އީރާންއާ ދެކޮޅަށް ކުރާ ހަނގުރާމަ ހުއްޓާލުމަށް ގޮވާލައި އިޒްރޭލްގައި މުޒާހަރާ ކޮށްފި
29 މާރިޗު 2026 | އާދީއްތަ 08:50އިޒްރޭލްގައި ކުރިއަށް ދިޔަ މި މުޒާހަރާ ތަކާ ގުޅިގެން އިޒްރޭލްގެ ސަރުކާރުން ރަސްމީކޮށް ބަޔާނެއް ނެރެފައި ނުވޭ. ނަމަވެސް ސަލާމަތީ ބާރު ތަކުން ބުނީ ހުއްދަ ނުލިބި ބޭއްވޭ މުޒާހަރާ ތަކުގައި ޤާނޫނާ ޚިލާފަށް ޙަރަކާތްތެރިވާ މީހުންނާ ދެކޮޅަށް ފިޔަވަޅު އަޅާނެ ކަމަށް.
އިޒްރޭލްގައި ކުރިއަށް ގެންދިޔަ މުޒާހަރާގެ ތެރެއިން | ސޯޝަލް މީޑިއާ
އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމަ ދެ ވަނަ މަހަށް ފެށިގެން ގޮސްފައިވާއިރު، އެ ހަނގުރާމަ ހުއްޓާލުމަށް ގޮވާލައި އެތައް ހާސް ބަޔަކު އިޒްރޭލްގެ ބޮޑެތި ސިޓީ ތަކުގައި މުޒާހަރާ ކޮށްފި އެވެ.
އިޒްރޭލްގެ ވެރި ރަށް ތެލް އަވީވް އާއި، ޖެރޫސަލަމް އަދި ހައިފާ ފަދަ ބޮޑެތި ސިޓީ ތަކުގައި ބޭއްވި މުޒާހަރާ ތަކުގައި ވަރަށް ގިނަ އަދަދެއްގެ ރައްޔިތުން ބައިވެރިވެފައިވާ ކަމަށް ރިޕޯޓުތައް ބުނެ އެވެ. މުޒާހަރާ ކުރާ ފަރާތް ތަކާއި ފުލުހުންނާ ދެމެދު ހަމަ ނުޖެހުންތައް ހިނގައި، މިހާތަނަށް 21 މީހަކު ހައްޔަރު ކޮށްފައިވާ ކަމަށް ދަ ޓައިމްސް އޮފް އިޒްރޭލްގައި ރިޕޯޓު ކޮށްފައިވެ އެވެ.
މި މުޒާހަރާ ތަކަކީ ހަމަނުޖެހުން ތަކުން އެއްކިބާވެފައިވާ މުޒާހަރާ ތަކަކަށް ހެދުމަށް ސަލާމަތީ ބާރު ތަކުން ވަނީ މަސައްކަތް ކޮށްފަ އެވެ. ހުއްދަ ނުލިބި ބޭއްވި މުޒާހަރާ ތަކެއް ކަމަށް ވެސް ރިޕޯޓު ކޮށްފައިވެ އެވެ. ސަލާމަތީ ބާރު ތަކުން މުޒާހަރާ ކޮންޓްރޯލް ކުރުމަށް މަސައްކަތް ކުރި ނަމަވެސް، މުޒާހަރާ ކުރާ ފަރާތްތަކާ ފުލުހުންނާ ދެމެދު ގިނަ ކުރިމަތިލުން ތަކެއް ހިނގާފައިވެ އެވެ.
އެ މުޒާހަރާ ތަކުގައި ބައިވެރިވި މީހުން ގޮވާލާފައި ވަނީ، އީރާންއާ ދެކޮޅަށް ކުރިއަށްދާ ހަނގުރާމަ ވީހާ ވެސް އަވަހަކަށް ހުއްޓާލުމަށެވެ. ހަނގުރާމައިގެ ސަބަބުން އާންމު ރައްޔިތުންނަށް އިޒްރޭލްގެ ރައްޔިތުންނަށް ކުރިމަތި ވަމުންދާ ދަތިތައް ފާހަގަ ކުރަމުން، މުޒާހަރާ ކުރި މީހުން ބުނީ މި ހަނގުރާމައިގެ ސަބަބުން ދެ ފަރާތުގެ އާންމު ރައްޔިތުން ވަނީ ބަރަށް ބޮޑު އުނދަގުލެއްގެ ތެރޭގައި ކަމަށެވެ.
އެމެރިކާ އާއި އިޒްރޭލް އިން މިދިޔަ ފެބްރުވަރީ މަހުގެ 28 ވަނަ ދުވަހު އީރާންއާ ދެކޮޅަށް ފެށި ހަނގުރާމަ މިހާރު ވަނީ ދެ ވަނަ މަހަށް ފެށިފަ އެވެ. މި ހަނގުރާމައިގެ ސަބަބުން ސަރަހައްދީ ސުލްޙަ އާއި އަމާންކަން ވަރަށް ބޮޑު ނުރައްކަލެއްގެ ތެރެއަށް ވެއްޓިފައިވާކަން ފާހަގަ ކުރެވެ އެވެ. ބައިނަލްއަޤުވާމީ މުޖުތަމައުން އަންނަނީ ހަނގުރާމަ ހުއްޓާލުމަށް ވަރަށް ބޮޑަށް ބާރު އަޅަމުންނެވެ.
އިޒްރޭލްގައި ކުރިއަށް ދިޔަ މި މުޒާހަރާ ތަކާ ގުޅިގެން އިޒްރޭލްގެ ސަރުކާރުން ރަސްމީކޮށް ބަޔާނެއް ނެރެފައި ނުވެ އެވެ. ނަމަވެސް ސަލާމަތީ ބާރު ތަކުން ބުނީ ހުއްދަ ނުލިބި ބޭއްވޭ މުޒާހަރާ ތަކުގައި ޤާނޫނާ ޚިލާފަށް ޙަރަކާތްތެރިވާ މީހުންނާ ދެކޮޅަށް ފިޔަވަޅު އަޅާނެ ކަމަށެވެ. ހައްޔަރު ކުރި މީހުންނާ ދެކޮޅަށް ޤާނޫނީ ފިޔަވަޅުތައް އަޅަމުންދާ ކަމަށް ފުލުހުން ބުނެފައިވެ އެވެ.
