ނިއުކްލިއާ ހަތިޔާރު ފެތުރުން ހުއްޓުވުމާ ބެހޭ ބައިނަލްއަގުވާމީ މުއާހަދާ އިން އީރާން ވަކިވަނީ
ނިއުކްލިއާ ހަތިޔާރު ފެތުރުން ހުއްޓުވުމާ ބެހޭ ބައިނަލްއަގުވާމީ މުއާހަދާ (އެންޕީޓީ) އިން ވަކިވުމާ މެދު އީރާނުގެ ކަމާބެހޭ މުއައްސަސާތަކުން ކުއްލި މުރާޖައާއެއް ފަށާފައިވަނީ، އެ ގައުމުގެ ނިއުކްލިއާ މަރުކަޒުތަކަށް ދޭ ހަމަލާތަކުން އައިއޭއީއޭ އިން ރައްކާތެރިކަން ފޯރުކޮށްނުދޭ ކަމަށް ބުނެ. މި މުއާހަދާއިން ވަކިވުމުގެ މައިގަނޑު ބޭނުމަކީ އިންސްޕެކްޓަރުންގެ ނަމުގައި އެމެރިކާއާއި އިޒްރޭލުން ހިންގާ ޖާސޫސީ ހަރަކާތްތައް ހުއްޓުވުން ކަމަށް ރިޕޯޓުތައް ބުނޭ.
2003 ވަނަ އަހަރުގެ ޖޫން މަހުގެ 16 ވަނަ ދުވަހު ވިއެންނާގައި ބޭއްވި އިންޓަރނޭޝަނަލް އެޓޮމިކް އެނާޖީ އެޖެންސީ (އައި.އޭ.އީ.އޭ) ގެ ބޯޑް އޮފް ޑައިރެކްޓަރުންގެ ބައްދަލުވުމުގެ މަންޒަރެއް. | ގެޓީ އިމޭޖަސް
ނިއުކްލިއާ ހަތިޔާރު ފެތުރުން ހުއްޓުވުމާ ބެހޭ ބައިނަލްއަގުވާމީ މުއާހަދާ ނުވަތަ ނޮން-ޕްރޮލިފަރޭޝަން އޮފް ނިއުކްލިއާ ވެޕަންސް (އެންޕީޓީ) އިން ވަކިވުމުގެ މަސައްކަތް އީރާނުން ކުރަމުން ގެންދާ ކަމަށް ރިޕޯޓުތައް ބުނަން ފަށައިފިއެވެ.
އީރާނުގެ ގާނޫނު ހަދާ މަޖިލީހުގެ އިތުރުން އެ ގައުމުގެ ކަމާބެހޭ މުއައްސަސާތަކުން މިހާރު ދަނީ އެންޕީޓީ މުއާހަދާއިން ވަކިވުމާ ގުޅޭގޮތުން ކުއްލި މުރާޖައާއެއް ކުރަމުންނެވެ. ރިޕޯޓުތައް ބުނާގޮތުގައި، އެ މުއާހަދާގައި އިތުރަށް ދެމިއޮތުމުގެ އެއްވެސް ބޭނުމެއް ނެތް ކަމަށް ބުނާ ވިސްނުން އީރާނުގެ ސަރުކާރުގެ ތެރޭގައި މިހާރު ވަނީ ވަރަށް ބޮޑަށް ވަރުގަދަވެފައެވެ.
އެންޕީޓީ މުއާހަދާ ބުނާގޮތުން، ސުލްހަވެރި ބޭނުންތަކަށް ނިއުކްލިއާ ޓެކްނޮލޮޖީއާއި ވަސީލަތްތައް ހޯދުމުގައި އީރާނަށް ބޭނުންވާ ރައްކާތެރިކަމާއި އެހީތެރިކަން ފޯރުކޮށްދިނުމުގެ މާހައުލެއް އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އިން ފަހިކޮށްދޭން ޖެހެއެވެ. ނަމަވެސް، އައިއޭއީއޭގެ ޑިރެކްޓަރ ޖެނެރަލް ރަފައެލް ގްރޮސީ، އީރާނުގެ ނިއުކްލިއާ މަރުކަޒުތަކާ ދެކޮޅަށް ނިއުކްލިއާ ހަތިޔާރު ބޭނުންކުރުމަށް ނުސީދާކޮށް ހިތްވަރުދެއްވާއިރު، އަދި އެމެރިކާއާއި އިޒްރޭލުން އީރާނުގެ މަރުކަޒުތަކަށް ހަމަލާދޭއިރު އައިއޭއީއޭ އިން އެކަން ހުއްޓުވުމަށް ނުވަތަ ކުށްވެރިކުރުމަށް އެއްވެސް މަސައްކަތެއް ނުކުރާތީ، އެ މުއާހަދާގައި އީރާނުން ދެމިއޮތުމުގެ އެއްވެސް ހުއްޖަތެއް މިހާރު ނެތް ކަމަށް އެ ގައުމުން ދެކެއެވެ.
އެންޕީޓީ މުއާހަދާއިން ވަކިވުމަކީ އީރާނުން ނިއުކްލިއާ ހަތިޔާރު އުފެއްދުމާ ދިމާލަށް މިސްރާބުޖެހުން ނޫން ކަމަށާއި، އެއީ އައިއޭއީއޭގެ އިންސްޕެކްޓަރުންގެ ނަމުގައި އެމެރިކާއާއި އިޒްރޭލުން ކުރިއަށްގެންދާ ޖާސޫސީ ހަރަކާތްތައް ހުއްޓުވުމަށް އަޅާ ފިޔަވަޅެއް ކަމަށްވެސް ރިޕޯޓުތައް ބުނެއެވެ.
