ފަލަސްތީނުން އިޒްރޭލާއެކު ސުލްހަ ގާއިމުކުރަން މިސްރުން ގޮވާލައިފި

ފަލަސްތީނުން އިސްރޭލާއެކު ސުލްހަ ގާއިމުކުރަން މިސްރުގެ ރައީސް އަބްދުލް ފައްތާހު އަލް ސީސީ ގޮވާލައްވައިފިއެވެ.

އަންގާރު ދުވަހު އދ.ގެ ޖެނެރަލް އެސެމްބްލީގައި ތަގުރީރު ކުރައްވަމުން ސީސީ ވިދާޅުވެފައި ވަނީ މެދުއިރުމަތީގެ ސުލްހަ މަސަލަސްކަން ބިނާވެފައި ވަނީ ފަލަސްތީނާއި އިޒްރޭލާ ދެމެދު އޮންނަ ގުޅުމަށް ކަމަށާއި އެހެން ކަމުން އެ ދެ ގައުމުގެ ދެމެދުގައި އޮތް ގުޅުން ރަނގަޅުކޮށް ސުލްހަވެރި ހައްލެއް ހޯދަން ޖެހޭ ކަމަށެވެ. އިޒްރޭލާ ދެމެދު ހުރި ތަފާތުތައް ނައްތާލައި، ފަލަސްތީނުގެ އަމިއްލަ ސަލާމަތާއި ރައްކާތެރިކަމަށްޓަކައި އިޒްރޭލްގެ ސަރުކާރާއެކު އެއްބަސްވުމަކަށް އައުމަށް އޭނާވަނީ ފަލަސްތީނުގެ ސަރުކާރަށް ގޮވާލައިފައެވެ.

އދ.ގައި ތަގްރީރު ކުރެއްވުމުގެ ކުރިން ސީސީ ވަނީ އިޒްރޭލްގެ ބޮޑުވަޒީރު ބެންޖަމިން ނަތަންޔާހޫއާ ބައްދަލުކުރައްވާފައެވެ. ސީސީ ވަނީ، ފަލަސްތީނުގެ ރައީސް މަހުމޫދު އައްބާސްއާއި އެ ގައުމުގެ ހަމާސް ޖަމާއަތުގެ ލީޑަރު އިސްމާއިލް ހާނިޔާއާ ފޯނުން ގުޅައި ވާހަކަ ދައްކަވާފަ އެވެ.

ސީސީ ވިދާޅުވެފައި ވަނީ ފަލަސްތީނުގައި މިނިވަން ދައުލަތެއް ގާއިމުކޮށް އިރުމަތީ ގުދުސް ވެރިކަންކުރާ ރަށެއްގެ ގޮތުގައި ހަމަޖެހިގެން ގޮސްފިނަމަ މެދުއިރުމަތީގެ ތަރައްގީ އާއި ހަމަޖެހުމުގެ މުޅިންއާ ދުވަހެއް ފެނިގެންދާނެކަމަށެވެ. ދުނިޔޭގެ އެހެނިހެން ގައުމުތަކުގެ އެހީތެރިކަމާއެކު މެދުއިރުމަތީގެ ތާރީހުގައި އަމަންއަމާންކަމާއި ހަމަޖެހުމުގެ މުޅިން އާ ސަފްހާއެއް ލިޔުމުގެ އުއްމީދު އެބައޮތް ކަމަށްވެސް ސީސީ ވިދާޅުވިއެވެ.

1979 އިޒްރޭލާއެކު ސުލްހައިގެ އެއްބަސްވުމެއް ގާއިމުކުރި ފަހުން މިސްރުން ވަނީ އެކި ފަހަރުގެ މަތިން ފަލަސްތީނާއި އިސްރާއިލާ ދެމެދު ސުލްހައިގެ މަޝްވަރާތަކުގައި މެދުވެރިއެއްގެ ރޯލު އަދާކޮށްފައެވެ. ނަމަވެސް، 2014 ވަނަ އަހަރުގެ ފަހުން މި ދެ ގައުމުގެ ދެމެދުގައި ސުލްހައިގެ މަޝްވަރާތައް ކުރިޔަށް ގެންގޮސްފައެއް ނުވެއެވެ.