މިއަހަރު ''ވީކްލީ ފިސްކަލް ޑިވެލޮޕްމަންޓް ރިޕޯޓު'' އާންމުނުކުރާ މައްސަލަ ބޮޑުވެއްޖެ
ދައުލަތުގެ އާމްދަނީ އާއި ހަރަދުގެ ތަފާސްހިސާބުތައް ހިމެނޭ ފިސްކަލް ރިޕޯޓުތަކާއި ގްރީން ފަންޑުގެ ރިޕޯޓު އާންމުކުރުން މި ސަރުކާރުން ހުއްޓާލާފައިވާތީ ގިނަ ބައެއްގެ ފާޑުކިޔުން ވަނީ އަމާޒުވެފައި. މިކަމާ ގުޅޭގޮތުން ފިނޭންސް މިނިސްޓްރީގެ ބަހެއް ލިބިފައިނުވާއިރު، ދަރަނި ބޮޑުވެ އިގްތިސާދީ ނުރައްކާ އޮތްކަމުގެ އިންޒާރު މާލީ ތަޖުރިބާކާރުން ދަނީ ދެމުން.
ސަރުކާރުން ޕްރޮޖެކްޓްތައް ބަހާލި ރަސްމިއްޔާތުގެ ތެރެއިން، ރައީސް ޑރ. މުހައްމަދު މުއިއްޒު (ކ) އަދި ފިނޭންސް މިނިސްޓަރު މޫސާ ޒަމީރު (ވ) | ރައީސް އޮފީސް
މިއަހަރު ''ވީކްލީ ފިސްކަލް ޑިވެލޮޕްމަންޓް ރިޕޯޓު'' އާންމުނުކުރާ މައްސަލަ ބޮޑުވެއްޖެ އެވެ.
ވީކްލީ ފިސްކަލް ޑިވެލޮޕްމަންޓް ރިޕޯޓަކީ ކޮންމެ ހަފްތާއެއްގައި ދައުލަތަށް ލިބުނު އާމްދަނީ އާއި ކުރި ހަރަދުގެ ތަފާސްހިސާބުތައް ހިމަނައިގެން ފިނޭންސް މިނިސްޓްރީން އާންމުކުރާ ރިޕޯޓެކެވެ. މީގެ ކުރީ ސަރުކާރުގައި ވެސް ގަވާއިދުން އެ އެރިޕޯޓު ކޮށްފައިވެ އެވެ. ނަމަވެސް ރައީސް ޑރ.މުހައްމަދު މުއިއްޒުގެ މިސަރުކާރުގައި މި ރިޕޯޓު އާއްމު ނުކުރާ މައްސަލަ ބޮޑެވެ.
2024 ވަނަ އަހަރުގެ ތެރޭގައި މި މައްސަލަ ބޮޑުވި އެވެ. ޖޫން 2024 އިން ފެށިގެން ތިން މަހަށް ވުރެ ދިގު މުއްދަތަކަށް މި ރިޕޯޓުތައް އާއްމު ކޮށްފައިނުވެ އެވެ. އޭގެފަހުން ސަރުކާރުން ބުނީ ރިޕޯޓު ނެރުން ލަސްވެގެން ދިޔައީ ކުރީ ސަރުކާރުން ހަރަދުތަކެއް ރެކޯޑު ކުރުމުގައި ބޮޑެތި ގޯސްތަކެއް ހަދާފައި ހުރުމުގެ ސަބަބުން ކަމަށާއި، ކުރިއަށް އޮތްތަނުގައި ގަވާއިދުން މިރިޕޯޓު އާއްމު ކުރާނެ ކަމަށެވެ.
ނަމަވެސް މިއަހަރުގެ މިހާތަނަށް ވީކްލީ ފިސްކަލް ޑިވެލޮޕްމަންޓް ރިޕޯޓުގެ އިތުރުން މަންތްލީ ފިސްކަލް ރިޕޯޓު އާންމު ކޮށްފައިނުވެ އެވެ.
މީގެ އިތުރުން ގްރީން ފަންޑު ރިޕޯޓު ވެސް 2025 ވަނަ އަހަރުން ފެށިގެން އާއްމު ކޮށްފައިނުވެ އެވެ.
ގްރީން ފަންޑު ރިޕޯޓަކީ، ގްރީން ޓެކްސްގެ ގޮތުގައި ލިބޭ ފައިސާގެ އަދަދާއި، ފަންޑުގެ ޖުމްލަ އާއި، ފަންޑުން ހަރަދުކުރަމުންދާ ފައިސާ އެ ފައިސާ ހަރަދުކުރާ ޕްރޮޖެކްޓުތަކުގެ މައުލޫމާތު ހިމެނޭ ރިޕޯޓެކެވެ.
ރިޕޯޓުތައް ސަރުކާރުން ސިއްރު ކުރަމުންދާ މައްސަލައާ ގުޅޭގޮތުން ފިނޭންސް މިނިސްޓްރީގެ ބަހެއް ވަނީ ލިބޭ ގޮތް ނުވެފަ އެވެ.
ރާއްޖޭގެ މާލީ ހާލަތާ މެދު ގިނަ އާއްމު ރައްޔިތުންގެ އިތުރުން ބޭރުގެ ދުނިޔޭގެ މާލީ އެކި އިދާރާތަކުން ދަނީ ކަންބޮޑުވުން ފާޅު ކުރަމުންނެވެ. އަދި ދައުލަތުގެ ދަރަނީގެ މައްސަލަ އިންތިހާ އަށް ބޮޑުވަމުންދިއުމާއި އަދި އާމްދަނީ އަށް ވުރެ ޚަރަދުތައް މައްޗަށްދާ މައްސަލަ ސްޓްރަކްޗަރަލް ބޮޑެތި ބަދަލުތަކެއް ނުގެނެސް ހައްލު ނުވާނެ ކަމަށް އޭޝިއަން ޑިވެލޮޕްމަންޓް ބޭންކު (އޭޑީބީ) ގެ ތަޖުރިބާކާރަކު މިމަހުގެ ތެރޭގައި ވިދާޅުވެފައިވެ އެވެ.
