ކުވެއިތުގެ ކަރަންޓު އުފައްދާ މަރުކަޒަކަށް އީރާން އިން ދިން ހަމަލާގައި އެކަކު މަރުވެއްޖެ

ކުވެއިތުގެ ކަރަންޓު އުފައްދާ މަރުކަޒަކަށް އީރާން އިން ދިން ހަމަލާއެއްގައި އިންޑިއާގެ މަސައްކަތްތެރިޔަކު މަރުވެފައިވާ ކަމަށާއި، އެތަނުގެ އިމާރާތަށް ބޮޑެތި ގެއްލުން ތަކެއް ލިބިފައިވާ ކަމަށް ކުވެއިތުގެ މިނިސްޓްރީ އޮފް އިލެކްޓްރިސިޓީ އިން ހޯމަ ދުވަހު ހާމަ ކޮށްފި އެވެ. 

ކުވެއިތުގެ މިނިސްޓްރީ އޮފް އިލެކްޓްރިސިޓީގެ ތަރުޖަމާނު ފާތިމާ އައްބާސް ޖައުހަރު ހަޔާތު ވިދާޅުވީ، އީރާން އިން ކުވެއިތަށް ދެމުންދާ އުދުވާނީ ހަމަލާ ތަކުގެ ތެރެއިން ކަރަންޓު އުފެއްދުމާއި، ފެން މީރު ކުރާ މަރުކަޒެއްގެ ސާވިސް ބިލްޑިން އަށް ހަމަލާ އަމާޒުވެފައިވާ ކަމަށެވެ. މި ހަމަލާގެ ސަބަބުން އެ ތަނުގައި މަސައްކަތް ކުރަމުން ދިޔަ އިންޑިއާގެ ރައްޔިތަކު މަރުވެފައިވާކަން އޭނާ ވަނީ ކަށަވަރު ކޮށްދެއްވައިފަ އެވެ.

މީގެ އިތުރުން މި ހަމަލާގެ ސަބަބުން އިމާރާތަށް އިއާދަ ނުކުރެވޭ ވަރުގެ ބޮޑެތި މާއްދީ ގެއްލުން ތަކެއް ލިބިފައިވާ ކަމަށް ވެސް، ތަރުޖަމާނު ވަނީ ފާހަގަ ކުރައްވައިފަ އެވެ. މި ހާދިސާއާ ގުޅިގެން ކުވެއިތުގެ ކަމާ ބެހޭ އިދާރާ ތަކުން ދަނީ ލިބުނު ގެއްލުންތައް އިތުރަށް ވަޒަން ކުރަމުންނެވެ. 

މި ހަމަލާ އަކީ ސަރަހައްދީ ހަމަ ނުޖެހުން ތަކުގެ ތެރެއިން އީރާން އިން ކުވެއިތުގެ މުހިންމު އިންފްރާސްޓްރަކްޗާ އަށް އަމާޒުކޮށް ދިން ނުރައްކާތެރި ހަމަލާއެއްގެ ގޮތުގައި ކުވެއިތުގެ ސަރުކާރުން ވަނީ ސިފަ ކޮށްފަ އެވެ. މި ހާދިސާއާ ގުޅިގެން އީރާން އިން އަދި ރަސްމީކޮށް އެއްޗެއް ބުނެފައި ނުވެ އެވެ. 

ކުވެއިތުގެ ކަރަންޓާއި ފެނުގެ ނިޒާމަށް އަމާޒުކޮށް ދެވުނު މި ހަމަލާއާ ގުޅިގެން، އެ ޤައުމުގެ ސަލާމަތީ ފިތަވަޅުތައް ވަނީ ވަރުގަދަ ކޮށްފަ އެވެ. އަދި މަރުވި އިންޑިއާ މީހާގެ އާއިލާާ އަށް އެހީތެރިކަން ފޯރުކޮށްދިނުމުގެ މަސައްކަތް ކަމާ ބެހޭ ފަރާތް ތަކުން އަންނަނީ ކުރަމުންނެވެ.