ރައީސް މުއިއްޒު އަށް ރަނގަޅުވާނީ ޝަރުއީ ދާއިރާ އިތުރަށް މިނިވަން ކުރަން ނޫޅުނިއްޔާ: ސޯލިހު
ޝަރުއީ ދާއިރާ މިނިވަންކުރުމުގެ ނަމުގައި އެ ދާއިރާގެ ތެރެއަށް އަތްނުބޭނުމަށް ކުރީގެ ރައީސް އިބްރާހިމް މުހައްމަދު ސޯލިހު ސަރުކާރަށް ގޮވާލައްވައިފި. އިންތިޚާބުތައް އެއްކޮށްލުމަށް ގާނޫނުއަސާސީއަށް އިސްލާހު ގެނައުމަކީ ރައްޔިތުންގެ ބާރުތައް އަތުލުން ކަމަށް ސިފަކުރައްވައި، އެކަމަށް އެއްބަސްނުވުމަށް އެމަނިކުފާނު ވަނީ ރައްޔިތުންނަށް އިލްތިމާސް ކުރައްވާފަ. އަދި ސަރުކާރުން މިނިވަން މުއައްސަސާތަކަށް ނުފޫޒު ފޯރުވާ ކަމަށް ތުހުމަތުކުރައްވައި، މިހާރުގެ ސިޔާސަތުތަކަށް ރައީސް ސޯލިހު ވަނީ ވަރަށް ބޮޑަށް ފާޑުވިދާޅުވެފަ.
ކުރީގެ ރައީސް އިބްރާހިމް މުހައްމަދު ސޯލިހު | އެމްޑީޕީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް އެންމެ ރަނގަޅު ގޮތަކީ ޝަރުއީ ދާއިރާ އިތުރަށް މިނިވަންކުރުމުގެ ނަމުގައި އެ ދާއިރާގެ ތެރެއަށް އަތްނުބޭނުން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އައްޑޫ ހުޅުދޫ މީދޫ "އުންމީދެއްގައި" ޖަލްސާގައި މިހާރު އޮތް ސަރުކާރުގެ ސިޔާސަތުތަކަށް ފާޑުވިދާޅުވެ ދެއްކެވި ވާހަކަފުޅެއްގަ އެވެ.
ކުރީގެ ރައީސް ސޯލިހު ވިދާޅުވީ، ރައީސް މުއިއްޒު ވެރިކަމާ ހަވާލުވި ދުވަހު ޝަރުއީ ދާއިރާއަށް އޮތް ސިޔާސީ ނުފޫޒު މުޅިން ނިމުމަކަށް އައީ ކަމަށް ވަރަށް ބާރަށް ވިދާޅުވި ނަމަވެސް، އަމަލާއި ބަހާ ދިމާނުވާ ކަމަށެވެ. އެގޮތުން މިދިޔަ ހަފުތާގައި ބޭއްވި ނޫސްވެރިންގެ ބައްދަލުވުމުގައި، ޝަރުއީ ދާއިރާ އާއި މިނިވަން މުއައްސަސާތައް އިތުރަށް މިނިވަންކުރުމަށްޓަކައި ރައްޔިތުންގެ މަޖިލީހަށް ގާނޫނުތަކެއް ހުށަހަޅުއްވާނެ ކަމަށް ރައީސް ވިދާޅުވުމަކީ ކަންބޮޑުވުމެއް ކަމަށް ސޯލިހު ފާހަގަކުރެއްވި އެވެ.
ސޯލިހު ވިދާޅުވީ މިވަގުތު އެންމެ ރަނގަޅު ގޮތަކީ އެ މުއައްސަސާތަކާ ބެހިވަޑައިނުގަނެ، މިހާރު އޮތް މިންވަރަށް ބޭއްވުން ކަމަށެވެ. އަދި 2028 ވަނަ އަހަރު ރައްޔިތުން ގޮތް ނިންމާނެ ކަމަށާއި، މިހާރު އޮތް ސަރުކާރަށް ރައްޔިތުން ދެން "އާނއެކޭ" ނުބުނާނެ ކަމުގެ ޔަގީންކަން އެބައޮތް ކަމަށްވެސް އެމަނިކުފާނު ވިދާޅުވިއެވެ.
