އެއްގަމު މަގުން ސިފައިން ބޭނުން ނުކޮށް ވެސް، އީރާން ހަނގުރާމަ ކާމިޔާބު ކުރެވޭނެ: ރޫބިއޯ

އެމެރިކާ އާއި އިޒްރޭލް އިން އީރާާންއާ ދެކޮޅަށް ކުރަމުން އަންނަ ހަނގުރާމައިގައި، އެއްގަމު މަގުން ސިފައިން ބޭނުން ނުކޮށް ވެސް ހަނގުރާމަ ކާމިޔާބު ކުރެވޭނެ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ. 

ފްރާންސްގައި ކުރިއަށް ދިޔަ ޖީ7 ޤައުމު ތަކުގެ ފޮރިން މިނިސްޓަރުންގެ ބައްދަލުވުމަށް ފަހު ނޫސްވެރިންނާ ވާހަކަ ދައްކަވަމުން ރޫބިއޯ ވިދާޅުވީ، އީރާންއާ ދެކޮޅަށް އެމެރިކާ އާއި އިޒްރޭލް އިން ފެބްރުވަރީ މަހު ފަށާފައިވާ އަސްކަރީ އޮޕަރޭޝަންގެ މަޤުސަދުތައް ހާސިލު ކުރަމުން އަންނަ ކަމަށެވެ. 

އެ އޮޕަރޭޝަންގެ މަޤުސަދަކީ އީރާާންގެ މިސައިލް އަދި ޑްރޯން އުފައްދާ ފެކްޓަރީތައް ނައްތާލުމާއި، އެ ހަތިޔާރުތައް އުފައްދާ ޤާބިލުކަން ނައްތާލުމާއި، އީރާންގެ ނޭވީ އަދި އެއާފޯސް ނައްތާލުން ކަމަށް ރޫބިއޯ ވިދާޅުވި އެވެ. އެ މަޤުސަދުތައް ޙާސިލު ކުރުމުގައި ލަފާ ކުރި ވަގުތަށް ވުރެ އަވަހަށް ކަންކަން ހާސިލުވާ ކަމަށް އޭނާ ފާހަގަ ކުރެއްވި އެވެ. އަދި ކުރިއަށް އޮތް ހަފުތާ ތަކެއްގެ ތެރޭގައި މި އޮޕަރޭޝަން ނިންމާލެވޭނެ ކަމަށް ވެސް ރޫބިއޯ ވަނީ ވިދާޅުވެފަ އެވެ. 

އެއާ އެކު ރޫބިއޯ ވިދާޅުވީ، އެއްގަމު މަގުން އީރާން އަށް ސިފައިން ނުފޮނުވާ ވެސް، އޮޕަރޭޝަންގެ މަޤުސަދުތައް ހާސިލު ކުރެވޭނެ ކަމުގެ ޔަގީންކަން އޮތް ކަމަށެވެ. މީގެ ކުރިން އެމެރިކާ އިން ވަނީ، އެއްގަމު މަގުން ވެސް އީރާން އަށް ސިފައިން ފޮނުވަން ޖެހިދާނެ ކަމުގެ އިންޒާރު އެކި ފަަހަރު މަތިން ދީފަ އެވެ. 

އިތުރަށް ވާހަކަ ދައްކަވަމުން ރޫބިއޯ ވިދާޅުވީ، ހޮރްމޫޒް ކަނޑު އޮޅިން ދަތުރު ކުރާ އުޅަނދު ފަހަރު ތަކުން ފީއެއް ނެގުމުގެ ނިޒާމު، އީރާން އިން ޤާއިމު ކުރަން ނިންމުމަކީ އެކަށީގެންވާ ކަމެއް ކަމަށެވެ. އަދި އެ ކަނޑު އޮޅިން ދަތުރު ކޮށްގެން ވިޔަފާރީ ކުރާ ޔޫރަޕާއި އޭޝިއާގެ ޤައުމު ތަކުން، އެ ކަނޑު އޮޅި ސަލާމަތް ކުރުމުގެ މަސައްކަތުގައި ބައިވެރިވުން މުހިންމު ކަމަށް ވެސް ރޫބިއޯ ފާހަގަ ކުރެއްވި އެވެ. ހަމަ އެހެންމެ، ހަނގުރާމަ ނިންމުމަށް ފަހު އެ ކަނޑު އޮޅި މިނިވަންކަމާ އެކު ބޭނުން ކުރެވޭނެ ގޮތް ހަމަޖެއްސުމަށް އެ ޤައުމު ތަކުން އެހީތެރިވާން ޖެހޭ ކަމަށް ވެސް ރޫބިއޯ ވިދާޅުވި އެވެ.

އެމެރިކާ އާއި އިޒްރޭލް އެކުވެގެން އީރާންއާ ދެކޮޅަށް ހަނގުރާމަ ފަށާފައި ވަނީ ފެބްރުވަރީ މަހުގެ 28 ވަނަ ދުވަހު އެވެ. އެމެރިކާ އިން މިހާރު ބޮޑަށް ބާރު އަޅަމުން ދަނީ ހަނގުރާމަ ނިންމުމަށް ކަމަށް، މަސްރަހު ދިރާސާ ކުރާ ފަރާތް ތަކުން ބުނެ އެވެ. އެމެރިކާގެ ރައީސް ޑޮނަލްޑް ޓްރަމްޕް ވެސް ގެންދަވަނީ އީރާން އާއެކު މަޝްވަރާ ކުރަމުން އަންނަ ކަމަށް ތަކުރާރުކޮށް ވިދާޅުވަމުންނެވެ.