯއާއި ފޮޓޯ ޑިލީޓުކޮށް، އިތުރު ހެކިތައް ފަރުހާދު ނައްތާލާފައިވާ ކަން ޖިނާއީ ތަހުގީގަށް އެނގުނު ކަމަށް ސިޓީގައި ވަނީ ތުހުމަތުކޮށްފަ އެވެ.

އޭގެއިތުރުން، އެ މައްސަލައިގެ ތަހުގީގު ނިންމައި ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީސް (ޕީޖީ)އަށް ފޮނުވި ކަމަށް ސިޓީގައިވެއެވެ. ނަމަވެސް، މައްސަލަ ސާބިތުކުރުމަށް ލިބުނު ހެކިތަކެއް ނައްތާލަފައިވާކަން ފާހަގަކޮށް، ޕީޖީން ވަނީ ޕޮލިހަށް ސިޓީއެއް ފޮނުވާފަ އެވެ.

މީގެ އިތުރުން 2024 ފެބްރުއަރީ މަހު 27 ވަނަ ދުވަހުގެ ރޭ އޭނާގެ ފިރިހެން ދަރިއަކު މަސްތުގެ ހާލަތުގައި ހުރެ، ހުޅުމާލޭގެ އެކި ސަރަހައްދުތަކުގައި ބާރު ސްޕީޑުގައި ދުއްވުމުން މަޑު ކުރަން އެންގި ފުލުހަކަށް ހަމަލާ ދިން މައްސަލައިގައި އަމަލުކުރި ގޮތްވެސް ހިމެނެ އެވެ. އެ މައްސަލައިގައި ދަރިފުޅު ހުޅުމާލޭ ފުރަތަމަ ފިޔަވަހީގެ ޕޮލިހަށް ހާޒިރުކުރުމުން، ޑީސީޕީ ފަރުހާދުގެ ނުފޫޒު ބޭނުންކޮށްގެން އެ މައްސަލައިގެ ތަހުގީގު ހުއްޓުވި ކަމަށާއި ދަރިފުޅު ދުއްވި ސައިކަލު ޓޯކޮށްފައި ހުއްޓައި ގަވައިދާ ޚިލާފަށް ޓޯޔާޑުން ނެރުނު ކަމަށް ފަރުހާދަށް ވަނީ ތުހުމަތުކޮށްފަ އެވެ.

މިއީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވި ފަހުން ކޮރަޕްޝަނާއި މަގާމުގެ ނުފޫޒު ބޭނުން ކުރުމާއި ހެކި ނައްތާލުން ފަދަ ބޮޑެތި ޖިނާއީ ތުހުމަތު ކުރެވިފައިވާ ފުލުސް އޮފިސަރަކު ފުލުހުންގެ މުއައްސަސާގެ ހިންގުމާއި ހަވާލުކުރި ދެވަނަ ފަހަރެވެ.