އީރާންގެ ވެރިކަން ބަދަލުވެއްޖެ، ވަރަށް އަވަހަށް ހަމަޖެހުން އަތުވެދާނެ: ޓްރަމްޕް

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި އީރާންގެ ވެރިކަން ބަދަލުވެއްޖެ ކަމަށާއި، ވަރަށް އަވަހަށް ހަމަޖެހުން އަތުވެދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

އީރާންގެ ކަރަންޓު ފެސިލިޓީ ތަކަށް އަމާޒުކޮށް އިޒްރޭލް އިން ހަމަލާ ދިނުމަށް ފަހު، އީރާންގެ ވެރި ރަށް ތެހެރާން އާ ވަށައިގެންވާ ސަރަހައްދު ތަކުން ކަރަންޓު ކަނޑާލާފައިވާއިރު، ރައްދުގައި އީރާން އިން ވެސް ވަނީ ހަމަލާ ތަކެއް ދީފަ އެވެ. 

ޓްރަމްޕް ވިދާޅުވީ އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ މަސް ދުވަހަށް ދެމިގެން ގޮސްފައިވާއިރު، އީރާންގެ ވަރަށް ގިނަ ލީޑަރުން މަރުވެފައިވާ ކަމަށެވެ. އެކަމުގެ ސަބަބުން އީރާންގެ ވެރިކަން ބަދަލުވެފައިވާ ކަމަށާއި، އީރާންގެ އައު ލީޑަރުންނަކީ މާ ބުއްދިވެރި ބައެއް ކަމަށް ވެސް ޓްރަމްޕް ވިދާޅުވި އެވެ. 

އެއާ ފޯސް ވަންގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާންގެ ވެރިކަން މިހާރު ވަނީ ބަދަލުވެފައި ކަމަށެވެ. އަދި މިހާރު އެމެރިކާ އިން މަޝްވަރާ ކުރަމުން އަންނަނީ ކުރިން އެއްވެސް މީހަކު ނުވަތަ ބަޔަކު މަޝްވަރާ ކޮށްފައި ނެތް ފަރާތްތަކާ ކަމަށް ވެސް ޓްރަމްޕް ވިދާޅުވި އެވެ. އެ ފަރާތް ތަކަކީ ވަރަށް ފުރިހަމަ އަދި ތަފާތު ބައެއްް ކަމަށް ޓްރަމްޕް ފާހަގަ ކުރެއްވި އެވެ. 

އީރާންއާ ދެކޮޅަށް އެމެރިކާ އިން ކުރަމުން އަންނަ ހަނގުރާމައިގައި މި ހަފުތާގެ ތެރޭގައި އެއްބަސްވުމަކަށް އަތުވެދާނެ ކަމަށް ޤަބޫލު ކުރައްވާ ކަމަށް ސުވާލު ކުރުމުން ޓްރަމްޕް ވިދާޅުވީ، އީރާން އާއެކު ހަމަޖެހުމެއް ލިބޭނެ ކަމަށް ޤަބޫލު ކުރައްވާ ކަމަށެވެ. އަދި ވަރަށް އަވަސް މުސްތަޤުބަލެއްގައި އެކަން ހާސިލު ކުރެވޭނެ ކަމަށް ވެސް ޓްރަމްޕް ވިދާޅުވި އެވެ. 

ޓްރަމްޕް މިހެން ވިދާޅުވެފައިވާއިރު، ޕާކިސްތާން އިން އަންނަނީ އެމެރިކާ އާއި އީރާންއާ ދެމެދު މެސެޖުތައް ބަދަލު ކުރުމުގެ މަސައްކަތް ކުރަމުންނެވެ. އަދި ޕާކިސްތާން އިން އޮތީ ދެ ޤައުމުގެ ދެމެދުގައި ސުލްޙަ ޤާއިމު ކުރުމަށް މެދުވެރިއެއްގެ ދައުރު އަދާ ކުރުމަށް ތައްޔާރަށް ކަމަށް ވެސް އެ ޤައުމުން ހާމަ ކޮށްފައިވެ އެވެ.