ޕްރެޝަރެއް ނެތް، ގޮތް ނިންމަން ވަގުތު އެބަ އޮތް: ލެވަންޑޯސްކީ

މިވަގުތު އެއްވެސް ޕްރެޝަރެއް ނެތް ކަމަށާއި، މުސްތަޤުބަލާ މެދު ގޮތް ނިންމަން ވަގުތު އެބަ އޮތް ކަމަށް ބާސެލޯނާ އަށް ކުޅެމުން އަންނަ ޕޮލެންޑުގެ ފޯވާޑު ރޮބާޓް ލެވަންޑޯސްކީ ބުނެފި އެވެ.

ލެވަންޑޯސްކީ މިހެން ބުނެފައި ވަނީ، އޭނާ ގެ މުސްތަޤުބަލާ މެދު މިހާރު ދެކެވެމުން އަންނަ ވާހަކަތަކާ ގުޅިގެންނެވެ. ބާސެލޯނާ އާއެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު 2026 ވަނަ އަހަރުގެ ޖޫން މަހުގެ ނިޔަލަށް ހަމަވާއިރު، ބައެއް ރިޕޯޓު ތަކުގައި ބުނެފައި ވަނީ ބާސެލޯނާގެ އެއްބަސްވުން އޭނާ އައު ނުކުރާނެ ކަމަށެވެ. ނަމަވެސް، އަނެއް ބައި ރިޕޯޓު ތަކުގައި ބުނެފައި ވަނީ އިތުރު އެއް އަހަރަށް ލެވަންޑޯސްކީ ބާސެލޯނާގެ އެއްބަސްވުން އައު ކުރާނެ ކަމަށެވެ.

އެކަމާ ގުޅޭ ގޮތުން ދާދި ފަހުން ވާހަކަ ދައްކަމުން ލެވަންޑޯސްކީ ބުނީ، މި ސީޒަންގައި އޭނާ ބޭނުން ވަނީ ހުރިހާ ކާމިޔާބެއް ޙާސިލު ކުރަން ކަމަށެވެ. އެގޮތުން، އަންނަ އަހަރު އޮންނަ ފީފާ ވޯލްޑް ކަޕަށް ޕޮލެންޑާ އެކު ކޮލިފައިވާން ބޭނުންވާ ކަމަށާއި، ސްޕެނިޝް ލީގު ކާމިޔާބު ކުރުމާ އެކު، ޔުއެފާ ޗެމްޕިއަންސް ލީގު ކާމިޔާބު ކުރަން ބޭނުންވާ ކަމަށް ވެސް ލެވަންޑޯސްކީ ވަނީ ބުނެފަ އެވެ.

އަންނަ އަހަރުގެ ޖޫން މަހުގެ ނިޔަލަށް ބާސެލޯނާގެ އެއްބަސްވުމުގެ މުއްދަތު ހަމަވާއިރު، އެކަމާ ގުޅޭ ގޮތުން ލެވަންޑޯސްކީ ބުނީ ގޮތް ނިންމަން އޭނާ އަށް ވަގުތު އޮތް ކަމަށެވެ. މިވަގުތު އެއްވެސް އެއްޗެއް ބުނަން ނޭނގޭ ކަމަށާއި، އޭނާ ބޭނުން ވަނީ އެންމެ ރަނގަޅު ފޯމުގައި ކުޅެން ކަމަށް ލެވަންޑޯސްކީ ވަނީ ބުނެފަ އެވެ.

މީގެ އިތުރުން ލެވަންޑޯސްކީ ބުނީ ވަކި ގޮތެއް ނިންމައިގެން ކުރިއަށް ދާން ވެސް އޭނާ އަށް ނޭނގޭ ކަމަށެވެ. ނަމަވެސް، އެއްވެސް ޕްރެޝަރެއް އޭނާ އަށް ނެތް ކަމަށާއި، އެތައް ކަމެއް ބިނާވެފައި އޮންނާނީ ކުލަބުގެ ޕްލޭންގެ މައްޗަށް ކަމަށް ލެވަންޑޯސްކީ ބުންޏެވެ. އަދި އެކަމުގައި އޭނާ ގެ ޕްލޭން ވެސް ވަރަށް މުހިންމު ވާނެ ކަމަށް ލެވަންޑޯސްކީ ބުނެފައިވެ އެވެ. 

މީގެ ކުރިން ބައެއް މީޑިއާ ތަކުގައި ބުނެފައިވާ ގޮތުން، ލެވަންޑޯސްކީގެ ބަދަލުގައި އެހެން ކުޅުންތެރިޔަކު ހޯދުމުގެ މަސައްކަތް ބާސެލޯނާ އިން ކުރަމުން ގެންދެ އެވެ. އެގޮތުން އެ ކުލަބުން ބޭނުންވާ ކުޅުންތެރިންގެ ލިސްޓުގައި، ޖަރުމަނުގެ ބަޔާން މިއުނިކް އަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ހިމެނޭ ކަމަށް ބުނެފައިވެ އެވެ. ނަމަވެސް، އެކަމުގައި ގޮތެއް ނިމޭނީ ލެވަންޑޯސްކީގެ ކުރިމަގާ މެދު ނިންމާ ގޮތެއްގެ މައްޗަށެވެ. 

މީޑިއާ ތަކުގައި ބުނެފައިވާ ގޮތުން ކުރިއަށް އޮތް ޖަނަވަރީ މަހުގެ ތެރޭގައި ލެވަންޑޯސްކީ އާއި، ބާސެލޯނާގެ ކޯޗު ހަންސީ ފްލިކް އޭނާ ގެ މުސްތަޤުބަލާ ގުޅޭ ގޮތުން މަޝްވަރާ ކުރާނެ އެވެ. ކުރިން ބަޔާންގައި ވެސް ލެވަންޑޯސްކީ އަށް އިރުޝާދު ދީފައި ވަނީ ފްލިކް ކަމަށްވާއިރު، ލެވަންޑޯސްކީ އަކީ ފްލިކް ވަރަށް ބޮޑަށް ބޭނުންވާނެ ކުޅުންތެރިޔެއް ކަމަށް ފާހަގަ ކޮށްފައިވެ އެވެ. ޚާއްސަކޮށް އޭނާ ބޭނުން ކުރާނެގ ގޮތް ފްލިކް އަށް ވަރަށް ބޮޑަށް އިނގޭނެ ކަމަށް ފާހަގަ ކޮށްފައިވެ އެވެ. 

ބާސެލޯނާގައި މިހާރު ލެވަންޑޯސްކީ ހޭދަ ކުރަމުން ދަނީ އޭނާ ގެ ހަތަރު ވަނަ ސީޒަނެވެ. އޭނާ ވަނީ މިހާތަނަށް ބާސެލޯނާ އަށް ކުޅެދިން 165 މެޗުގައި 109 ލަނޑު ޖަަހައިފަ އެވެ. ބާސެލޯނާ އާއެކު ލެވަންޑޯސްކީ ވަނީ ފަސް ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު ދެ ފަހަރު، ކޮޕާ ޑެލް ރޭ އެއް ފަހަރު އަދި ސްޕެނިޝް ސުޕަ ކަޕް ދެ ފަހަރު ކާމިޔާބު ކުރުން ހިމެނެ އެވެ. ލެވަންޑޯސްކީ އަކީ ބާސެލޯނާގައި ހިމެނޭ ކުޅުންތެރިންގެ ތެރެއިން އެންމެ މުހިންމު އެއް ކުޅުންތެރިޔާ އެވެ.