އީރާނުގެ ހަމަލާތަކުގައި 500 އެމެރިކާ ސިފައިންނަށް ބޮޑެތި ގެއްލުން ވެއްޖެ: އަސްކަރީ ތަރުޖަމާނު
އެމެރިކާ ސިފައިން ފިލައިގެން އުޅުނު ދެ ތަނެއް ދެނެގަނެވިފައިވާ ކަމަށާއި އޭގެ ތެރެއިން ފުރަތަމަ ތަނުގައި 400 އަށްވުރެ ގިނަ މީހުން އަދި ދުބާއީގައި ހުރި ދެވަނަ ތަނުގައި 100 އަށްވުރެ ގިނަ މީހުން ތިބި ކަމަށާއި، އިސްލާމިކް ރިވޮލިއުޝަނަރީ ގާޑް ކޯޕްސްގެ އެއިރޯސްޕޭސް ފޯސް އަދި ކަނޑުގެ ސިފައިން ދިން އަމާޒަށް ވާސިލްވާ މިސައިލް އަދި ޑްރޯން ހަމަލާތަކުގައި އެމެރިކާ ސިފައިންނަށް ވަރަށް ބޮޑެތި ގެއްލުންތަކެއް ލިބިފައިވާ ކަމަށް އީރާނުން ބުނޭ.
އީރާނުގެ ޚާތަމުލް އަންބިޔާ ސެންޓްރަލް ހެޑްކުއާޓާސްގެ ތަރުޖަމާނު. | ތަސްނީމް ނިއުސް އޭޖެންސީ
އީރާނުން ދިން ބަދަލުހިފުމުގެ ހަމަލާތަކުގައި އެމެރިކާ ސިފައިންގެ 500 އަށްވުރެ ގިނަ މީހުންނަށް ބޮޑެތި ގެއްލުންތަކެއް ލިބިފައިވާ ކަމަށް އީރާނުގެ ޚާތަމުލް އަންބިއާ ސެންޓްރަލް ހެޑްކުއާޓާސްގެ ތަރުޖަމާނު ރިޕޯޓްކޮށްފިއެވެ.
މާރޗް މަހުގެ 28 ވީ ހޮނިހިރު ދުވަހު ނެރުނު ބަޔާނެއްގައި އީރާނުގެ ތަރުޖަމާނު ވިދާޅުވީ، އީރާނުގެ ހަތިޔާރު އެޅި ފައުޖުތަކުން ދެމުންދާ ވަރުގަދަ ހަމަލާތަކާއި، ސަރަހައްދުގައި ހުރި އެމެރިކާގެ އަސްކަރީ މަރުކަޒުތައް ސުންނާފަތި ކުރަމުންދާތީ، އިސްތިއުމާރީ އެމެރިކާ ސިފައިން އެ މަރުކަޒުތަކުން ފިލައިގެން ގޮސް އެހެން ތަންތަނުގައި ފޮރުވިފައިވާ ކަމުގެ އިންޒާރު މީގެ ކުރިންވެސް ދީފައިވާނެ ކަމަށެވެ.
އީރާނުގެ ތަރުޖަމާނު އިތުރަށް ވިދާޅުވީ، އެމެރިކާ ސިފައިން ފިލައިގެން އުޅުނު ދެ ތަނެއް ދެނެގަނެވިފައިވާ ކަމަށެވެ. އޭގެ ތެރެއިން ފުރަތަމަ ތަނުގައި 400 އަށްވުރެ ގިނަ މީހުން އަދި ދުބާއީގައި ހުރި ދެވަނަ ތަނުގައި 100 އަށްވުރެ ގިނަ މީހުން ތިބި ކަމަށާއި، އިސްލާމިކް ރިވޮލިއުޝަނަރީ ގާޑް ކޯޕްސްގެ އެއިރޯސްޕޭސް ފޯސް އަދި ކަނޑުގެ ސިފައިން ދިން އަމާޒަށް ވާސިލްވާ މިސައިލް އަދި ޑްރޯން ހަމަލާތަކުގައި އެމެރިކާ ސިފައިންނަށް ވަރަށް ބޮޑެތި ގެއްލުންތަކެއް ލިބިފައިވާ ކަމަށް އޭނާ ވިދާޅުވިއެވެ.
ތަރުޖަމާނު ހާމަކުރެއްވި ގޮތުގައި، ހަމަލާތަކުގައި މަރުވި އަދި އަނިޔާވި އެމެރިކާގެ ކޮމާންޑަރުންނާއި ސިފައިން އުފުލުމުގައި އެމްބިއުލާންސްތައް އެތައް ގަޑިއިރެއް ވަންދެން ހަރަކާތްތެރިވެފައިވެއެވެ.
އީރާނުގެ ތަރުޖަމާނު އިންޒާރު ދެއްވަމުން ވިދާޅުވީ، މި ސަރަހައްދަކީ އެމެރިކާ ސިފައިންގެ ގަބުރުސްތާނަކަށް ވެގެންދާނެ ކަމާއި، އިސްލާމީ މުޖާހިދުންނާއި ހިތްވަރުގަދަ ރައްޔިތުންގެ ކުރިމަތީގައި ކަނޑައެޅިފައިވާ އިލާހީ ނިންމެވުމަށް ބޯލެނބުން ނޫން އިތުރު ގޮތެއް އެމެރިކާއަށް ނޯންނާނެކަން ޑޮނަލްޑް ޓްރަމްޕާއި އެމެރިކާގެ އަސްކަރީ ކޮމާންޑަރުންނަށް ވަރަށް ސާފުކޮށް އެނގެންޖެހޭނެ ކަމަށެވެ.
އެމެރިކާ އާއި އިޒްރޭލުން އީރާނާ ދެކޮޅަށް ފުޅާދާއިރާއެއްގައި ޣައިރު ގާނޫނީ އަސްކަރީ ހަމަލާތަކެއް ދޭން ފަށާފައިވަނީ، ފެބްރުއަރީ 28 ވަނަ ދުވަހު އެވެ.
އެމެރިކާ އާއި އިޒްރޭލުން އީރާނުގެ އަސްކަރީ އަދި އާންމުން ދިރިއުޅޭ ސަރަހައްދުތަކަށް ދެމުންދާ ވައިގެ ހަމަލާތަކުގައި ގިނަ އަދަދެއްގެ ބަޔަކު މަރުވެ، އެ ގައުމުގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ.
މި ހަމަލާތަކުގެ ބަދަލުހިފުމުގެ ގޮތުން އީރާނުގެ ހަތިޔާރު އެޅި ފައުޖުތަކުން ދަނީ އިޒްރޭލުން ހިފާފައިވާ ބިންތަކަށާއި ސަރަހައްދީ އެކި މަރުކަޒުތަކުގައި ތިބި އެމެރިކާ އަދި އިޒްރޭލުގެ ސިފައިންނަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ހަމަލާތައް ފޮނުވަމުންނެވެ.
