އެމެރިކާގެ ގިނަ ޝަރުތު ތަކަށް އީރާން އިން އެއްބަސްވެއްޖެ: ޓްރަމްޕް

އެމެރިކާ އިން ހުށަހަޅާފައިވާ ގިނަ ޝަރުތު ތަކަށް އީރާން އިން އެއްބަސްވެފައިވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

އާދީއްތަ ދުވަހު އެއާ ފޯސް ވަންގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ހަނގުރާމަ ހުއްޓާލުމަށް އެމެރިކާ އިން ހުށަހެޅި 15 ނުކުތާގެ ތެރެއިން ގިނަ ކަންތައް ތަކަށް އީރާން އިން މިހާރު އެއްބަސްވެފައިވާ ކަމަށެވެ. ނަމަވެސް، އީރާން އިން ދީފައި ވަނީ ކޮން ދޫތަކެއް ކަމެއް ޓްރަމްޕް ހާމަ ކުރައްވާފައި ނުވެ އެވެ. އަދި މީގެ އިތުރުން ވެސް، ބައެއް ކަންކަމަށް އެމެރިކާ އިން އެދޭނެ ކަމަށް އޭނާ ވިދާޅުވި އެވެ. 

ޓްރަމްޕް މިހެން ވިދާޅުވި ނަަމަވެސް، އީރާން އިން ފާޅުގައި ވަނީ އެމެރިކާގެ ޝަރުތު ތަކަށް އިންކާރު ކޮށްފަ އެވެ. ޕާކިސްތާން މެދުވެރި ވެގެން އެމެރިކާ އިން ފޮނުވި ޝަރުތު ތަކުގެ ބަދަލުގައި، އީރާން އިން ވަނީ ފަސް ކަމެއް ހުށަހަޅައިފަ އެވެ. އޭގެ ތެރޭގައި ހޮރްމޫޒް ކަނޑު އޮޅީގެ ފުރިހަމަ ބާރު އީރާން އަށް އޮތުން ހިމެނެ އެވެ. 

މި ދަނޑި ވަޅުގައި ޓްރަމްޕް ވަނީ، އީރާންގެ ތެޔޮ ވަސީލަތްތައް އެމެރިކާގެ ބާރުގެ ދަށަށް ގެންނަން ބޭނުންވާ ކަމަށް ވިދާޅުވެ، މަސްރަހު އިތުރަށް ގޯސްކޮށްފަ އެވެ. ފައިނޭންޝަލް ޓައިމްސް އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އީރާންގެ ތެޔޮ އަތުލުމަކީ އޭނާ އެންމެ ކުރަން ބޭނުންވާ ކަންތައް ކަމަށާއި، އެކަމާ ދެކޮޅު ހަދާ އެމެރިކާގެ ސިޔާސީ ފަރާތްތަކަކީ ކަންކަން އިނގޭ ބައެއް ނޫން ކަމަށް ވެސް ޓްރަމްޕް ވިދާޅުވި އެވެ. 

އީރާންގެ ތެޔޮ އެކްސްޕޯޓު ކުރާ މައި މަރުކަޒު ކަމަށްވާ ޚާރްގް އައިލެންޑް ހިފުމަކީ އަސްކަރީ ގޮތުން ނުރައްކާތެރި އަދި ގިނަ ދުވަސް ތަކަކަށް އެ ސަރަހައްދުގައި މަޑު ކުރަން ޖެހޭ ކަމެކެވެ. ނޮވެމްބަރު މަހު އޮންނަ މިޑް ޓާމް އިންތިޚާބާ ދިމާކޮށް، އިޤްތިޞާދީ ގޮތުން ކުރިމަތި ވެދާނެ ގެއްލުން ތަކަށް ބަަލައި، ހަނގުރާމަ ވަރަށް އަވަހަށް ނިމޭނެ ކަމަށް ޓްރަމްޕް ވިދާޅުވެފައިވެ އެވެ. 

ނަމަވެސް، އެމެރިކާ އިން ދަނީ ސަރަހައްދުގައި އަސްކަރީ ބާރުވެރިކަން އިތުރު ކުރަމުންނެވެ. މިދިޔަ ހަފުތާ ބަންދުގައި އެމެރިކާގެ އެތައް ހާސް ސިފައިންނާއި، އެމްފިބިއަސް އެސޯލްޓް ޓީމެއްގެ އިތުރުން، 82 ވަނަ އެއާބޯން ޑިވިޒަންގެ ސިފައިން ވަނީ މެދު އިރުމައްޗަށް ފޮނުވައިފަ އެވެ. 

މަސްރަހު ފިނި ކުރުމަށްޓަކައި ޕާކިސްތާން އާއި ސައުދީ އަރަބިއްޔާ އަދި ތުރުކީގެ އިސްވެރިން ވަނީ ބައްދަލ ކުރައްވައިފަ އެވެ. ޕާކިސްތާންގެ ފޮރިން މިނިސްޓަރު އިސްހާގު ދާރު ވިދާޅުވީ، ކުރިއަށް އޮތް ތަނުގައި ބާއްވާ މަޝްވަރާ ތަކަށް ދެ ޤައުމުން ވެސް ޕާކިސްތާން އަށް އިތުބާރު ކުރާ ކަމަށެވެ. ނަމަވެސް، ސީދާ ބައްދަލުވުމަކަށް ދެ ޤައުމުން އަދި ތައްޔާރުވެފައި ނުވެ އެވެ. އީރާން އާއެކު ކުރަމުން އަންނަ މަޝްވަރާތައް ކާމިޔާބު ކަމަށް ޓްރަމްޕް ވިދާޅުވި ނަަމަވެސް، އަސްކަރީ ހަމަލާ ތަކެއް ދޭން ޖެހިދާނެ ކަމުގެ އިންޒާރު އޭނާ ދެއްވާފައިވެ އެވެ.