އިރާނަށް އެއްގަމު މަގުން އެރުމަށް އެމެރިކާގެ 3500 ސިފައިން މެދު އިރުމައްޗަށް އަތުވެއްޖެ
އިރާނުގެ ފަސްގަނޑުގައި ހަފުތާތަކަކަށް ދެމިގެންދާ އެއްގަމު އަސްކަރީ އޮޕަރޭޝަންތަކެއް ހިންގުމަށް އެމެރިކާގެ ޕެންޓަގަނުން ތައްޔާރުވަމުންދާކަމުގެ ރިޕޯޓްތަކެއް ވަނީ ފެންމަތިވެފައި. މި ރޭވުންތަކުގެ ދަށުން އެމެރިކާގެ ހާއްސަ ފައުޖުތަކުން ކުއްލި ހަމަލާތަކެއް ދިނުމަށް ތައްޔާރުވަމުންދާއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ ހޮރްމޫޒް ކަނޑުއޮޅި ބަންދުކޮށްފިނަމަ އިރާނަށް ވަރުގަދަ ހަމަލާތަކެއް ދޭނެކަމުގެ އިންޒާރު ދެއްވާފައި.
ޔޫއެސްއެސް ޓްރިޕޮލީ (އެލް.އެޗް.އޭ 7) ގައި ހަރަކާތްތެރިވާ އެމެރިކާގެ ކަނޑުގެ ސިފައިންނާއި މެރިންސް، މާރިޗު މަހުގެ 27 ވަނަ ދުވަހު އެމެރިކާގެ ސެންޓްރަލް ކޮމާންޑް (ޔޫ.އެސް ސެންޓްކޮމް) ގެ ބެލުމުގެ ދަށުގައިވާ ސަރަހައްދަށް ވަނީ އައިސްފައި. | ސެންޓްކޮމް
އިރާނުގައި ހަފުތާތަކަކަށް ދެމިގެންދާ އެއްގަމުގެ އަސްކަރީ އޮޕަރޭޝަނަކަށް އެމެރިކާގެ އެތައް ހާސް މެރިން ސިފައިން މެދުއިރުމައްޗަށް އަތުވެއްޖެ ކަމަށް ރިޕޯޓްތައް ބުނެފި އެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކޮށްފައިވާ ގޮތުގައި، ޔޫއެސްއެސް ޓްރިޕޮލީ މަނަވަރުގައި އިތުރު 3،500 ސިފައިން މިހާރު ވަނީ މެދުއިރުމައްޗަށް އައިސްފައެވެ.
މާޗް މަހުގެ 27 ވަނަ ދުވަހު މެދުއިރުމައްޗަށް އައި މި ސިފައިންނަކީ އެމެރިކާގެ 31 ވަނަ މެރިން އެކްސްޕެޑިޝަނަރީ ޔުނިޓަށް ނިސްބަތްވާ ފަޅުވެރިންނާއި މެރިން ސިފައިންނެވެ. މި ސިފައިންނާއެކު މުދާ އުފުލާ ބޯޓުފަހަރާއި، ހަމަލާދޭ ފައިޓަރު ޖެޓްތަކުގެ އިތުރުން، އެއްގަމާއި ކަނޑުގައި ބޭނުންކުރެވޭ އުޅަނދުފަހަރާއި ހަނގުރާމަވެރި ވަސީލަތްތައް ވެސް ވަނީ އެ ސަރަހައްދަށް ގެނެސްފައެވެ.
އިރާނާއެކު ކުރަމުންދާ ހަނގުރާމަ ހުއްޓާލުމަށް މަޝްވަރާތައް ކުރިއަށްދާ ކަމަށް ޑޮނަލްޑް ޓްރަމްޕް ވިދާޅުވަމުންދާއިރު، އެމެރިކާގެ އަސްކަރިއްޔާއިން މިވަނީ އިތުރު ސިފައިން ފޮނުވަން ފަށާފައެވެ. މީގެ އިތުރުން، އެމެރިކާގެ 82 ވަނަ އެއަރބޯން ޑިވިޜަނަށް ނިސްބަތްވާ އެތައް ހާސް ސިފައިންނެއް ވެސް ކުރިއަށް އޮތް ތަނުގައި އެ ސަރަހައްދަށް ފޮނުވާނެ ކަމަށް ބެލެވެއެވެ.
ވޮޝިންގޓަން ޕޯސްޓުން އެމެރިކާ ސަރުކާރުގެ ނަން ހާމަކުރަން ބޭނުންނުވާ އޮފިޝަލުންނާ ހަވާލާދީ ރިޕޯޓްކޮށްފައިވާ ގޮތުގައި، ޕެންޓަގަނުން ދަނީ އިރާނުގެ ފަސްގަނޑުގައި ހަފުތާތަކަކަށް ދެމިގެންދާ އެއްގަމު އޮޕަރޭޝަންތަކެއް ހިންގުމަށް ތައްޔާރުވަމުންނެވެ.
އޮފިޝަލުން ވޮޝިންގޓަން ޕޯސްޓަށް މައުލޫމާތު ދިން ގޮތުގައި، މި އެއްގަމު އޮޕަރޭޝަނަކީ މުޅި ގައުމަށް އަރައިގަތުން ފަދަ ފުރިހަމަ އުދުވާނަކަށް ނުވި ނަމަވެސް، މީގެ ތެރޭގައި އެމެރިކާގެ ހާއްސަ ފައުޖުތަކުން (ސްޕެޝަލް ފޯސަސް) ދޭ ކުއްލި ހަމަލާތަކާއި ފައިމަގުގައި ހަރަކާތްތެރިވާ ސިފައިންގެ އޮޕަރޭޝަންތައް ހިމެނިދާނެއެވެ.
ޕެންޓަގަނުން އެކުލަވާލާފައިވާ މި ރޭވުންތަކުގެ ތެރެއިން ޑޮނަލްޑް ޓްރަމްޕް ހުއްދަ ދެއްވާނީ ކޮން ކަންތައްތަކަކަށް ކަމެއް ނުވަތަ އެއްވެސް ކަމަކަށް ހުއްދަ ދެއްވާނެ ކަމެއް އަދި ސާފުނުވާ ކަމަށް ވޮޝިންގޓަން ޕޯސްޓުން ބުނެފައިވެއެވެ.
މި ރިޕޯޓްތައް ފެންމަތިވެފައި މިވަނީ، އެމެރިކާގެ 31 ވަނަ މެރިން އެކްސްޕެޑިޝަނަރީ ޔުނިޓްގެ 3،500 ސިފައިން މެދުއިރުމައްޗަށް އައިސްފައިވާކަން އެމެރިކާގެ އަސްކަރިއްޔާއިން އިއުލާނުކޮށްފައިވާ ދަނޑިވަޅެއްގައެވެ. ހަމައެއާއެކު، އިރާނުން ބަލި ގަބޫލުކުރުމަށް ޑޮނަލްޑް ޓްރަމްޕް ވަނީ ގޮވާލައްވާފައެވެ. އަދި ހޮރްމޫޒް ކަނޑުއޮޅި ބަންދުކުރުން އިރާނުން ކުރިއަށްގެންދާނަމަ، އެ ގައުމަށް "ނަރަކައިގެ އަޒާބު" ދައްކާލާނެ ކަމަށް ވިދާޅުވެ ޓްރަމްޕް ވަނީ އިންޒާރު ދެއްވާފައެވެ.
