ރައީސް ވިދާޅުވީ ފީއަލީގެ ފެނަކަ މުވައްޒަފުންގެ އަދަދާ ގުޅިގެން ސައްހަ ނޫން މައުލޫމާތު ދެއްވީ ފެނަކަ އެމްޑީ ކަމަށް!

މި ސަރުކާރު ވެރިކަމަށް އައި ފަހުން، ފ. ފީއަލީ އިން ފެނަކަ އަށް ނަގާފައި ވަނީ އެންމެ 10 މުވައްޒަފުން ކަމަށް ވިދާޅުވެ ސައްހަ ނޫން މައުލޫމާތެއް ދެވިފައި ވާނަމަ އެކަން ބަލާނެ ކަމަށާއި އެ މައުލޫމާތަކީ ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުހައްމަދު ނަޖާހު ދެއްވި މައުލޫމާތެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. 

މިދިޔަ ހަފްތާގެ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް ވަނީ ފީއަލީގެ ފެނަކައިގައި މިހާރު ތިބީ 60 މުވައްޒަފުން ކަމަށް ވިދާޅުވެ އޭގެ ތެރެއިން މި ސަރުކާރުން ނެގީ 10 މުވައްޒަފުން ކަމަށާއި، އަނެއް 50 މުވައްޒަފުން އެއީ ނިމިދިޔަ އެމްޑީޕީގެ ސަރުކާރުގައި ނަގާފައިވާ މުވައްޒަފުން ކަމަށް ވިދާޅުވެފަ އެވެ. 

ނަމަވެސް ރައީސް މުއިއްޒު ވެރިކަމާ ހަވާލުވެ ވަޑައިގެންނެވިއިރު، ފީއަލީ ފެނަކައިގައި ތިބީ 26 މުވައްޒަފުންނެވެ. އޭގެ ފަހުން ރައީސް މުއިއްޒުގެ ސަރުކާރުން ވަނީ ފީއަލީގެ ފެނަކަ އަށް 34 މުވައްޒަފުން މިހާތަނަށް ނަގައިފަ އެވެ. މީގެ އިތުރުން އިތުރު ފަސް މީހަކަށް ވަޒީފާ ހަމަޖެއްސުމުގެ މަސައްކަތް މިހާރު ވެސް އަންނަނީ ކުރަމުންނެވެ. އެ މީހުންނަށް ވަޒީފާ ހަމަޖެއްސުމާ އެކު، މި ސަރުކާރުން ފެނައިކައިން ވަޒީފާ ދިން މީހުންގެ އަދަދު 39 އަށް އަރާނެ އެވެ.

މިކަމާ ގުޅިގެން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެޓީވީ އިން ސުވާލު ކުރުމުން ރައީސް ދެއްވި ޖަވާބަކީ ފެނަކަ އެމްޑީ ދިން މައުލޫމަތަށް ދެއްވި ޖަވާބެއް ކަމަށާއި، ރައީސް އަށް ފެނަކަ އެމްޑީ ދެއްވި މައުލޫމާތުގައި އެރާއެއް އޮތިއްޔާ އެކަން އެހެންވީ ކީއްވެ ތޯ ދަންނަވާނަން ކަމުގައަވެ. 

އަޅުގަނޑު ފެނަކަ އެމްޑީ އަށް ދަންނަވާލާނަން އަޅުގަނޑަށް ދިން މައުލޫމާރުގައި އެރާއެއް އޮތް ކަމަށް ވަންޏާ އެކަން އެހެންވީ ކީއްވެގެންތޯ ދަންނަވަން. އަޅުގަނޑު ދަންނަވަނީ އަޅުގަނޑަށް ލިބިފަ ހުންނަ މައުލޫމާތު. ޔަގީނުން ވެސް އަޅުގަނޑަށް ލިބިފަ އޮތް މައުލޫމާތެއް ޓްވިސްޓް ކޮށް، ބަދަލު ކޮށްފައެއް ނުދަންނަވާނެ. އަޅުގަނޑު ހަމަ އަޅުގަނޑަށް ލިބޭ މައުލޫމާތު އޮންނަ ގޮތަށް ދަންނަވާނީ.  — ރައީސް ޑރ. މުހައްމަދު މުއިއްޒު

މީގެ އިތުރުން ފާއިތު ހަފްތާގެ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ވެރި ކަމުގައި ފީއަލީގެ ފެނަކަ އަށް 50 މީހުން ވަޒީފާ އަށް ނެގި ކަމަށް ވިދާޅުވެ، ވެސް ރައީސް ހެއްދެވީ އިތުރުފުޅެކެވެ. ކުރީގެ ރައީސް އިބްރާހީމް މުހައްމަދު ސޯލިހުގެ ފަސް އަހަރު ދުވަހުގެ ވެރިކަން ނިމުނުއިރު، ފީއަލީގެ ފެނަކަ އަށް ނަގާފައި ވަނީ 18 މުވައްޒަފުންނެވެ. އަނެއް އަށް މުވައްޒަފުންނަކީ، ފެނަކަ އެންމެ ފުރަތަމަ ފީއަލީގައި ހުޅުވިއިރު ވަޒީފާ އަށް ނެގި އަށް މުވައްޒަފުންނެވެ. 

ފެނަކައިގެ އިތުރުން އެހެން ކުންފުނި ތަކުން ވެސް ގެންދަނީ މުވައްޒަފުން ނަގަމުންނެވެ. އެގޮތުން ފީއަލީ އައިސް ޕްލާންޓަށް ވެސް ވަނީ ފަސް މުވައްޒަފުން ނަގައިފަ އެވެ. މީގެ އިތުރުން އެމްޓީސީސީ ސައިޓަށް ވެސް ވަނީ ފަސް މުވައްޒަފުން ނަގައިފަ އެވެ. އަދި ހަމަ އެހެންމެ ފީއަލީ އެމްޓީސީސީ ފެރީ އަށް ވެސް މި ސަރުކާރުން ވަނީ، ނުވަ މުވައްޒަފުން ނަގައިފަ އެވެ. 

ފީއަލީގެ އިތުރުން ކުރިއަށް އޮތް އިންތިޚާބާ ދިމާކޮށް މި ސަރުކާރުން ދަނީ ގިނަ އަދަދެއްގެ ބަޔަކަށް ވަޒީފާ ދެމުންނެވެ. އެގޮތުން ސަރުކާރު ކުންފުނިތަކުންނާއި މިިނިސްޓްރީތަކުން ވެސް ދަނީ ގިނަ އަދަދަކަށް މުވައްޒަފުން ހޯދުމަށް އިއުލާނު ކުރަމުންނެވެ. އޭގެ ތެރޭގައި، އާރްޑީސީ، އެމްޓީސީސީ، ކަސްޓަމްސް އަދި ފެނަކައިގެ އިތުރުން އެފްއެސްއެމް ވެސް ހިމެނެ އެވެ.