ރައީސް މުއިއްޒު އުޅުއްވީ އެެއް ރަށުގައި އަޅުއްވާ ބިންގާ އަށް ވުރެ އަނެއް ރަށުގެ ބިންގާ އިތުރު ކުރެއްވުމުގެ އަމިއްލަ މުބާރާތެއްގައި: ޝާހިދު
މި ސަރުކާރަކީ ހަމައެކަނި ބިންގާ އެޅުމަށް މޮޅު ސަރުކާރެއްގެ ގޮތުގައި ސިފަކުރައްވައި، ތަރައްގީގެ އެއްވެސް މަޝްރޫއެއް އަމަލީގޮތުން ކުރިއަށް ނުދާކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ. ތިނަދޫ ސިޓީގައި ބޭއްވި ޖަލްސާގައި ވާހަކަދައްކަވަމުން ޝާހިދު ވިދާޅުވީ، ބޯހިޔާވަހިކަމުގެ މަޝްރޫއުތައް ހުއްޓިފައިވާއިރު، މި ސަރުކާރަށް ގައުމުގެ ތަރައްގީއަށް އެންމެ ގާބުރިއެއްވެސް ބަހައްޓާލެވިފައި ނުވާ ކަމަށް. އަދި ރައީސް މުއިއްޒު ރަށްރަށަށް ކުރެއްވި ދަތުރުފުޅުތަކަކީ ހަމައެކަނި ބިންގާ އެޅުމުގެ މުބާރާތެއްގެ ގޮތުގައި އޭނާ ފާހަގަކުރެއްވި.
އެމްޑީޕީގެ ރައީސް އަބްދުﷲ ޝާހިދު | އެމްޑީޕީ ސެކްރިޓޭރިއެޓް
މިދިޔަ 2025 ވަނަ އަހަރު ރައީސް ޑރ. މުހައްމަދު މުއިއްޒު އުޅުއްވީ އެއް ރަށުގައި އަޅުއްވާ ބިންގާ އަށް ވުރެ އަނެއް ރަށުގައި އަޅުއްވާ ބިންގާ އިތުރުކުރެއްވުމުގެ އަމިއްލަ މުބާރާތެއްގައި ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ހޮނިހިރު ދުވަހު ތިނަދޫ ސިޓީގައި ބޭއްވި ޖަލްސާގައި ވާހަކަދައްކަވަމުން ޝާހިދު ވިދާޅުވީ މި ސަރުކާރަކީ ބިންގާ އެޅުމުގައި މި ރާއްޖޭގައި މިހާތަނަށް ނުފެންނަ ވަރުގެ މޮޅު ސަރުކާރެއް ކަމަށެވެ.
އެގޮތުން މިދިއަ އަހަރުގެ ފަހުކޮޅު، މިގައުމުގެ އެންމެ އިސްވެރިޔާގެ ހައިސިއްޔަތުން ރައީސް މުއިއްޒު މުޅި ރާއްޖެ އަށް ފުރަމާނަ ދަތުރުތައް ކުރައްވާފައިވާ ކަމަށާ އެ ދަތުރުފުޅުތައް ނިމުމާއެކު ޕީއެންސީގެ ފަރާތުން ބަޔާންތައް ނެރެ ރައީސަށް މަރުހަބާ ދަންނަވަމުން ދިޔައީ ރާއްޖޭގެ ތާރީޚުގައި ވެސް މިވަރުގެ ދަތުރެއް ރާއްޖޭގެ ވެރިއަކު ނުކުރައްވާ ކަމަށް ދެއްކެވުމަށް ކަމަށް ޝާހިދު ވިދާޅުވި އެވެ.
އެވާހަކަ އެގޮތަށް ދެކެވެން ފެށީމަ އަޅުގަނޑުވެސް ތާރީޚީ ފޮތްތަކާ އެއްޗެހި ބަލާލިން. އެއީ ތެދުފުޅެއް. އަދިއެއް ދިވެހިރާއްޖޭގެ އެންމެ މަތީ ވެރިއެއް އެވަރުގެ ދަތުރުފުޅެއް ނުކުރައްވާ. އެއީ ބިންގާ އެޅުމުގެ މުބާރާތެއްގައި ބައިވެރިވެވަޑައިގަންނަވައިގެން. ރާއްޖޭގެ ކޮންމެ ރަށަކަށް ވަޑައިގެން ބިންގާ އެޅުއްވުން. އެއް ރަށުގައި އަޅުއްވަ ބިންގަލަށް ވުރެ ދެން ވަޑައިގަންނަވާ ރަށެއްގައި އަޅުއްވާ ބިންގާ އިތުރު ކުރައްވާ.އެމްޑީޕީގެ ރައީސް އަބްދުﷲ ޝާހިދު
އެ ދަތުރުފުޅުތަކުގައި އެމަނިކުފާނު ކުރެއްވީ އެންމެ ކަމެއް ކަމަށާ އެއީ ރާއްޖޭގެ ކޮންމެ ރަށަކަށް ވަޑައިގެން ބިންގާ އެޅުއްވުން ކަމަށް ވެސް ޝާހިދު ވިދާޅުވި އެވެ. އަދި އެ މަސައްކަތުގެ ތެރެއިން ކުރެއްވި އެންމެ ފާހަގަކޮށްލެވޭ އެއް ކަމަކީ އެއް ރަށުގައި އަޅުއްވާ ބިންގަލަށް ވުރެ ދެން ވަޑައިގަންނަވާ ރަށެއްގައި އަޅުއްވާ ބިންގާ އިތުރު ކުރައްވަން ކުރެއްވި މަސައްކަތް ކަމަށް ވެސް ޝާހިދު ވިދާޅުވި އެވެ.
ޝާހިދު ވިދާޅުވީ ހަމަ އެގޮތަށް މިދިޔަ ހަފްތާގެ ތެރޭގައި ތިނަދޫ ސިޓީގައި އެމަނިކުފާނު އެޅުއްވި 50 ހައުސިންގ ޔުނިޓަކީ ހަމަ ގާވެފައި ހުންނާނެ އެއްޗެއް ކަމަށް މުޅި ރާއްޖެ ހެކިވާނެ ކަމަށެވެ. މި ސަރުކާރުގެ ހައުސިންގ މަޝްރޫއުތައް ޝާހިދު ސިފަކުރެއްވީ މަހަށް ގޮސް ގަލުގައި ބުޅި އަޅައިގެންފައިވާ ގޮތަށް ހުއްޓިފައި އޮންނަ މަޝްރޫއުތަކެއް ގެ ގޮތުގަ އެވެ.
މި ސަރުކާރަށް މި ގައުމުގެ ތަރައްގީއަށް އެންމެ ގާބުރިއެއް ވެސް ބަހައްޓާލެވިފައި ނުވާއިރު ބޯހިޔާވަހިކަމުގެ އަހަރެއްގެ ގޮތުގައި ޕްރޮމޯޓް ކުރި އަހަރެއް ނިމިދިޔަ އިރު ވެސް ހިނގި ހައުސިންގ މަޝްރޫއެއް ނެތް ކަމަށް ޝާހިދު ވިދާޅުވި އެވެ.
