އީރާނުން އެމިރޭޓްސާއި ބަހްރައިންގެ ކާރުޚާނާތަކަށް މިސައިލް ހަމަލާދީފި

އެމެރިކާގެ އަސްކަރިއްޔާއާއި ވައިގެ ދަތުރުފަތުރުގެ ސިނާއަތާ ގުޅުންހުރި ދެ ކާރުޚާނާއަކަށް އަމާޒުކޮށް، މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފައިވާނެ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން އިއުލާނުކޮށްފިއެވެ.

ހޮނިހިރު ދުވަހު އައި.އާރު.ޖީ.ސީ އިން ނެރުނު ބަޔާނެއްގައި ބުނެފައިވަނީ، އެ ޖަމާއަތުގެ އެއަރޯސްޕޭސް ފޯސް އާއި ނޭވީ ގުޅިގެން މި ހަމަލާތައް ދީފައިވަނީ "ޕާޝިއަން ގަލްފުގެ އައްސޭރިފަށުގެ ގައުމުތަކުގައި ތިބެގެން، އީރާނުގެ ސިނާއީ އުމްރާނީ ވަސީލަތްތަކަށް އަމާޒުކޮށް އެމެރިކާއާއި ޒަޔަނިސްޓް ދުޝްމަނުން ދެމުންދާ ނުބައި ހަމަލާތަކަށް ރައްދު ދިނުމުގެ ގޮތުން" ކަމަށެވެ. މި ހަމަލާތައް އަމާޒުކޮށްފައިވަނީ އެމިރޭޓްސް އެލުމިނިއަމް (އީ.އެމް.އޭ.އެލް) ޕްލާންޓަށާއި އެލުމިނިއަމް ބަހްރެއިން (އޭ.އެލް.ބީ.އޭ) ޕްލާންޓަށެވެ.

އެ ބަޔާނުގައި ފާހަގަކޮށްފައިވާ ގޮތުގައި، މި ދެ ފެސިލިޓީއަކީ ސްޓްރެޓެޖިކް ގޮތުން މުހިންމު ދެ ތަނެކެވެ. އެގޮތުން އީ.އެމް.އޭ.އެލް އަކީ އަހަރަކު 1.3 މިލިއަން ޓަނުގެ އެލުމިނިއަމް އުފެއްދުމުގެ ގާބިލުކަން ހުރި، ދުނިޔޭގެ އެންމެ ދިގު އެލުމިނިއަމް އުފައްދާ ލައިން ހުންނަ ތަނެވެ. އަދި އޭ.އެލް.ބީ.އޭ އަކީ އެމެރިކާގެ އިންވެސްޓްމަންޓާއި ހިއްސާ އޮންނަ، "އެމެރިކާގެ ޓެރަރިސްޓް އަސްކަރިއްޔާއަށް ބޭނުންވާ ސިނާއީ އުފެއްދުންތައް ފޯރުކޮށްދިނުމުގައި މުހިންމު ދައުރެއް އަދާކުރާ" ތަނެއް ކަމަށްވެސް އައި.އާރު.ޖީ.ސީ އިން ބުނެފައިވެއެވެ.

މީގެ އިތުރުން، އީރާނަށް ކުރިމަތިވާ ނުރައްކާތަކާއި އުދުވާނީ އަމަލުތަކަށް ދޭ ރައްދު، ދެން "ލޮލަކަށް ލޮލެއް" ނުވަތަ ހަމަހަމަ ގޮތެއްގައި ދޭ ރައްދަކުން ނުނިމޭނެ ކަމަށް ބުނެ އައި.އާރު.ޖީ.ސީ އިން ވަނީ އިންޒާރު ދީފައެވެ.

އީރާނުގެ އަސްކަރިއްޔާ އިން ބުނި ގޮތުގައި، ދުޝްމަނުން ދޭ ކޮންމެ ހަމަލާއަކަށްވުރެ މާ ވަރުގަދަ ހަމަލާއެއް، ދުޝްމަނުންގެ އަސްކަރީ އަދި އިގްތިސާދީ އޮނިގަނޑަށް އަމާޒުކޮށް ދޭނެއެވެ.

މި ހަމަލާތައް ދީފައިވަނީ، މިދިޔަ މަހުގެ ފަހުކޮޅުން ފެށިގެން އެމެރިކާއާއި އިޒްރޭލުން އީރާނާ ދެކޮޅަށް ހިންގަމުންދާ އުދުވާނުގެ ތެރެއިން، އީރާނުގެ އުމްރާނީ ވަސީލަތްތަކަށް އަމާޒުކޮށް ދެމުންދާ ހަމަލާތަކާ ގުޅިގެންނެވެ.

އިޒްރޭލާއި އެމެރިކާގެ ހަމަލާތައް އީރާނުގެ މައިގަނޑު ދަގަނޑު އުފައްދާ ކާރުޚާނާތަކަށާއި، ޔުނިވަރސިޓީތަކާއި، ސުކޫލުތަކާއި، ހޮސްޕިޓަލްތަކުގެ އިތުރުން އާންމުން ދިރިއުޅޭ ސަރަހައްދުތަކަށްވެސް ވަނީ އަމާޒުވެފައެވެ.

ފެބްރުއަރީ 28 ގައި އެމެރިކާއާއި އިޒްރޭލުން އީރާނަށް ހަމަލާދޭން ފެށުމާއެކު، އައި.އާރު.ޖީ.ސީ އިން ވަނީ ސަރަހައްދުގައި ހުރި ދުޝްމަނުންގެ މުހިންމު ތަންތަނަށް އަމާޒުކޮށް، ސަތޭކައަށްވުރެ ގިނަ ބެލިސްޓިކް އަދި ހައިޕަރސޮނިކް މިސައިލާއި ޑްރޯން ބޭނުންކޮށްގެން މެދުކެނޑުމެއްނެތި ރައްދު ހަމަލާތައް ދޭން ފަށާފައެވެ.