އަޅުގަނޑުމެންނަށް ރަނގަޅީ އެކަންތައްތަކާ ދެން އެ ބޭފުޅުން ބެހިވަޑައިނުގަތީއްޔާ. އިހަށް މިއޮތްވަރަށް ބާއްވަން. 2028 ވަނަ އަހަރު ރައްޔިތުން ގޮތް ނިންމާނެ. ދިވެހިރާއްޖޭގެ ރައްޔިތުން އަޅުގަނޑަށް ހަމަ ޔަޤީން، މި ވެރިކަމަކަށް އާއެކޭ ދެނެއް ނުބުނާނެ. އެ ސަބަބަށްޓަކައި ލޯކަލް ކައުންސިލްގެ އިންތިޚާބާ ގުޅިގެން އެ ނެރޭ ސިއްރު ކަރުދާސްކޮޅެއް އެ އުޅެނީ. ރައްޔިތުންގެ މަޖިލީހުން ނިންމުން، ނިންމުމެކޭ ކިޔާފައި އެ ގެންނަ ރިފަރެންޑަމް މަޖިލީހުގައި ދެ ގަޑިއިރު، މުޅި ޖުމުލަ ދެ ގަޑިއިރު ވާހަކަދައްކައި ނިންމާފައި އޮތް ނިންމުމެއް.ކުރީގެ ރައީސް އިބްރާހިމް މުހައްމަދު ސޯލިހު
ލޯކަލް ކައުންސިލް އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމަށްޓަކައި ގާނޫނުއަސާސީއަށް އިސްލާހު ގެނައުމަށް ސަރުކާރުން ކުރާ މަސައްކަތަށްވެސް ސޯލިހު ވަނީ ވަރަށް ބޮޑަށް ފާޑުވިދާޅުވެފައެވެ. އެމަނިކުފާނު ވިދާޅުވީ، ރައްޔިތުންގެ މަޖިލީހުގައި އެންމެ ދެ ގަޑިއިރުގެ ބަހުސަކަށް ފަހު ރިފަރެންޑަމްއަކަށް ދާން ނިންމުމަކީ ރައްޔިތުންގެ އިތުބާރު ގެއްލިފައިވާތީ ސަރުކާރުން ޖަހާ "މަނިއެއް" ކަމަށެވެ. ގާނޫނުއަސާސީއަށް ބަދަލު ގެންނަންވާނީ ރައްޔިތުންގެ ހަގީގީ ބައިވެރިވުމާއެކު ކަމަށްވެސް ވިދާޅުވިއެވެ.
މީގެ އިތުރުން، އިންތިޚާބުތަކާ ދިމާކޮށް ސަރުކާރުން ނާޖާއިޒު ނުފޫޒު ފޯރުވާ ކަމަށް ތުހުމަތު ކުރައްވަމުން ސޯލިހު ވިދާޅުވީ، ދުނިޔޭގެ ކުރިއަރާފައިވާ ގައުމުތަކުގައި އިންތިޚާބުތަކާ ދިމާކޮށް ވަކި މުއްދަތެއްގެ ކުރިން ވަޒީފާއިން މީހުން ވަކިކުރުމާއި އާ މަޝްރޫއުތައް ފެށުން މަނާކުރާ އުސޫލުތައް އޮންނަ ކަމަށެވެ. ނަމަވެސް ރާއްޖޭގައި އެ ހުރިހާ ބާރުތަކެއް ބޭނުންކޮށްގެން އިންތިޚާބުތައް އެއްކޮށްލަން އުޅުމަކީ ރަށްރަށަށް ލިބިފައިވާ ބާރުތައް އަތުލުން ކަމަށް އެމަނިކުފާނު ސިފަކުރެއްވިއެވެ.
ރައީސް ސޯލިހު ވަނީ އިންތިޚާބުތައް އެއްކޮށްލުމަށް ސަރުކާރުން ކުރާ މަސައްކަތަށް އެއްބަސްނުވުމަށް ރައްޔިތުންނަށް އިލްތިމާސް ކުރައްވާފައެވެ. އެމަނިކުފާނު ވިދާޅުވީ އެއީ ރަށްރަށުގެ ތަރައްގީއަށް ލިބިފައިވާ ދިފާއީ ބާރެއް ދޫކޮށްލުން ފަދަ ކަމެއް ކަމަށެވެ.
