މުސްތަޤުބަލާ މެދު ވިސްނަން ވަގުތު އެބަ އޮތް: ލެވަންޑޯސްކީ

މުސްތަޤުބަލާ މެދު ނިންމާނެ ނިންމުމާ އެކު ވިސްނަން ވަގުތު އެބަ އޮތް ކަމަށް، ބާސެލޯނާ އަށް ކުޅެމުން އަންނަ ޕޮލެންޑުގެ ފޯވާޑު ރޮބާޓް ލެވަންޑޯސްކީ ބުނެފި އެވެ.

ޖަރުމަނުގެ ބަޔާން މިއުނިކް ދޫކޮށްލުމަށް ފަހު ލެވަންޑޯސްކީ ބާސެލޯނާ އަށް ބަދަލުވީ 2022 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ ހަތަރު އަހަރު ދުވަހުގެ އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހުގެ ނިޔަލަށެވެ. އެއްބަސްވުމުގެ މުއްދަތު ހަމަވާން މަދު މަސް ތަކަކަށް ވެފައިވާއިރު، ކުރިމަގާ މެދު ލެވަންޑޯސްކީ ވަކި ނިންމުމެއް ނިންމާފައި ނުވެ އެވެ. ބައެއް މީޑިއާ ތަކުގައި ބުނެފައި ވަނީ ލެވަންޑޯސްކީ ބާސެލޯނާގެ އެއްބަސްވުން އައު ކުރުމުގެ ފުރުސަތު ވެސް އޮތް ކަަމަށެވެ.

މުސްތަޤުބަލާ ގުޅޭ ގޮތުން ވާހަކަ ދައްކަމުން ލެވަންޑޯސްކީ ބުނީ، ބާސެލޯނާ އާއެ އޮތް އޭނާގެ އެއްބަސްވުމާ މެދު އެއްވެސް ކަމެއް ބަދަލެއް ނުވާ ކަމަށެވެ. އެގޮތުން ލެވަންޑޯސްކީ ބުނީ، އޭނާގެ މުސްތަޤުބަލާއި، އޭނާ އަށް އޮތް ފުރުސަތުތަކާ މެދު ރަނގަޅަށް ވިސްނަން އަދި ވެސް ވަގުތު އެބަ އޮތް ކަަމަށެވެ. ސްޕެއިންގެ ބައެއް މީޑިއާ ތަކުގައި ބުނެފައި ވަނީ، ބާސެލޯނާ އިން މިހާރު ލެވަންޑޯސްކީއާ ވާހަކަ ދައްކަމުން އަންނަ ކަމަށެވެ.

މީގެ ކުރިން ވެސް ލެވަންޑޯސްކީ ބުނެފައި ވަނީ، މުސްތަޤުބަލާ މެދު ގޮތެއް ނިންމަން އޭނާ އަށް ވަގުތު އޮތް ކަމަށެވެ. އެކަމުގައި އެއްވެސް ޕްރެޝަރެއް ނަގަން ބޭނުން ނުވާ ކަމަށާއި، އެއްބަސްވުމާ މެދު ވާނެ ގޮތެއް ބުނަން ނޭނގޭ ކަމަށް ލެވަންޑޯސްކީ ކުރިން ވެސް ބުނެފައިވެ އެވެ. އޭރު އޭނާ ބުނެފައި ވަނީ ބޭނުން ވަނީ މި ސީޒަންގައި ރަނގަޅަށް ކުޅެ، ބާސެލޯނާ އާއެކު ކާމިޔާބީ ތަކެއް ހޯދަން ކަމަށެވެ. ބައެއް މީޑިއާ ތަކުގައި ބުނެފައިވާ ގޮތުން ސައުދީ ޕްރޯ ލީގުގެ ބައެއް ކުލަބު ތަކުން ވެސް އަންނަނީ ލެވަންޑޯސްކީ އަށް ފާރަލަމުންނެވެ.

ބާސެލޯނާގައި މިހާރު ލެވަންޑޯސްކީ ހޭދަ ކުރަމުން ދަނީ އޭނާގެ ހަތަރު ވަނަ ސީޒަން އެވެ. އޭނާ ވަނީ މިހާތަނަށް ބާސެލޯނާ އަށް ކުޅެދިން 184 މެޗުގައި 117 ލަނޑު ޖަހައިފަ އެވެ. މީގެ އިތުރުން ބާސެލޯނާ އާއެކު އޭނާ ވަނީ ފަސް ތައްޓެއް ވެސް ކާމިޔާބު ކޮށްފަ އެވެ. ލެވަންޑޯސްކީ އަކީ ބާސެލޯނާގެ ކޯޗު ހަންސީ ފްލިކް ވަރަށް ބޮޑަށް ބޭނުންވާ ކުޅުންތެރިޔަކަށްވާއިރު، އޭނާ ބަހައްޓަން ފްލިކް އަދި ވެސް ބާރު އަޅާނެ ކަމަށް ބައެއް މީޑިއާ ތަކުގައި ބުނެފައިވެ އެވެ.