މާލެ އަށް ޕީއެންސީ މޭޔަރަކު ގެންނަން ރައީސް މުއިއްޒު ބޭނުންފުޅު ވަނީ ރައްޔިތުންނަށް އަނިޔާ ކުރުމަށްޓަކައި: ކުރީގެ މެންބަރު ހަލީމް

މާލެ ސިޓީ ކައުންސިލަށް ޕީއެންސީ ގެ މެޖޯރިޓީ ހޯދައި، ޕީއެންސީ އަށް ނިސްބަތްވާ މޭޔަރަކު ގެންނަން ރައީސް ޑރ. މުހައްމަދު މުއިއްޒު މަސައްކަތް ކުރައްވަނީ ރައްޔިތުން އޮބިއަޅައި އޮބަހައްޓާ، މާލޭގެ ރައްޔިތުންނަށް އަނިޔާ ކުރުމަށްޓަކައި ކަމަށް ރައްޔިތުންގެ މަޖިލީހުގެ ބިލެތްދޫ ދާއިރާގެ ކުރީގެ މެންބަރު އަހްމަދު ހަލީމް (ދޮންބިލެތް) ވިދާޅުވެއްޖެ އެވެ. 

ހުކުރު ދުވަހުގެ ރޭ އެމްޑީޕީ އިން ބޭއްވި ކަންމަތީ ޖަލްސާގައި ވާހަކަދައްކަވަމުން އަހްމަދު ހަލީމް ވިދާޅުވީ މިއަދު ދުނިޔޭގެ ހާލަތާ މި ގައުމުގެ ނާޒުކު ހާލަތަށް ވުރެ ރައީސް މުއިއްޒަށް މުހިއްމީ މާލެ ސިޓީ ކައުންސިލްގެ ހުރިހާ ގޮނޑިއެއް ކާމިޔާބުކުރެއްވުން ކަމަށެވެ. 

ރަމަޟާން މަހު ވެސް އޮފީހަށް ވެސް ވަޑައި ނުގަންނަވައި އެމަނިކުފާނު މާލޭގެ މަގުތަކުގައި އުޅުއްވީ ހަމައެކަނި އެކަމަށްޓަކައި ކަމަށް ވެސް އަހްމަދު ހަލީމް ވިދާޅުވި އެވެ. 

ރައީސް އޮފީހަށް ދޮޅުމަސް ދުވަސް ވެއްޖެ ވަޑައިނުގަންނަވާ މެންދުރާ ހަވީރާ ރަމަޟާން މަހުވެސް މުޅި މާލޭގައި ކެމްޕެއިން ކުރައްވަމުން އެ އުޅުއްވާ އުޅުއްވުމުން އަޅުގަނޑު ކަންބޮޑުވަނީ ދިވެހިރާއްޖެ އާ ދޭތެރޭގައި ވިސްނާނުލައްވާ ހުރިހާ ކެބިނެޓް ވަޒީރުންނާ އަދި ސަރަނގު އާދަމް މަނިކާ ޒާހިރާ ގޮވައިގެން މާލޭގައި އެ އުޅުއްވާ އުޅުއްވުމުން އަޅުގަނޑު ވަރަށް ކަންބޮޑުވޭ. އަޅުގަނޑު ހިތަށް އަރަނީ މިވަރުގެ ދަތި ކަމެއް އަޅުގަނޑުމެން ދިވެހިރާއްޖެއަށް ދިމާވާއިރުގައި މިހާ މުހިއްމު ވެގެން މާލޭގެ ސިޓީ ކައުންސިލް ނަގަން ރައީސް މުއިއްޒު މި އުޅުއްވަނީ ކީއްކުރަން ބާއޭ. އަޅުގަނޑުގެ ހިތުގައި އުފެދޭ ސުވާލަކީ ރައީސް މުއިއްޒާ އެމަނިކުފާނުގެ އަނބިކަނބަލުން ސާޖިދާ އާ އަދި އާދަމް މަނިކާ ޒާހިރާ ވެސް ލައިގެން މިހުރިހާ ބޭފުޅުން ރެޔާ ދުވާލު މާލޭގެ މި ސިޓީ ކައުންސިލައިގެން މި އުޅުއްވަނީ ކީއްކުރަން ބާއޭ.

ރައްޔިތުންގެ މަޖިލީހުގެ ބިލެތްދޫ ދާއިރާގެ ކުރީގެ މެންބަރު އަހްމަދު ހަލީމް (ދޮންބިލެތް) 

އޭނާ ވިދާޅުވީ މި ސުވާލު ވަރަށް ބޮޑަށް އުފެދޭތީ އެކަމާ ގުޅިގެން 19 ވަނަ މަޖިލީހުގައި ޕީޕީއެމްގެ މެންބަރުންގެ ގޮތުގައި ތިއްބެވި އަދި މިހާރު ޕީއެންސީ ވަޒީރުންގެ ގޮތުގައި ތިއްބެވި ބައެއް އެކުވެރިންނާ ސުވާލު ކޮށްފައިވާ ކަމަށެވެ. 

އެކަމުގެ މައުލޫމާތު ދެއްވި ވަޒީރުން ވިދާޅުވި ގޮތުގައި މިއީ ރިޔާސީ އިންތިޚާބެއް ކަމަށާއި މިއަށްވުރެ ބޮޑު އަދި މުހިއްމު އިންތިޚާބެއް ޕީއެންސީ އަށް ކުރިމައްޗެއް ނުވާނެ ކަމަށް ރައީސް މުއިއްޒު ވިދާޅުވިކަން ފާހަގަކުރައްވައި ހަލީމް ވިދާޅުވީ މި އިންތިޚާބު ދޭތިން އެކައްޗަށް ޕީއެންސީ އިން ކާމިޔާބު ކުރަން ޖެހޭނެ ކަމަށް ރައީސް، ޕީއެންސީގެ މެންބަރުންނަށް އަންގަވާފައިވާ ކަމަށެވެ. 

ސަބަބަކީ މި އިންތިޚާބު ކާމިޔާބު ކުރުމަށްފަހު ގާނޫނު އަސާސީ އަށް ގެންނަ ވަރަށް ބޮޑު ބަދަލެއް އެބައޮތޭ. އެބަދަލަށްޓަކައި ތިމަންނާމެން ކޮންމެހެން ވެސް މި މާލޭގެ އިންތިޚާބު ކާމިޔާބު ކުރަން ޖެހެއޭ. ދެން އަޅުގަނޑު އަހައިފިން މާލޭގެ އިންތިޚާބު ކާމިޔާބު ކުރަންވީ ކީއްވެގެންތޯ ގާނޫނު އަސާސީ އަށް އެހާ ބޮޑު ބަދަލެއް ގެންނަ އިރު މާލޭގެ އިންތިޚާބު އެހާ މުހިއްމު ވަނީ ކީއްވެ ތޯ. ގާނޫނު އަސާސީ ހަދަނީ ރައްޔިތުންގެ މަޖިލީހުން ނޫންތޯ. އެބޭފުޅުން ވިދާޅުވީ އާނ އެކޭ. ވިދާޅުވިއޭ މާލެ ތެރެ ތިމަންނާ މި ގެންނަ މުހިއްމު ބޮޑު ބަދަލުގެ ސަބަބުން މާލެތެރެ ހަލަބޮލި ވެގެންދާނެތީއޭ. މާލެތެރެ ހަލަބޮލިވެ، އެމްޑީޕީ މުޒާހަރާ ކުރަން މަގުމައްޗަށް ނިކުންއިރު ތަންފީޒީ ބާރުތަކާއެކީގަ މާލޭގެ ސިޓީ ކައުންސިލްގެ އެހީތެރިކަން ނެތިއްޔާ އަޅުގަނޑުމެންނަށް މާލެ ކޮންޓްރޯލް ކުރަން އުނދަގޫ ވާނެ އޭ. 

ރައްޔިތުންގެ މަޖިލީހުގެ ބިލެތްދޫ ދާއިރާގެ ކުރީގެ މެންބަރު އަހްމަދު ހަލީމް (ދޮންބިލެތް) 

އަހްމަދު ހަލީމް ވިދާޅުވީ އެހެންކަމުން މިކަންކަމަށް ބަލާއިރު ޕީއެންސީގެ ފަރާތުން މާލޭގެ މޭޔަރާ މާލޭގެ ކައުންސިލަރުން އަންނަނީ މާލެ އަށް ޚިދުމަތް ކުރަން ނޫން ކަން ހާމަވާ ކަމަށެވެ. އަދި މާލެ ސިޓީ ކައުންސިލަށް ޕީއެންސީ ގެ މެޖޯރިޓީ ހޯދައި، ޕީއެންސީ އަށް ނިސްބަތްވާ މޭޔަރަކު ގެންނަން ރައީސް ޑރ. މުހައްމަދު މުއިއްޒު މަސައްކަތް ކުރައްވަނީ ރައްޔިތުން އޮބިއަޅައި އޮބަހައްޓާ، މާލޭގެ ރައްޔިތުންނަށް އަނިޔާ ކުރުމަށްޓަކައި ކަމަށް ހަލީމް ވިދާޅުވި އެވެ.